Idineklara ng House Committee on Justice na sapat ang mga alegasyong nakapaloob sa impeachment complaint laban kay Supreme Court Chief Justice Maria Lourdes Sereno.
Kabilang sa mga grounds o alegasyon sa isang impeachment complaint ay culpable violation of the constitution, corruption, betrayal of public trust, treason at iba pa.
Dalawampu’t limang (25) miyembro ng komite ang nagsabing mayroong sufficiency of ground sa reklamo samantalang dalawa lamang ang tumutol.
Una rito, idineklara na ng komite ang impeachment complaint na sufficient in form and substance.
PAKINGGAN: Bahagi ng pahayag ni House Justice Committee Chairman Rey Umali
Nag-ugat ang impeachment complaint laban kay Sereno dahil sa umano’y ibat-ibang klaseng paglabag partikular ang hindi pagbabayad ng buwis at ang hindi pagdedeklara ng tamang Statement of Assets, Liabilities and Net Worth o SALN hinggil sa kanyang tunay na kinita noong magsilbing abogado ng Philippine International Air Terminal Company o PIATCO.
Kaugnay nito, ipinahayag naman ng kampo ni Chief Justice Sereno na hindi ito dadalo sa anumang hearing na isasagawa ng Kamara kaugnay sa impeachment laban sa kanya.
Ayon kay Atty. Josa Deinla, isa sa mga legal counsel ni Sereno, mas pagtutuunan ng pansin ng Punong Mahistrado ang kanyang tungkulin lalo’t maraming kaso ang dapat tutukan ng Korte Suprema.
Ngunit iginiit ni Deinla na mariin pa ring ikikokonsidera ng Chief Justice na i-cross examine ng kanyang abogado ang mga testigo na kinabibilangan ng anim na mahistrado.
(Ulat ni Jill Resontoc)