Bigo pang makalusot sa makapangyarihang Commission on Appointments (CA) si Agrarian Reform Secretary John Castriciones.
Ito ay matapos pagpasiyahan ni Senadora Grace Poe, Chairperson ng CA Committee on Agrarian Reform na suspendihin ang pagdinig sa kumpirmasyon ni Castriciones dahil sa dami pa ng mga nais magtanong dito.
Sa pagharap ni Akbayan Representative Tom Villarin, isa sa oppositor sa kumpirmasyon ni Castriciones, sinabi nito na nabigo ang kalihim na agad aksyunan ang mga naka-pending na usaping legal ng mga magsasakang benepisyaryo ng Comprehensive Agrarian Reform Program.
Iginiit ni Villarin, kulang sa kuwalipikasyon at wala ring track record si Castriciones para pamunuan ang Department of Agrarian Reform (DAR).
Binanggit rin ni Villarin ang pagiging balat sibuyas aniya ni Castriciones matapos naman sampahang ng kasong libelo ang isang reporter noong Undersecretary pa ito ng Department of Interior and Local Government (DILG).
Samantala, pag-aaralan pa ni Poe kung magtatakda muli ng panibagong confirmation hearing para kay Castriciones bago ang mag-break ang session ng Kongreso sa susunod na linggo.
Empedrad, Bautista, Tolentino at iba lusot naman sa Commission on Appointments
Nakalusot naman sa makapangyarihang Commission on Appointments ang 19 na Ad Interim Appointments at nominations ng mga senior officers ng Armed Forces of the Philippines (AFP).
Kabilang dito si bagong talagang Philippine Navy Chief Rear Admiral Robert Empedrad na pumalit kay Vice Admiral Ronald Joseph Mercado matapos naman masibak dahil sa isyu sa frigate deal.
Bukod kay Empedrad, mabilis ding nakalusot sa Committee on National Defense ng CA, sina Quezon City Mayor Herbert Bautista at Presidential Adviser for Political Affairs Francis Tolentino na na-promote bilang Brigadier General at Davao Oriental Rep. Joel Mayo Almario sa ranggong Colonel bilang mga AFP Reservist.
Gayundin ang kumpirmasyon sa nominasyon ng nasa 17 iba pang mga opisyal at reservist ng AFP.
Samantala, kinumpirma rin ng CA ang appointment ni Roland Café Pondoc bilang Commissioner ng Commission on Audit na magtatapos ang termino hanggang Pebrero 2 ng taong 2025.
(Ulat ni Cely Ortega-Bueno)
