Hindi pa rin kumbinsido si Sen. Risa Hontiveros sa kakayahan at katapatan ng ikatlong TelCo sa Pilipinas na DITO Telecommunity Corporation pagdating sa usaping pangseguridad
Dahil diyan, hiniling ni Sen. Risa Hontiveros sa National Security Council (NSC) na magsagawa agad ng security audit sa DITO Telecommunity Corp. bago magsimula ang commercial rollout nito sa Marso a-8.
Ayon pa sa Senadora, dapat ding kumuha ang NSC ng isang independent security auditor na katulad sa kung paano isinagawa ng National Telecommunications Commission (NTC) ang technical audit nito sa Dito.
Hindi pa nareresolba ang mga pangamba natin sa Dito telco. Habang patuloy ang pambu-bully ng Tsina sa West Philippine Sea sa gitna ng pandemya, nag-roll out naman tayo ng red carpet para sa isang kompanyang direktang nagre-report sa gobyerno ng Tsina. This is worrying. NSC should execute a security audit for Dito. It’s the least it can do,” pahayag ni Hontiveros.
Pebrero a-22, Lunes, nang pumasa sa unang technical audit ang 3rd TelCo player ng bansa sa National Telecommunications Commission o NTC.
Kung nagkaroon ng technical audit, dapat may security audit din. Knowing that Dito is safe from China’s incursions is as vital as knowing Dito’s technical capabilities,” ani Hontiveros.
Iginiit ni Hontiveros na ang ChinaTel na may 40% stake sa DITO ay 100% na pag-aari ng Chinese state.
Nauna na ring kinuwestiyon ni Hontiveros ang pagkakaloob ng prangkisa sa Dito gayong walang maaasahang cyberdefense ang bansa.
Sa Senate hearing sa prangkisa ng DITO noong nakaraang Disyembre, inamin ng NSC na wala itong cyberdefense doctrine kontra sa iba’t ibang cyberattacks.
Tinukoy rin ng senadora ang China-based hacking group na may code name na “Naikon”, na nag-eespiya umano sa mga gobyerno sa Asia Pacific, kabilang ang Filipinas.
Nakababahala na wala palang konkretong istratehiya ang NSC sa usapin ng cybersecurity. China can easily take advantage of this. Sinasakop na nila ang ating karagatan ng harap-harapan. Nothing is stopping it from doing the same to our data,” sabi pa ng senadora.
Not unless China finally respects and honors that our territories in the WPS are ours and ours alone, every other business negotiation it has in our country will remain suspicious. Panindigan natin ang laban na ito. Kung hindi, ang Pilipino lang ang talo,” dagdag ni Hontiveros.
