Mawawalan ng suplay ng kuryente ngayong araw ang ilang bahagi ng Maynila, Pasay at Cavite.
Batay sa abiso ng Manila Electric Company o Meralco, magkakaroon ng ‘power interruption’ sa bahagi ng Malate mula alas-11:30 ng gabi hanggang alas-5:30 bukas ng umaga dahil sa “installation” nila ng pasilidad sa lugar.
Mawawalan naman ng kuryente ang ilang establisyemento sa Pasay City mula alas-10:00 ng gabi hanggang alas-6:00 bukas ng umaga dahil sa maintenance works ng Meralco sa Central Business Park.
Sa Cavite naman, tinamaan ng power interruption ang barangay Molino 3 at 7 sa Bacoor City kaninang alas-9:00 ng umaga na tatagal hanggang mamayang alas-2:00 ng hapon.
Habang mawawalan din ng kuryente ang bahagi ng barangay Salitran 1 sa Dasmariñas City mamayang alas-11:00 ng gabi hanggang bukas ng alas-4:00 ng umaga dahil sa paglilipat ng pasilidad ng Meralco na naapektuhan ng itinatayong pedestrian overpass sa Aguinaldo Highway.
—-
