Kumbinsido ang Department of Science and Technology (DOST) na sagot sa masikip na daloy ng trapiko sa Metro Manila ang hybrid road train na dinevelop ng DOST.
Ayon kay DOST Secretary Mario Montejo, dito lamang sa Pilipinas makikita ang hybrid road train.
Mukha lamang aniya itong train dahil mga bus ito na pinagdugtong-dugtong, pero hindi sa riles dumaraan kundi sa kalsada.
Sinabi ni Montejo na kayang isakay ng hybrid road train ang nasa 1.5 million kada araw na pareho rin ng bilang ng kayang isakay ng mga mass transit system tulad ng MRT at LRT.
“Itong road train na ito ay rubber tire po, tatawagin nilang bus na magkadikit pero powered by motors, the number of passengers that they can handle po is comparable sa other mass transit system, ang halaga niya ay malayo po ang kababaan sa current mass transit system natin.”
“Ito po ay isang alternative mass transit system, na sa tingin namin ay very cost effective at kasing efficient po ng the normal na tinatanggap kung ilang pasahero po ang maha-handle, since very cost effective siya tingin namin ay hindi niya kailangan ng subsidy.” Ani Montejo.
Sakaling maaprubahan na ang lahat para sa hybrid road train, aabutin ng 2 taon ang pagbuo nito.
Sinabi ni Montejo na bukod sa environment friendly ang hybrid road train, lokal ang lahat ng gagamiting materyales kaya’t magaan lamang ang maintenance.
“Sa administrasyon po ngayon ang nag-isip, nanaginip, naghanap ng solusyon at ginawa po sa administrasyon na ito, it took us more than 2 years ‘yung pag-develop at testing, so mga 3 years inabot at 2 years pa bago maging totoo.” Pahayag ni Montejo.
By Len Aguirre | Kasangga Mo Ang Langit
