Hinamon ng minorya ng Kamara si Bureau of Customs (BOC) Commissioner Nicanor Faeldon na pangalanan ang mga kongresistang humihingi ng mga pabor sa kanya.
Ito ang buwelta ni House Minority Floor Leader Danilo Suarez matapos sabihin ni Faeldon na ginigipit siya sa usapin kaugnay sa pagkakapuslit ng malaking halaga ng shabu sa bansa dahil sa mga hindi napagbibigyang pabor ng ilang mga kongresista.
Ayon kay Suarez dapat ay pangalanan ni Faeldon ang kanyang mga tinukoy na kongresista para masampahan ng kaukulang kaso.
Kasabay nito, hiniling din ni Suarez ang pagbibitiw sa tungkulin o pagli-leave of absence ni Faeldon dahil sa kinahaharap na kontrobersiya ng BOC.
