Nanawagan ang grupong Filipino Nurses United (FNU) sa pamahalaan na magkaroon ng transparency at accountability sa gagawing vaccination rollout kontra COVID-19.
Ito ang naging panawagan ng FNU matapos na magkaroon ng agam-agam ang ilang mga health workers matapos na pumutok ang usapin na nagkaroon ng hindi awtorisadong pagpapabakuna sa mga miyembro ng militar at ilang paglabag ng mga opisyal ng pamahalaan sa umiiral na health protocols laban sa pagkalat ng virus.
Ayon sa FNU, sa ngayon, ang kailangan ng taong bayan ay ang pagsisiguro ng pamahalaan hinggil libre, ligtas, at epektibong bakuna kontra COVID-19 na gagamitin sa vaccination program ng bansa.
Bukod pa rito, ipinabatid ng FNU na kailangan ng kanilang hanay ng pamahalaan na may suporta sa kanilang sektor lalo’t sila ang maituturing na frontliner na lumalaban sa banta ng virus.
Sa huli, binigyan diin pa ng FNU na dapat i-regulate ng pamahalaan ang bakuna maging ang mahigpit na pag-monitor sa adverse reactions nito.