Inamin ni Pangulong Rodrigo Duterte na talagang minali niya ang account number na sinabi niyang pagmamay-ari ni Senador Antonio Trillanes IV sa Singapore.
Matatandaang kahapon ay personal na pumunta sa DBS o Development Bank of Singapore si Trillanes upang patunayan na wala siyang account sa naturang bangko tulad ng naging pagbubunyag ng Pangulo.
Ayon sa Pangulo, wala talaga ang account number na una na niyang ibunyag dahil produkto lamang ito ng kanyang imahinasyon.
Aniya, hawak niya ang tunay na mga bank account ng senador na magpapatunay sa tagong yaman ni Trillanes.
“Trillanes says”
Lumalabas na sinungaling nga si Pangulong Rodrigo Duterte.
Ito ang reaksyon ni Senador Antonio Trillanes IV matapos na aminin ng Pangulo na produkto lamang ng kanyang imahinasyon ang bank account na sinasabi niyang pag-aari ng senador.
Matatandaang napatunayan ni Trillanes na walang siyang account sa DBS o Development Bank of Singapore matapos niyang personal na iberipika ito.
Ayon kay Senador Antonio Trillanes, tulad noong eleksyon, ang Pangulo ay nanalo lamang dahil sa propaganda at kasinungalingan.
Aniya sana ay maliwanagan na ang mga Pilipino sa panloloko ni Pangulong Duterte.
—-
