Pag – aaralan muna umano ni Justice Secretary Vitaliano Aguirre ang rekomendasyon ng Senado sa NBI o National bureau Of Investigation na i – lifestyle check ang anak at manugang ni Pangulong Rodrigo Duterte na sina Davao City Mayor Paolo at atty. Mans Carpio.
Ayon kay Aguirre, kailangang tignan muna ang naging basehan ng nasabing kautusan ng Senate Blue Ribbon Committee lalo na’t draft pa lamang ito.
Binigyang diin ni Aguirre na inirekomenda ang nasabing kautusan kahit wala namang ebidensya na nag – uugnay kina Paulo at Carpio sa smuggling ng shabu at iba pang kontrabando.
Matatandaang iniugnay ng customs broker na si Mark Taguba sina Paolo at Carpio sa umano’y tinatawag na Davao Group na idinawit naman sa pagkakalusot na anim punto apat na bilyong Pisong halaga ng shabu shipment mula sa China na kalaunan ay kanyang binawi at sinabing ito ay batay sa hearsay lamang.
