Posibleng abutin pa ng ilang buwan ang clinical trial ng mga herbal medicine na lagundi at tawa-tawa para sa coronavirus disease 2019 (COVID-19).
Ayon kay Department of Science and Technology – Philippine Council for Health Research and Development Executive Director Dr. Jaime Montoya, kinakailangan pang sumalang ng mga ito sa dalawang phase ng pag-aaral.
Unang phase aniya ang pagtukoy sa kinakailangang dose at ikalawa naman ang pag-check sa pagiging epektibo nito.
Sinabi ni Montoya, natapos na ang Phase 1 ng clinical study ng lagundi habang tatagal naman ng dalawa hanggang tatlong buwan ang Phase 2 depende kung gaano kabilis makakakuha ng mga participants.
Samantala, nagsimula na rin aniya ang Phase 1 ng clinical trial ng tawa-tawa bilang supplemental na gamot kontra COVID-19 at maaari na ring magsimula ang Phase 2 nito sa loob ng dalawang linggo.
