Naniniwala ang AFP o Armed Forces of the Philippines na nasa Marawi City pa ang mga lider ng Maute – ISIS terror group.
Sa Mindanao Hour sa Malacańang, sinabi ni AFP Spokesman Brig. Gen. Restituto Padilla na kaya maigting na binabantayan ng mga kalaban ang ilang lugar sa Marawi ay dahil naroon ang kanilang mga lider.
Hindi aniya maaaring banggitin ang eksaktong lugar dahil nagpapatuloy ang operasyon laban sa Maute Group.
Sa pagtaya ni Padilla, nasa halos animnapu (60) na lamang ang nakakabakbakan ng mga sundalo kaya’t umaasa silang mapupulbos lahat ito sa mga susunod na araw.
Nauna nang inihayag ng AFP official na dalawa at kalahating barangay na lamang ang hawak ng mga terorista na indikasyong lumiliit na ang kanilang mundo.
Hinihinalang firearms supplier ng Maute sinalakay ng mga otoridad
Sinalakay ng mga otoridad ang mga bahay ng mga gun trader at hinihinalang firearms supplier ng Maute group sa Cagayan de Oro City.
Sinasabing nakarekober ang AFP o Armed Forces of the Philippines ang sampung armas sa isang compound sa Barangay Bonbon na pag-aari ng isang Jabar Tago, dating kandito sa pagka-alkalde sa Pantar, Lanao del Norte.
Nasangkot si Jabar at ang kanyang kapatid na si Jameloding sa kaso ng pamamaril noong Pebrero 9 kung san tatlong indibidwal ang nasawi.
Ayon kay Capt. Joe Patrick Martinez, tagapagsalita ng 4th Infantry Division ng Philippine Army, kabilang sa mga nasabat sa pagsalakay ang isang AK 47 at M4 assault rifle.
Mga bakwit ng Marawi hindi umano dapat magtampo
Hindi umano dapat na magtampo ang mga evacuee ng Marawi City sa ipinapakitang buhos na suporta ng publiko at mga negosyante sa mga sundalo.
Sa harap ito ng mas mataas na donasyon para sa mga sundalong nasawi at nasugatan sa Marawi Crisis kumpara sa donasyong natatanggap para sa mga internally displaced persons.
Sa status ng cash donations, nasa P108, 027,753.00 ang para sa Armed Forces of the Philippines (AFP) casualties habang para sa mga bakwit ay mayroon lamang P834,015.21.
Iginiit ni AFP Spokesman Brig. Gen. Restituto Padilla na hindi pinapabayaan ng gobyerno ang mga bakwit lalo na yaong mga nasa evacuation center.
Sa katunayan, ayon kay Padilla, nasa P200-M na ang nagagastos ng gobyerno sa mga nasa evacuation center para sa food at non-food items, bukod pa sa ibang tulong na ibinibigay ng mga non- government organizations.
Dagdag pa ng opisyal, kung malaki man ang natatanggap na tulong pinansiyal para sa mga nasawing sundalo, hindi nito kayang palitan ang buhay na nawala, at walang katumbas na halaga ang buhay na ibinuwis ng mga bayaning sundalo.
Pahayag ng Pangulo kaugnay sa Lumad pinababawi ng HMW
Hiniling ng HRW o Human Rights Watch kay Pangulong Rodrigo Duterte na bawiin ang kanyang pahayag na ipag-uutos niya sa militar ang pagbomba sa mga Lumad schools na umano’y pinapatakbo ng mga rebelde.
Sinabi ni HRW Asia Division’s Philippine Researcher Carlos Conde na nilalagay lamang ng Pangulo ang kanyang sarili sa posibleng war case sa international court dahil sa nangyari.
Maaari anilang maging hudyat lamang ng mas marami pang pang-aabuso sa mga katutubo ang demand ng Pangulo.
Agad namang nilinaw ng Malakanyang na nais lang ni Pangulong Duterte na wasakin ang mga mismong istruktura ng mga naturang paaralan, pero hindi niya nais ilagay sa kapahamakan ang mga bata.
Meann Tanbio / Gilbert Perdez | Story from Aileen Taliping
