Sinalakay ng mga operatiba ng NBI o National Bureau of Investigation ang isang bahay sa Sampaloc, Maynila.
Ito’y makaraang makarating sa mga awtoridad ang impormasyon na may ilang crate sa loob ng bahay na inabandona ng dalawang Taiwanese national na umuupa rito.
Partikular na sinuyod ng mga operatiba ng NBI ang unit D townhouse na matatagpuan sa kalye Maceda sa Barangay 501 Zone 49.
Ayon sa kapitan ng barangay na si Nicanor Padios, halos kapareho aniya ang mga nakitang crate sa bahay sa nakitang crate nang salakayin ng Bureau of Customs ang isang warehouse sa Valenzuela City.
Magugunitang ang tinutukoy na warehouse ay ang lugar kung saan natagpuan ang mahigit 6 na Bilyong Pisong halaga ng shabu mula China na nakalusot sa Customs.
