Pinag-aaralan na ng pamahalaan ang planong pagbabalik ng summer break sa mga paaralan sa bansa tuwing buwan ng Marso at Abril.
Ayon kay Pangulong Ferdinand “Bongbong” Marcos Jr., kanila nang hinihimay ang mungkahi ng ilang mambabatas dahil tapos na ang mahigpit na restriksiyon bunsod ng pandemya at marami nang mag-aaral ang nagbalik sa in-person classes.
Bukod pa rito, sinabi ni PBBM na binabalanse na rin nila ang lagay ng panahon dahil tuwing Hunyo at Hulyo nararanasan ang mga pag-ulan dahilan ng kanselasyon ng klase ng mga mag-aaral.
Una nang inihayag ng Department of Education na wala sa kanilang plano na ibalik sa dating petsa, ang bakasyon ng mga estudyante.
Samantala, binigyang-diin naman ng pangulo na kanilang ilalabas sa lalong madaling panahon ang magiging desisyon kaugnay sa nasabing usapin.
Matatandaan na ang summer break sa mga pampublikong paaralan ay inilipat sa iba’t ibang buwan sa nakalipas na tatlong taon, bunsod ng pandemya kung saan, ang bakasyon ng school year 2020-2021 ay inilagay sa buwan ng oktubre; at ang school year 2021-2022 ay inilagay naman sa buwan ng setyembre; habang ang school year 2022-2023, ay inilagay sa buwan ng Agosto.
