SPORTS

Naniniwala ang local sports analyst na si Arnel Antiporda na magiging agresibo si Jessie Vargas sa kanilang laban ng fighting senator na si Manny Pacquiao.

Ayon kay Antiporda, mas bata si Vargas na gustong makakuha ng tiyansa para tamaan si Pacquiao subalit hindi rin matantiya kung kayang patigilin ng Pinoy ring icon ang WBO welterweight champion.

Target umano ng team Vargas na i-knock out si Pacquiao para makakuha ng atensyon sa susunod nitong laban.

Hindi rin naman nagpapabaya ang kampo ni Pacquiao na planong agawin ang titulong hawak ni Vargas kahit na may preparasyon aniya si Vargas sa nalalapit na laban.

Subalit kung basehan umano ang mga nakalaban ni Vargas, hindi gaanong sikat ang mga ito kumpara sa lahat ng nakalaban ni Pacquiao na dekalibre sa boxing ring.

By  Mariboy Ysibido 

Laglag na sa unang round pa lang ng China open si Seven time  grand  slam champion Venus Williams.

Ito ay makaraan siyang padapain ng pambato ng china na si Peng Shuai sa iskor na 7-5 at   6-1.

Sa ikalawang set ay dinomina  na ng  husto ni Peng laro kayat isang beses lamang nakapuntos si   Williams.

Si Peng ang isa sa mga umusbong ngayon sa China na may  malaking potensyal matapos kay grand slam singles champion Li na

By: Ralph Obina

Pinag-aaralan ng liderato ng FIFA ang pagpapalawak ng World Cup Finals sa 48 na koponan.

Ipinaliwanag ni FIFA President Gianni Infantino na ito ay upang i-develop sa buong mundo ang football at ang World Cup, ang pinakamalaking event sa larangan ng naturang sports.

Sa panukala, 16 sa mga koponan ang pauuwiin pagkatapos ng isang knockout match, habang ang nalalabing 32 ay maglalaban sa group stage na susundan din ng knockout phase.

Sinabi ni Infantino na pag-uusapan pa ng FIFA Council kung ano ang wastong hakbang para sa 48 team championship at inaasahang sa 2017 ay kasado na ito.

By Katrina Valle 

Pasok na sa PBA Finals ng Governors’ Cup ang Meralco Bolts matapos talunin ang Tropang TNT sa score na 94-88.

Hindi na pinabayaan ng Bolts ang makatabla pa ang TNT sa serye kaya tinapos na nila ito 3-1 sa kanilang best of five semifinals round.

Bida sa panalo ng Bolts ang ginawang 32 points ni Cliff Hodge.

Ito ang unang pagkakataon na makapasok ang Bolts sa Finals.

Hihintayin nila ang mananalo sa pagitan ng Barangay Ginebra at San Miguel Beermen na maghaharap sa Game 5 bukas.

By  Mariboy Ysibido 

Photo Credit: PBA Images

Nakabalik na sa tamang porma si 8-Division World Champion Manny Pacquiao para sa laban nito sa Nobyembre kontra Jessie Vargas ng Mexico.

Ayon kay Hall of Famer Coach Freddie Roach, nakakahanga ang mabilis na pagbabalik ng lakas at liksi sa boksing ng Pambansang Kamao.

Dahil dito, naniniwala si Roach na wala nang magiging sagabal pa sa ensayo ni Pacquiao dahil sa mabilis na recovery nito.

Matatandaang sa mga naunang training ay pinuna ni Roach ang mabilis na pagkapagod ni Pacquiao.

By Ralph Obina 

Nanganganib na maunsyami ang debut game ng Number 1 draft pick sa NBA na si Ben Simmons sa 2016-2017 regular season ngayong Oktubre.

Ito’y makaraang ma-injured ang kanang paa ng 20 anyos na Australian rookie  sa gitna ng training ng Philadelphia 76ers.

Sumasailalim na sa  medical evaluation at treatment si Simmons habang hindi pa mabatid kung gaano ito katagal.

Karaniwang tumatagal ng anim hanggang walong linggo ang recovery process ng metatarsal fractures depende kung gaano kalala ang injury.

By: Drew Nacino

Hindi makakapaglaro sa unang paghaharap bukas ng DLSU Green Archers at Ateneo Blue Eagles, si Jeron Teng.

Ito ay matapos pagbawalan si Teng na makapaglaro ng isang linggo dahil sa sakit na bone spurs.

Bukod dito, hindi din makakadalo sa laban bukas ang coach ng Archers na si Aldin Ayo, na nasuspinde matapos ang laban sa UE.

By Katrina Valle

Pasok na sa quarterfinals ng Wuhan Open sa China ang Romanian tennis star na si Simona Halep.

Ito ay matapos idispatsa ni Halep ang amerikanong si Madison Keys sa iskor na 6-4, 6-2.

Makakaharap naman sa quaterfinals ni Halep si Petra Kvitova ng Czech Republic.

Ayon kay Halep, gagawin niya ang lahat ng kanyang makakaya upang mapagtagumpayan ang nasabing torneo.

By Ralph Obina

Photo Credit: AP

Tiniyak ng Golden State Warriors sa mga fans nito na babawi ang koponan sa pagbubukas ng bagong season ng NBA sa susunod na buwan.

Ayon kay Warriors Coach Steve Kerr, nangako ng kakaibang “Steph” sa fans ang star player at dating MVP na si Stephen Curry.

Aniya, mismong si Curry na umano ang nagsabi na isasantabi na ang nakakadismayang pagkatalo nila sa finals kina Lebron James at Cavs.

Sinabi pa ni Kerr, swerte umano sila dahil napakagaling ng kanilang koponan na nag-eenjoy lamang sa bawat laro.

Lalo namang nagpalakas sa team ang pagkakuha ng Warriors sa dati ring MVP na si Kevin Durant.

Magsisimula ang bagong season ng NBA sa Oktubre 27, 2016.

By Mariboy Ysibido