All systems go na ang Department of Education sa pagbabalik eskwela ng milyun-milyong mag-aaral, simula bukas.
Ayon kay Education Undersecretary Jess Mateo, noon pang unang bahagi ng taon sila naglatag ng preparasyon kaya’t kampante silang magiging maayos ang muling pagbubukas ng klase.
Aminado naman si Mateo na bagaman wala siyang hawak na datos ay nadagdagan ang bilang ng mga estudyante at guro sa mga pampublikong eskwelahan habang bumaba rin ang teacher-pupil ratio.
Kaunti lamang din aniya ang mga private school na nagtaas ng matrikula dahil sa epekto ng dagdag sahod ng mga guro sa pampublikong paaralan.