Halos 280 Pulis, ang sinibak sa kanilang serbisyo sa ilalim ng Administrasyong Marcos.
Ito ang inihayag ni Philippine National Police (PNP) chief Gen. Rodolfo Azurin Jr., matapos mahatulang Guilty ang ilan sakanilang mga tauhan dahil sa paglabag sa batas.
Sa datos ng ahensya, ang 279 na Pulis na inalis ay kabilang sa 1,211 na kinastigo mula July 1 hanggang December 7 ngayong taon kung saan, 79 dito ang pinatawan ng parusa at na-demote; 472 ang sinuspinde; at 381 naman ang hindi pinasweldo at hindi nabigyan ng mga pribilehiyo.
Ayon kay Azurin, hindi nila kukunsintihin ang mga tiwali at baluktot na gawain ng mga Pulis kaya’t magpapatuloy ang kanilang pagdidisiplina sa kanilang mga tauhan na nalilihis sa pagbibigay ng serbisyo sa taumbayan.
Iginiit ng Opisyal, na nagpapatuloy ang internal cleansing sa PNP, sa tulong narin ng Internal Affairs Service at ang Integrity Monitoring and Enforcement Group.
Sinabi ni Azurin na mahalagang masiguro ang seguridad at kaligtasan ng mga Pilipino para mapanatili ang tiwala ng publiko sa ahensya.
