SPORTS

Muling namayagpag ang galing ng atletang Pilipino sa larangan ng tennis at pole vaulting.

Muling namayagpag si Filipino tennis sensation Alex Eala matapos niyang talunin si Maya Joint sa Round 2 ng Wimbledon sa score na 3-6, 6-2, 6-0.

Na-eliminate naman si Eala at ang ka-tandem niyang si Nicola Bartůňková ng Czech Republic sa doubles category ng naturang Grand Slam tournament.

Gayunman, aabante si Eala sa Round 3 ng Wimbledon singles bukas, kung saan makakalaban niya si world number 3 Iga Swiatek.

Samantala, nasungkit ni EJ Obiena ang gintong medalya matapos malampasan ang 5.75-meter mark sa Raiffeisen Open sa Eisenstadt, Austria.

Nabatid na naitala rin ni Obiena sa kanyang winning jump ang bagong stadium record sa naturang kompetisyon. | Sa panulat ni Anjo Riñon

Umabante na sa ikalawang round ng Wimbledon si Filipina tennis sensation Alex Eala matapos niyang talunin si Renata Zarazúa ng Mexico sa score na 6-1, 6-2.

Ito ang kauna-unahang Grand Slam win sa professional career ni Eala, at inaasahang makakalaban niya sa second round mamayang gabi, oras sa Pilipinas, si Maya Joint ng Australia, na tumalo naman kay dating world number 1 Serena Williams.

Bukod kay Eala, tatlo pang Southeast Asian players ang magpapatuloy sa Round 2 ng Wimbledon.

Tinalo ni Lanlana Tararudee ng Thailand si Lilli Tagger, habang nanaig ang kapwa Thai player na si Mananchaya Sawangkaew kontra Maja Chwalińska ng Poland.

Samantala, wagi rin si Janice Tjen ng Indonesia laban kay Filipino-Canadian Leylah Fernandez. | Sa panulat ni Anjo Riñon

Makalipas ang anim na taon sa Estados Unidos bilang isang NBA coach, balik-Pilipinas ang retiradong Gilas Pilipinas player na si “The Mighty Mouse” Jimmy Alapag upang maging head coach ng NLEX Road Warriors.

Ayon kay Alapag, ito na ang tamang panahon upang umuwi at ibahagi ang lahat ng natutunan niya bilang player development coach ng Sacramento Kings sa Pambansang Liga.

Bukod sa pagbabalik sa PBA, ibinunyag din ni coach Jimmy na inalok din siya ng Samahang Basketbol ng Pilipinas na maging isa sa mga coach ng Gilas Pilipinas.

Aminado rin si Alapag na may nag-alok ding ibang NBA teams upang kuhanin siyang player development coach o assistant coach, ngunit mas pinili niyang umuwi upang maging head coach sa isang koponan ng PBA.

Sisimulan ni Alapag ang career niya bilang head coach ng NLEX sa opening game ng PBA Governors’ Cup kontra Macau Giant Pandas, na magaganap sa Ynares Center sa Antipolo City sa Hulyo 10. | Sa panulat ni Anjo Riñon

Lumisan na ang NBA star na si Lebron James sa Los Angeles Lakers matapos ang walong season sa koponan.

Gayunman, bukas si James na maglaro sa iba pang NBA team, ngunit wala pa siyang koponan na sasalihan sa ngayon.

Sa pahayag ng Lakers, nagpasalamat ang team governor nito na si Jeanie Buss sa walong-taong pamamalagi ng basketball star, at itinuring itong “One of the Greatest Athletes in History.”

Bilang tugon, nagpasalamat din si James sa Lakers dahil binigyan anya siya ng pagkakataong mag-ambag sa kasaysayan at katanyagan ng naturang koponan. | Sa panulat ni Anjo Riñon

Nakatakdang muling maglaro si Filipino tennis sensation Alex Eala sa Wimbledon, isa sa mga pinakamalaking grand slam tournaments sa tennis season.

Nakatakdang kalabanin ni Eala si Renata Zarzua ng Mexico sa unang round ng Torneo mamayang gabi, oras sa Pilipinas.

Matatandaang naging seeded player si Eala para sa Wimbledon ngayong taon matapos makuha ang world number 32 ranking ng Women’s Tennis Association.

Nauna nang nagharap sina Eala at Zarzua sa quarterfinals ng ITF W100 cary tournament noong 2024, kung saan natalo si Eala.

Sakaling manalo si Eala, makakalaban niya sa susunod na round ang mananalo sa pagitan nina dating World Number 1 Serena Williams at Maya Joint ng Australia. | Sa panulat ni Anjo Riñon

Hindi na matutuloy sa Setyembre ang inaabangang rematch nina Pinoy boxing legend Manny Pacquiao at Floyd Mayweather Jr.

Ito’y matapos ipahayag ng kampo ng Filipino boxing icon na target na itong idaos sa unang bahagi ng 2027.

Ayon sa kampo ni Pacquiao, naipagpaliban ang laban dahil sa mga kasong legal, magkakasabay na schedule, at mga isyung pinansyal na kinahaharap umano ng kampo ni Mayweather.

Samantala, muling iginiit ng kampo ni Pacquiao na ang kanilang napirmahang kontrata ay para sa isang opisyal na professional fight at hindi exhibition match lamang.—sa panulat ni Jordan Gutierrez

Bagaman bigong makaabante sa Bad Homburg Open Singles Campaign, nananatili sa Germany si Filipina Tennis sensation Alex Eala para sa doubles category nito, kung saan makakatambalan niya ang Amerikanang tennis legend na si Venus Williams.

Nabatid na si Venus Williams ang nakatatandang kapatid ni 23-time major singles champion Serena Williams.

Ayon kay Eala, “excited na excited” siya na makakatambalan niya ang isa sa mga williams sisters, na parehong wild card players sa wimbledon, na magaganap sa mga susunod na araw.

Nauna nang gumawa ng kasaysayan si Eala bilang kaunaunahang Pilipino na seeded player sa isang grand slam event. — sa panulat ni Anjo Riñon

Muling umangat ang Women’s Tennis Association Ranking ni Filipino Tennis Superstar Alex Eala sa World Number 30 matapos ang kanyang kampanya sa Berlin Open.

Nabatid na umabot sa semifinals si Eala bago siya patumbahin ni Linda Noskova ng Czech Republic.

Samantala, inilagay din bilang number 29 seed si Eala sa 2026 Wimbledon championships, na nakatakdang magsimula sa Hunyo 29.

Nauna nang naabot ni Eala ang world number 29 sa WTA rankings noong Marso. — sa panulat ni Anjo Riñon