Iniharap ni Philippine National Police (PNP) Chief Director General Ronald Dela Rosa sa Kampo Krame ang nasakoteng Iraqi bomber ng pulisya sa Angeles, Pampanga noong Lunes, Enero 22.
Kinilala ang suspek na si Taha Mohamed Al-Jabouri na umaming miyembro ng terrorist group na Hamas.
Ayon kay Dela Rosa, si Al-Jabouri ay isang chemist at eksperto sa paggawa ng bomba na dumating aniya sa bansa noong Agosto sa kasagsagan ng Marawi Siege at ASEAN Summit.
Dagdag ni Dela Rosa, nadakip ang dayuhan noong Enero 20 matapos silang makatanggap ng tip kaugnay ng presensya ng isang kahina-hinalang dayuhan sa Angeles na tumugma sa una nang itinimbre ng Iraqi embassy.
Ikinatwiran naman umano ni Al-Jabouri na nasa bansa ito para bisitahin lang ang isang Chinese business group.
