SPORTS

Palakpak ang naging pagsalubong ni US President Barack Obama sa Golden State Warriors sa courtesy call ng mga ito sa White House.

Ito ay matapos ang makasaysayang panalo ng Warriors kontra Cleveland Cavaliers noong nakaraang NBA Finals.

Bilang isang basketball enthusiast at big fan ng Chicago Bulls, ipinabatid ni Obama ang kanyang excitement na makita at makasama sa ang isa sa mga manlalarong bahagi ng NBA history na si Warriors Coach Steve Kerr na dating manlalaro ng Bulls noong 1990’s.

Sa seremonyang ibinigay ng White House para sa Warriors, ginaya pa ni Obama ang ilan sa mga signature moves ni NBA MVP Stephen Curry na siyang nanguna para masungkit ng koponan ang kampeonato.

Binigyan naman ng Warriors si Obama ng jersey na may numerong 44 bilang ika-44 na pangulo ng Estados Unidos.

Pabirong sinabi ni Kerr na isa itong alok kay Obama na maging manlalaro ng Warriors lalo pa’t malapit na itong maging ordinaryong mamamayan matapos ang kanyang termino.

By Ralph Obina 

*Photo Credit: The Guardian / Geoff Burke/USA Today Sports

Plano umano ng Golden State Warriors na kunin si dating Most Valuable Player at Oklahoma City Thunder Power Forward Kevin Durant.

Ayon sa ulat, kakayanin ng koponan na abutin ang annual 25 million dollar maximum contract para kay Durant.

Kapag nagkataon, ilan sa mga kondisyon na posibleng ipatupad ng Warriors ay ang pagpapanatili sa tinaguriang big three na sina Stephen Curry, Klay Thompson at Draymond Green, panatilihin ang 19-anyos na player na si Kevin Looney at ang pag-trade kay Andre Iguodala.

Si Durant ay magiging free agent na pagdating ng off season.

By Meann Tanbio  

Mawawala muna ng ilang buwan sa aksyon si Roger Federer.

Ito ay matapos sumailalim sa operasyon sa kanyang tuhod ang Swiss tennis star.

Natamo ni Federer ang kanyang injury nang matapos ang karera nito sa Australian Open noong nakaraang linggo.

Dahil sa naturang injury, napilitan si Federer na umatras sa ABN Amro World Tennis Tournament sa Rotterdam at sa Dubai Duty Free Tennis Championship.

Inamin ni Federer na dismayado siyang hindi makalaro sa naturang mga torneo na kanyang mga paborito.

Tiniyak naman ni Federer sa mga tennis fan na makakabalik din siyang agad sa tennis court para maglaro pagtapos ng mga ikinakailangang rehabilitation.

By  Ralph Obina  

*Photo Credit: bbc

Asahan ang mas exciting na laro mamayang gabi sa pagitan ng defending champion na San Miguel Beer at Alaska Aces sa Game 7 ng PBA Philippine Cup finals.

Sa panayam ng DWIZ kay MVP June Mar Fajardo, tiniyak nitong nasa 100 porsyento ang kanyang kondisyon para pangunahan ang Beermen na masungkit ang ikalawang sunod na kampeonato.

Sinabi ni Fajardo na makakaasa aniya ang kanilang fans na kanila nang ibibigay ang lahat at wala nang ititira pa sa laban mamayang gabi kontra Aces.

Matapos makabangon sa tatlong sunod na pagkatalo sa kamay ng Aces at nagawa pang maitabla sa 3-3 ang serye, napatunayan ng Beermen na walang imposible.

Ayon kay Fajardo ito ay dahil sa naniwala aniya sila sa kakayahan ng bawat isa.

Malaki rin aniyang bagay ang binigay na ispirasyon at gabay sa kanila ni Coach Leo Austria upang makabawi sa mga naunang pagkatalo.

Ang huling salpukan sa pagitan ng San Miguel at Alaska ay gaganapin mamayang alas-7:00 ng gabi sa Mall of Asia Arena.

LISTEN: Panayam ng DWIZ kay San Miguel Beermen Center June Mar Fajardo

By Ralph Obina

*Photo Credit: PBA/ inquirer.net 

Tiniyak ng Alaska Aces star na si Calvin Abueva ang pagkapanalo ng kanyang koponan.

Ito’y sa do or die Game 7 ng PBA Cup ngayong araw kontra sa San Miguel Beermen.

Nabuhayan ng loob si Abueva makaraang hirangin bilang Sportsman of the Year ng online sports portal na Spin.ph

Pag-amin ni Abueva, malaking bagay ang idinulot sa kanyang kumpiyansa ng nasabing parangal kaya naman, wala nang bukas para sa kanya ang katunggaling koponan.

By Jaymark Dagala

*Photo Credit: Inquirer.net

Wala nang atrasan ang pagdaraos ng Rio Olympics sa Brazil.

Ito ay sa kabila ng outbreak ng zika virus sa naturang bansa.

Ayon sa mga otoridad hindi naman mapanganib para sa mga atleta at manonood ng laban ang zika virus maliban sa mga buntis.

Una rito, idineklara na ng World Health Organization (WHO) ang global emergency dahil sa zika.

Sa Brazil pa lamang, papalo na sa 4,000 ang naitatalang kaso ng zika mula noong Oktubre ng nakaraang taon.

By Ralph Obina