Pinagpapaliwanag ng isang mambabatas si Health Secretary Paulyn Ubial kaugnay sa pagtaas ng bilang ng mga namamatay sa evacuation center sa Marawi City.
Patutsada ni Eastern Samar Representative Ben Evardone, tila aniya natutulog sa trabaho ang kalihim dahil sa patuloy na pagdagdag ng bilang ng mga nasasawing bakwit sanhi ng iba’t ibang karamdaman.
Giit ni Evardone, dapat nagkakaroon ng ugnayan ang DOH at DSWD o Department of Social Welfare and Development para mapigilan ang pagkalat ng mga sakit sa evacuation center.
Kasabay nito, pinatitiyak rin ng mambabatas sa DSWD ang sapat at organisadong pamamahagi ng mga relief goods sa mga evacuees.
DOH nahihirapan i-monitor ang kalagayan ng mga bakwit mula sa Marawi
Inamin ng DOH o Department of Health na nahihirapan silang i-monitor ang kalagayan ng mga bakwit mula sa Marawi City lalo na ang mga nakikitira sa bahay ng kamag-anak o kaibigan at wala sa evacuation centers.
Ayon kay Health Secretary Paulyn Jean Ubial, 20% ng apatnapung nasawing evacuees ay bunga ng pag-inom ng maruming tubig.
Sinabi ni Ubial na napag-alaman nila na sa Lake Lanao kumukuha ng maiinom na tubig ang mga evacuees.
Namigay na anya sila ng aquatap o disinfecting solution sa mga evacuees subalit hindi sila sigurado kung ginagamit nila ito para linisin ang iinuming tubig.
- Krista De Dios / Len Aguirre | Story from Jill Resontoc
