Sinalag ng kampo ni Supreme Court Chief Justice Maria Lourdes Sereno ang anito’y paghahahanap talaga ng butas sa kinita ng Punong Mahistrado sa pagkakapanalo sa kaso ng Philippine International Air Terminals Company o Piatco Incorporated.
Iginiit ni Atty. Josa Deinla, isa sa mga abogado ni Sereno na kasinungalingan ang alegasyong hindi nagbayad ng tamang buwis si Sereno sa 30 million pesos na kinita nito sa Piatco case.
Sinabi ni Deinla na ang nasabing halaga ay nanggaling mismo sa gobyerno kaya’t malabong maitago ito ni Sereno at hindi magbayad ng tamang buwis para rito.
Lahat aniya ng buwis mula sa ibinayad kay Sereno ng gobyerno kapalit ng serbisyo nito ay pawang bayad na sa Bureau of Internal Revenue o BIR.
Una nang inihayag ni Sereno na mismong ang Office of the Solicitor General o OSG ang nagbayad ng kanyang buwis sa BIR dahil gobyerno ang kliyente niya sa Piatco case.
—-
