Pinarerepaso ni Congressman Rufus Rodriguez sa Department of Justice (DOJ) ang pagbasura sa kasong kriminal laban sa dating dalawang PMA officials kaugnay sa pagkamatay ni cadet fourth class Darwin Dormitorio.
Sinabi ni Rodriguez na dapat baligtarin ni Justice Secretary Menardo Guevarra ang desisyon ng mga prosecutor sa Baguio City dahil malinaw sa anti hazing law na dapat na managot ang mga opisyal na nagpabaya kayat natuloy ang hazing activities.
Partikular na tinukoy ni Rodriguez sina PMA Superintendent Lt. General Ronnie Evangelista at dating commandant ng Cadet Corp. na si Brigadier General Vicente Bacarro na kapwa inabsuwelto dahil sa kakulangan ng probable cause.
Ayon kay Rodriguez natukoy ng NBI na hindi kumilos ang top PMA officials para maiwasan ang pangma maltrato kay Dormitorio sa kabila ng reklamong natanggap nila.
