Nagpasiya ang House Committee on Appropriations na huwag nang ipa-cite for contempt si Budget Secretary Benjamin Diokno.
Ito ay sa kabila ng patuloy na pang-iisnab ni Diokno sa pagdinig ng komite hingil sa umano’y anomalya at mga isiningit na pork sa 2019 national budget.
Ayon kay House Committee on Appropriations Chairman, Cong. Rolando Andaya, hindi na nila ipina-cite for contempt si Diokno dahil baka aniya kaawaan pa ang kalihim kung itutuloy ito.
Sinabi ni Andaya na nagpapakita lamang ng karuwagan si Diokno sa patuloy nitong hindi pagdalo sa House inquiry kahit pa pinadalhan na ito ng subpoena.
Aniya, kung wala talagang itinatago si Diokno, nakahanda dapat itong humarap sa Kamara.
Una nang inakusahan ni Andaya si Diokno ng pag-aalok ng apatnapung bilyong piso sa lahat ng mga kongresista para itigil na ginagawa nilang pag-ungkat sa 2019 national budget.
