SPORTS

Nagwagi ang Brooklyn Nets matapos lumamang ng tatlong puntos kontra Milwaukee Bucks sa nba sa iskor na 126-123.

Pinadapa ng Nets ang Bucks sa ikalawa at ikatlong quarter pero nakuhang itabla ng Bucks ang iskor sa huling quarter.

Nanguna sa koponan si Kyrie Irving na nakapagtala ng 38 points, 5 rebounds at 5 assists habang nasayang naman ang 30 points ni Bobby Portis, 29 points ni Giannis Antetokounmpo at 25 points ni Khris Middleton ng Bucks.

Abangan naman sa Martes, Marso a-1 ang susunod na laban ng Nets kung saan, kanilang makakaharap sa ring ang Toronto Raptors alas-8:30 ng umaga. —sa panulat ni Angelica Doctolero

Tinambakan ng 27 puntos ng Atlanta Hawks ang Toronto Raptors sa NBA sa iskor na 127-100.

Nilampaso ng Hawks ang Raptors sa 2nd at 3rd quarter kung saan, nanguna sa koponan si Trae young na nagpakawala ng 41 points, 4 rebounds at 4 assists habang nasayang naman ang naitalang 24 points, 3 rebounds at 9 assists ni Fred Vanvleet ng Raptors.

Abangan naman sa Miyerkules, March 2, 2022 ang susunod na laro ng Hawks kung saan, kanilang makakalaban ang Boston Celtics, alas-8:30 ng umaga. —sa panulat ni Angelica Doctolero

Ginulat ng Filipino Boxer na si Vincent Astrolabio ang dating two-division world champion na Si Guillermo Rigondeaux nang masungkit nito ang unanimous decision sa kanilang bantamweight contest sa Dubai Marina sa United Arab Emirates.

Napuruhan ni Astrolabio mula sa mga pinakawalan nitong kanang suntok ang 41 anyos na si Rigondaeux, na kagagaling lamang sa split decision loss kontra WBA World Bantamweight Champion na si John Riel Casimero noong Agosto.

Tulad ng inaasahan, nagpakitang gilas si Rigondeaux pero hindi ito umubra sa pilipinong boksingero.

Matapos ang 10 rounds ng bakbakan, nakakuha ng iskor na 95-94 si astrolabio na kasalukuyang may rekord na 17-3 at 12 knockouts.  -sa panulat ni Airiam Sancho 

Naka-focus na ang pambato ng Pilipinas sa 2023 FIBA World Cup Asian qualifiers na Gilas Pilipinas sa kanilang laban kontra New Zealand Squad mamayang alas-siyete ng gabi sa Smart Arneta.

Nabatid kasing tinaguriang Tall Blacks ang koponan ng New Zealand kung saan kasalukuyang nasa ika-27 ito sa world rankings sa larangan ng basketball.

Pero kumpiyansa ang Gilas Pilipinas na matatalo nila ang kalabang bansa sa pangunguna nila Dwight Ramos, Thirdy Ravena at Roger Pogoy laban sa star player ng New Zealand na si Tom Vodanovic.

Sa ngayon, parehong may tig-dalawang panalo ang Gilas at New Zealand matapos parehong tambakan ang koponan ng India.

Matatandaang taong 2016 nang huling magkaharap ang dalawang team kung saan tinalo nito ang Pilipinas. —sa panulat ni Abie Aliño-Angeles

Nangunguna pa rin ang RSG Philippines, isang esports organization sa Mobile Legends: bang bang season 9 standings.

Ayon sa ilang miyembro ng grupo na si Arvie Calderon at Eman Sangco, naging gigil sila sa paglalaro upang mapanatili ang good standing at chemistry ng kanilang team.

Susi rin anila ang teamwork at disiplina upang manatiling matatag sa laban.

Papanatalihin ng RSG Philippines ang magandang standing hanggang makalaban ang TNC pro team sa Marso a-4.—sa panulat ni Abby Malanday

Pinangalanan na ng National E-Sports Organiztion ang dalawang team na magrerepresenta sa bansa sa free fire E-Sports event sa papalapit na South East Asian Games.

Ito ang Rise Nation at God Ascends na  parehong nakakuha ng unang pwesto sa nasabing local esports at nakakuha ng 88 points at napataob ang 1 teams sa 6 games sa 1-day tournament.

Ang Free Fire E-Sports o Garena Free Fire ay isang Mobile Battle Royale Game.

Samantala, ito rin ang unang pagkakataon na nagsagawa ang sibol ng mga qualifier para sa free fire. —sa panulat ni Airiam Sancho

Tiniyak ng Philippine Olympic Committee na makakalaro sa nalalapit na 31st Southeast Asian (SEA) Games si Pinoy Olympian at pole-vaulter EJ na Obienana gaganapin sa Hanoi, Vietnam.

Ito ay matapos ihayag nI Philippine Athletics Track and Field Association (PATAFA) president Philip Ella Juico na hindi kabilang si Obiena sa kanilang isasabak sa nasabing torneyo.

Pero ayon kay POC president Abraham Tolentino, tuloy ang kanilang pag-endorso kay Obiena para i-representa ang bansa sa Pole Vault competition.

Sa ngayon, tuloy ang ginagawang paglahok ng Pinoy Olympian sa iba’t ibang international competitions bilang paghahanda sa Vietnam SEA Games. —sa panulat ni Abie Aliño-Angeles

Wagi ang Gilas Pilipinas kontra india sa ginaganap na FIBA World Cup Asian Qualifiers sa Smart Araneta Coliseum sa Quezon City.

Pinangunahan nina Thirdy Revena at Dwight Ramos ang laro upang tambakan ang india sa score na 88-64 panalo.

Pumuntos si Ramos ng 17 points, four rebounds, at three assists, habang si ravena naman ay nagpasok ng 15 points kasama na ang tatlong three pointers.

Sa ngayon hawak na ng gilas ang 2-0 record matapos mag-default ang South Korean Team dahil nahawa sa COVID-19 ang ilang players.

Sa linggo makakalaban ng Pilipinas ang New Zealand na kapwa nating may tig-dalawang panalo na.  -sa panulat ni Abigail Malanday

Pinataob ng NorthPort ang Magnolia sa iskor na 103-101 sa nagpapatuloy na PBA Governor’s Cup.

Nagpakitang gilas naman ang NorthPort na si Jamel Artis na nakapagtala ng 42 points habang mayroong 19 points si Jamie Malonzo at 14 points ang nagawa ni Arwind Santos.

Ito na ang pangalawang sunod na panalo ng Batang Pier na mayroon ng dalawang panalo at limang talo.

Bagama’t kahit na kulang ang manlalaro ng North Port ay pinilit pa rin nilang makipagsabayan sa Magnolia.

Ikinatuwa naman ni NorthPort coach Pido Jarencio ang panalo nila kung saan nakita niya ang dedikasyon ng mga manlalaro para manalo.

Nagwagi sa NBA ang Los Angeles Clippers kontra Houston Rockets sa iskor na 142-111.

Tinapos ng Clippers ang game makaraang tambakan ang Rockets sa una hanggang ika-apat na quarter.

Nanguna sa koponan sina Marcus Morris na nagpakawala ng 27 points, 5 rebounds at 3 assists; Luke Kennard na nakapagtala naman ng 25 points at 3 assists.

Abangan naman bukas, Pebrero a-26 ang susunod na laro ng Clippers kung saan, kanilang makakalalaban ang Los Angeles Lakers alas-11 ng umaga, oras sa Pilipinas. —sa panulat ni Angelica Doctolero