SPORTS

Sinamantala ng Global Port Batang Pier ang kawalan ng import ng Talk ‘n Text Tropang Texters.

Ito ay makaraang talunin ng Batang Pier ang Texters sa iskor na 109-101.

Nag-init ng husto si Terrence Romeo para pangunahan ang koponan ng Global Port kung saan ay kumamada ito ng 33 puntos.

Malaki rin ang naging ambag ni Batang Pier Import Calvin Warner na nakasikwat ng 11 puntos, 21 rebounds at 2 assists.

Ayon kay Batang Pier Coach Pido Jarencio, malaking bentahe sa kanilang panalo ang kawalan ng import ng Talk ‘n Text matapos mauspinde si Ivan Johnson.

New import

May napili na ang Talk ‘n Text Tropang Texters na bagong import.

Ito ay bilang pamalit kay Ivan Johnson na sinuspinde matapos bastusin ang PBA commissioner na si Chito Narvasa.

Ayon kay Team Manager Virgil Villavicencio, darating na sa Lunes ang bago nilang import na si David Simon.

Si Simon ay may average na 20.5 points, 8.9 rebounds kung saan huli itong naglaro para sa Seoul Knights sa Korean Basketball League.

Propesyonal ding naglaro si Simon para sa mga koponan ng Bulgaria, Russia, France, Serbia at Kazakhstan.

By Ralph Obina

Photo Credit: Tristan Tamayo/INQUIRER.net

Pormal nang itinalaga bilang general manager ng Brooklyn Nets si Sean Marks.

Kinuha  ng Nets si Marks bilang general manager ilang oras bago magwakas ang itinakdang trade deadline ngayong araw.

Si Marks ay 5 taong naging bahagi ng San Antonio Spurs kung saan ito ang tumayong assistant general manager ng koponan sa huling 2 taon nito.

Naging assistant coach din si Marks ng Spurs ng manalo ang San Antonio ng 2014 NBA title.

Pinalitan ni Marks bilang GM si Billy King.

By Ralph Obina   

Hindi umano kasama sa kasalukuyang roster ng Alaska sina Aces Stalwarts Dondon Hontiveros at Eric Menk.

Subalit nilinaw ni Coach Alex Compton na hindi ito nangangahulugan na hindi na sila bahagi ng koponan.

Ayon kay Compton, pinagpapahinga lang nila sina Hontiveros at Menk matapos ang matindi nilang laban sa PBA Philippine Cup Finals kung saan pinadapa sila ng San Miguel.

Sinasabing nangangailangan ng matagal na recovery time sina Hontiveros at Menk na kapwa ‘most senior’ sa Aces.

By Jelbert Perdez

Muli na namang liliban sa laro ng Miami Heat kontra Atlanta Hawks sa darating na Sabado, oras dito sa Pilipinas si Forward Chris Bosh.

Bagamat hindi naglalabas ng pahayag ang Heat kung bakit di makakalaro si Bosh ay usap-usapan na ito ay dahil sa kanyang blood clot.

Una rito umatras na rin sa All Star game si Bosh dahil sa hindi pa makumpirmang dahilan.

Nangako naman ang Heat na magpapalabas sila ng impormasyon ukol sa kondisyon ni Bosh sa oras na available na ito.

Matatandaang noong nakaraang season, hindi nakalaro si Bosh ng 30 beses dahil sa blood clot nito sa kanyang baga.

By  Ralph Obina

Naka-buena mano ng panalo ang Phoenix sa unang pagsabak nito sa PBA Commissioner’s Cup bilang bagong prangkisa.

Ito’y matapos padapain ng Fuel Masters ang NLEX Road Warriors sa score na 118-106 sa Araneta Coliseum.

Nagpasabog si RR Garcia ng 33 points habang nag-ambag naman si Import Kenny Adeleke ng 18 points at 20 rebounds para sa Phoenix.

Sa ikalawang quarter ay nakalamang ang NLEX sa pangunguna ni Al Thornton pero nakahabol ang Phoenix at nasungkit pa ang panalo sa naturang laro.

By  Jelbert Perdez  

Photo Credit: PBA images

Isang linggo bago ang Qatar Open, umatras na si top seed Serena Williams dahil sa trangkaso.

Ayon kay Williams, hindi niya maibibigay ang kanyang 100 porsyento sa laban kayat minabuti nitong mag-withdraw sa laban.

Sinabi ni Williams na pagtutuunan muna niya ang kanyang kalusugan bago muling bumiyahe sa Doha para makita ang kanyang mga tagahanga.

Ang withdrawal ni Williams ay malaking dagok sa mga tournament organizers dahil una na ring umatras si tennis star Maria Sharapova dahil sa injury.

By  Ralph Obina 

Bagsak na bagsak ang pakiramdam ni dating UFC Champion Ronda Rousey matapos ang masaklap niyang pagkatalo kay Holly Home noong nakaraang taon kung saan maliban sa knocked out ay nabugbog ng husto ang mixed martial arts star na si Rousey.

Dahil dito, inamin ni Rousey na habang nasa ospital ay sumagi sa kanyang isip ang magpakamatay.

Pakiramdam ng dating Olympic judo medalist na nawalan siya ng halaga matapos matalo at hindi na nito alam kung papaano pa makakabangon.

Ngunit nag-iba aniya ang kanyang pananaw nang makita niyang nasa kanyang tabi ang nobyong si UFC Heavyweight Travis Browne.

Sinabi sa sarili ni Rousey na kailangan niyang mabuhay upang mabigyan pa niya ng anak ang kasintahan.

Matatandaang 8 taong gulang pa lamang si Rousey maulila ito sa amang nag-suicide.

By  Ralph Obina  

Sisimulan na ng Phoenix Fuel Masters ang kampanya nito sa PBA Commissioner’s Cup.

Mamayang alas-4:15 ng hapon ay haharap ang Phoenix sa NLEX Road Warriors sa Smart Araneta Coliseum.

Sinasabing pupuntiryahin ng NLEX ang kanilang pangalawang dikit na panalo sa pagsagupa sa Phoenix na siyang nakabili ng prangkisa ng Barako Bull.

Sa una nilang laro, ang Road Warriors ay nagtala ng overtime win laban sa Ginebra Gin Kings kung saan nagpasabog ng 50 puntos si Import Al Thornton.

By  Jelbert Perdez

*Photo Credit: InterAksyon.com/Ver Marquez  

Hindi nababahala ang Spanish tennis stars na sina Rafael Nadal at David Ferrer sa banta ng zika virus Brazil kung saan idaraos ang Rio Open ATP Tournament.

Ayon kay Nadal, lumalabas pa nga siya sa gabi upang kumain sa labas at mamasyal sa Rio.

Sinabi ni Nadaa na sadyang malas na lamang niya kung siya ay tatamaan ng sakit habang nasa Brazil.

Kumpiyansa naman si Nadal na ginagawa ng mga kinauukulan ang kanilang makakaya upang tiyakin ang kaligtasan at kaligtasan ng mga kalahok sa Rio Open Tournament.

Para naman kay Ferrer, nananatiling normal naman ang sitwasyon sa Brazil kahit pa may nagbabantang zika virus.

Matatandaang ang Brazil ang may pinakamaraming kaso ng zika virus.

By Ralph Obina 

Papadyak na sa darating na Huwebes ang Le Tour de Filipinas.

Ang race ay inaasahang lalahukan ng kabuuang 70 riders na kumakatawan sa 12 foreign teams at 3 local squads kabilang na ang PhilCycling.

Tanging ito ang International Cycling Union o UCI race sa Pilipinas na sisipa sa pang-pitong edisyon ngayong taon.

Ayon kay Donna Lina, pangulo ng nag-oorganisang UBE Media Inc., ang annual race ay papadyak mula sa Antipolo City patungo sa Lucena City at Daet sa Camarines Norte hanggang sa Legaspi City na sasaklaw sa halos kabuuan ng Timog Luzon at rehiyon ng Bicol.

By  Jelbert Perdez 

*Photo Credit: letourdefilipinas.com