Naniniwala ang kampo ni Supreme Court Chief Justice Maria Lourdes Sereno na may maganda ring patutunguhan ang impeachment case laban sa Punong Mahistrado.
Ayon kay Atty. Carlo Cruz, Spokesman ni CJ Sereno, ang mahalaga sa ngayon ay maipakita sa taongbayan na buhay ang demokrasya sa bansa.
Kasabay nito, kinontra ni Cruz ang pahayag ni Congressman Reynaldo Umali na papayagan lamang nilang ma-cross examine ang mga testigo sa impeachment case kung mismong si CJ Sereno ang magtatanong at hindi ang kanyang mga abogado.
“Lahat tayo may karapatan na tumayo sa ating katauhan ang ating mga abogado, kung kunwari ang respondent ay Commissioner ng Commission on Audit, ibig bang sabihin siya lang ang puwedeng magtanong eh kung hindi siya abogado medyo dehado naman po siya, syempre si CJ Sereno abogado po yan, lahat kaming mga abogado naiintindihan namin na hindi dapat kami umabugado para sa aming mga sarili, mas mainam po na meron kaming ibang abogado na haharap para sa amin. Maituturing naman siguro na rasonable ang request namin na makapag-cross examine dahil after all ang hanap naman natin dito ay katotohanan, ang mahalaga ay makapag-cross examine kahit sino po ang mag-cross examine.” Ani Cruz
Nagpahayag ng pag-asa si Cruz na maibabasura rin sa kalaunan ang impeachment case laban kay CJ Sereno.
Sa kabila ito ng sinasabing nakatakdang pagtestigo ng ilang mahistrado ng Korte Suprema laban kay CJ Sereno.
Ayon kay Cruz, malaya naman ang sinuman na gustong tumestigo laban kay Sereno subalit naniniwala siya na anuman ang mga nagawa o hindi ginawa ni Sereno sa Korte Suprema ay napag-usapan na at napagdebatehan sa kanilang mga sesyon kaya’t hindi ito impeachable.
“Ang Korte Suprema may kasarinlan yan, ang mga mahistrado parang magkakapatid yan, kung meron silang hindi pagkakaintindihan meron po kasi tayong prinsipyo na tinatawag na separation of powers, lahat ng sangay sa pamahalaan may kanya-kanyang kasarinlan, maigi sana yung mga internal matters na yan ay sila na lang na magkakapatid ang mag-ayos, nag-uusap naman po sila, napagdedebatehan nila yan, nadidiskusyon at nareresolba din po, hindi naman po siguro kailangan na mangapit-bahay pa para maayos ang hindi nila pagkakaintindihan, lahat ng mahistrado ay marurunong, may integrity at lahat yan ay pinapakinggan ang isa’t isa. Itong mga bagay na ito ay puwedeng maayos nilang magkakapatid na mahistrado.” Pahayag ni Cruz
Gadon’s camp
Bukas naman si Atty. Larry Gadon na ma-cross examine siya o makumpronta kapag dininig na ng House Committee on Justice ang inihain niyang impeachment complaint laban kay Supreme Court Chief Justice Maria Lourdes Sereno.
Gayunman, iginiit ni Gadon na kailangang sumunod si Sereno sa panuntunan ng komite na tanging ang inirereklamo lamang o si Sereno mismo ang dapat mag-cross examine sa kanya at hindi ang kanyang mga abogado.
Nagpahayag ng pag-asa si Gadon na sa lalong madaling panahon ay maisasalang na sa pagdinig ng komite ang impeachment complaint.
Nakapaghain na aniya siya ng sagot sa naging kasagutan ni Sereno sa inihain niyang impeachment complaint at mga tatlong araw lamang ang ibibigay sa Chief Justice para makapagsumite ng isa pang kontra sagot o rejoinder.
“Okay lang naman sa akin kung yan ay naaayon sa rules ng House Justice Committee, yung nga lang under the rules puwede siyang mag-cross examine pero as a resource person, hindi papayagan na ang mga abogado niya ang magtatanong, kahit ako din kapag ako ang nag-cross examine ako lang ang puwedeng magtanong hindi ang aking prosecutors.” Pahayag ni Gadon
(Ratsada Balita / BTL Interview)
