May naka-amba na namang dagdag bawas sa presyo ng mga produktong petrolyo sa susunod na linggo o sa huling linggo ng taong 2017.
Batay sa source ng DWIZ sa industriya ng langis, nasa 10 hanggang 20 Sentimos ang paggalaw sa presyo ng mga produktong petrolyo.
Gayunman, mas dapat paghandaan ang mas mataas na presyo ng langis pagpasok ng Enero a-primero ng bagong taong 2018.
Ito’y dahil sa awtomatiko nang epektibo ang dagdag buwis na ipapataw sa mga produktong petrolyo sanhi ng ipinasang TRAIN o Tax Reform Acceleration and Inclusion Act.
Sakaling maipatupad na ang TRAIN Law, 2 Piso at 50 Sentimos ang awtomatikong dagdag sa presyo ng kada litro ng diesel at auto LPG.
Dalawang piso at animnapu’t limang sentimos naman ang awtomatikong dagdag presyo sa gasolina, tatlong piso naman sa kerosene habang piso ang awtomatikong dagdag sa presyo ng LPG o cooking gas.
