Tinawag na karma ng VACC o Volunteers Against Crime and Corruption ang nangyaring pag-aresto kay Senador Leila de Lima dahil sa kinakaharap nitong drug-related charges.
Sa panayam ng programang “Ratsada Balita”, sinabi ni VACC Chairman Dante Jimenez na kinarma si De Lima bunsod ng ginawa nitong pagpapakulong noon sa tatlong (3) senador na kinabibilangan nina Juan Ponce Enrile, Jinggoy Estrada at Bong Revilla Jr.
Bukod pa ito kina dating Pangulong Gloria Macapagal Arroyo at dating Supreme Court Chief Justice Renato Corona.
“Kami ay natutuwa merong isang judge dahil nakita niya siguro talaga na may probable cause, importante kasi sa mga judge ang probable cause, yung guilt beyond reasonable doubt would be tested kapag nasa trial na, in a way sinasabi nga na karma dahil sa mga previous na ginawa niya sa 3 senators, kay former president Arroyo, kay CJ Corona, tingin ko karma ito sa kanya.” Ani Jimenez
Pinuna rin ni Jimenez ang mistulang pagbibigay ng special treatment kay De Lima dahil dinala ito sa PNP Custodial Center.
PAKINGGAN: Bahagi ng pahayag ni VACC Chairman Dante Jimenez
By Meann Tanbio | Ratsada Balita (Interview)
