SPORTS

Sinuspendi ng Professional Golfers’ Association (PGA)  ang 17 na golf players na lumahok sa Saudi Golf League – live golf event.

Ayon kay PGA tour commissioner Jay Monahan, paglabag sa kanilang tournament regulations ang pagsali sa ibang torneyo ng mga naturang golfers.

Nabatid na ilan sa mga ito sina Dustin Johnson, Phil Mickelson at Sergio Garcia.

Samantala, nanindigan naman na walang balak na umatras sa torneyo si Mickelson dahil sa kaniyang pinaghirapan ang pagiging lifetime eligibility ng PGA.

Buong tapang na hinamon sa boxing ring ni Filipino boxer John Riel Casimero si WBC, WBA at IBF World Bantamweight Champion Naoya Inoue.

Ito’y matapos pabagsakin ni Inoue si dating world boxing champ Nonito Donaire Jr. nito lamang Martes na ginanap sa Saitama, Japan.

Nabatid na nakatakda sanang lumaban si Casimero kay Inoue pero naudlot umano ito sa kasagsagan ng Covid-19 pandemic.

Samantala, tiniyak ni Casimero na makakaganti ang Pilipinas at muling masusungkit ang world title at karangalan ng bansa.

Inihayag ni MP Promotions Head Sean Gibbons na nais ng kampo ni People’s Champ Manny Pacquiao na magkaroon sila ng paghaharap sa ikalawang pagkakataon ni Floyd Mayweather Jr. ngayong taon.

Ito ay sa kabila ng pagreretiro ni Pacquiao noong nakaraang taon, bago sumalang sa presidential race, kung saan hindi ito pinalad.

Bagamatn mababatid na nagretiro na si Mayweather noong 2017 hawak ang perfect 50 wins 0 loses record, ay  patuloy lang siya sa mga exhibition fight kung saan malaking halaga ang kanyang kinikita.

Matatandaang nanalo si Mayweather sa unang paghaharap nilang dalawa noong 2015 sa binanasagang fight of the century

Humantong sa draw ang banggaan ng Philippine Azkals at Yemen sa third round qualifiers ng 2023 AFC Asian Cup sa Ulaanbaatar, Mongolia.

Kapwa bigong makasipa ng goal ang Azkals at Yemen sa pagsisimula ng kampanya sa Group B sa kanilang paghaharap sa MFF Football Center.

Sa kabila nito, parehas makakukuha pa rin ng puntos ang dalawang koponan sa nasabing round.

Sumikwat ng puntos ang Azkals sa laban sa unang sigwada sa Group B, pero ang kanilang tsansa na makapasok sa aktuwal na torneyo ay nakadepende sa resulta ng kanilang mga susunod na laban.

Batay sa format, ang nangungunang koponan sa bawat isa sa anim na grupo kasama ang limang pinakamahusay na runners-up ay papasok sa 2023 AFC Asian Cup sa June 16 hanggang July 23.

Sunod namang makakaharap ng Azkals ang host Mongolia sa Sabado.

Aminado ang Filipino Flash at dating World Boxing Champ na si Nonito Donaire na nagkamali siya sa ginawang strategy laban sa Unified Bantamweight champion na si Naoya Inoue.

 Matatandaang tinalo ni Inoue si Donaire matapos ma-knockout sa loob ng dalawang round ng kanilang rematch noong Martes ng gabi.

 Naagaw ni Inoue mula kay Donaire ang hawak nitong World Boxing  Council (WBC) title belt sa Saitama Super Arena na ginanap sa Japan.

Ayon kay Donaire, iniba umano niya ang kanyang strategy dahil nais niyang makipagsabayan ng banatan sa mas batang si Inoue.

 Sinabi pa ni Donaire na hindi niya pinakinggan ang patuloy na isinisigaw ng kaniyang corner na gumamit umano ng jab laban sa kaniyang kalaban.

 Sa kabila nito, pinasalamatan pa rin ni Donaire ang lahat ng mga sumuporta hanggang sa pagtatapos ng kaniyang laban sa boxing ring.

Umatras si American Professional Golfer, Tiger Woods sa paglalaro sa darating na US Open Golf Tournament.

Ayon kay Woods, wala siya sa kondisyon dahil sa kumikirot pa ang kaniyang bagong operang binti.

Magugunitang naaksidente ang American Golf Star noong Pebrero 2021 sa California kung saan nagtamo ng sugat sa kaniyang hita at iba’t-ibang bahagi ng katawan.

Samantala, huling sumabak ang 46 years old golfer sa torneo noong Mayo sa PGA championship kung saan umabot ito ng ikatlong round, ngunit nag-withdraw din ito sa ika-apat na round.

Priority ng SBP o Samahang Basketball ng Pilipinas na makuha ang serbisyo ni Filipino American Jordan Clarkson para sa 2023 FIBA World Cup.

Ipinabatid ni SBP Executive Director Sonny Barrios na nananatiling option nila si Clarkson para sa nasabing torneo.

Ayon pa kay Barrios, bahala na si Gilas Pilipinas Coach Chot Reyes kung sino ang uubrang isamang naturalized player.

Hindi naman tinukoy ni Barrios kung sinong naturalized player ang target nilang kunin pero mas matangkad na manlalaro ang nasa listahan nila.

Opisyal nang nagretiro ang Blackwater player na si Andre Paras matapos ang isang season sa PBA.

Ayon kay Paras, nakapagdesisyon na siya na agad na huminto sa PBA para makapagfocus sa kaniyang acting career.

Sinabi ni Paras na malaki ang kaniyang pasasalamat sa ibinigay na tiwala at pagkakataon ng Blackwater Franchise para makapaglaro sa liga.

Tinanggap naman ng Bossing Team Owner Dioceldo Sy ang retirement letter ni Andre Paras na anak ng PBA Legend na si Benjie Paras at kapatid ng International player na si Kobe Paras.

Muling nabigo si ‘The Filipino Flash’ Nonito Donaire na talunin ang Japanese champ na si Naoya Inoue.

Naganap ang laban kahapon sa Super Arena ng Saitama, Japan.

Ayon sa ulat, tumagal ng second round ang laban kung saan unang napabagsak ni Inoue si Donaire sa first round.

Nagpatuloy ang laban sa ikalawang round at dito na pinakawalan ng Japanese boxer ang solidong suntok dahilan para itigil na ng referee ang laban.

Dahil sa panalo, hawak na ng pambato ng Japan ang belt ng WBA at IBF.

Taong 2019 unang nagsagupa ang dalawa kung saan tinalo rin ni Inoue si Donaire.

Pumalo sa mahigit $2.7M o katumbas ng halos P150M ang rookie jersey ng pumanaw na NBA legend na si Kobe Bryant.

Sa ulat, kumubra ng 26 bids ang nasabing uniporme ni ‘black mamba’ mula sa scp auction kaya lumobo ito sa limpak limpak na presyo.

Ang nasabing jersey ay suot ni Kobe noong siya ay rookie pa lamang sa Los Angeles Lakers. Ginamit rin niya ito noong 1996-1997 season sa nba playoff series kalaban sina Karl Malone at John Stockton ng Utah Jazz.

Eksaktong Mayo 8 ng taong 1997 niya ito ginamit kung saan nanalo pa ito at nagsalpak ng 19 points sa loob ng 19-minutong paglalaro.

Bukod sa jersey, hawak rin ng scp auction ang bihirang pirmadong 1997 precious metal gems kobe na nabenta nila sa halagang $403k.