Pinabagsak ni retired Undefeated Boxer Floyd Mayweather Jr., sa isang exhibition match si Japan Mixed Martial Arts fighter Mikuru Asakura.
Matatandaang sa huling segundo ng 2nd round, tinamaan ng power punch sa kanan si Asakura dahilan para bumagsak ito.
Sa pagtunog ng Bell, hindi na nagawang bumangon ni Asakura sa loob ng ten counts na nagresulta naman sa pagkapanalo ni Mayweather.
Nasungkit ng Pinay na si Nicola Queen Diamante ang anim na gintong medalya sa Girl’s First Novice Swim Championship na inorganisa ng Congress of Philippine Aquatics Inc (COPA).
Hinirang si Diamante bilang ‘Most Bemedalled Athlete’ matapos dominahin ang anim sa pitong events at pangunahan ang Girl’s 11-year old class a 25-meter freestyle, backstroke, 50-meter freestyle at 100 Meters Individual Medley.
Bigo naman ang manlalaro na makakuha ng sweep sa Grassroots Development Program ng COPA matapos matalo kay Alex Pasia ng sharknado swimming team.
Ginanap ang naturang kumpetisyon sa Teofilo Ildefonso swimming pool sa loob ng makasaysayang Rizal Memorial Sports Complex sa Malate, Manila. – sa panulat ni Hannah Oledan
Nakatakdang laro ng PBA at NCAA ngayong araw kanselado
Sinuspinde ng Philippine Basketball Association (PBA) ang kanilang mga laro na nakatakda ngayong araw dahil sa super typhoon Karding.
Batay sa abiso, mare-reschedule ang laban ng Meralco sa Nlex at Converge sa Ginebra.
Nakatakda sanang ganapin ang mga nasabing laro sa Mall of Asia Arena sa Pasay City.
Una na ring inanunsyo ng National Collegiate Athletic Association (NCAA) na kanselado ang laro ng Jose Rizal University laban sa De La Salle-College of Saint Benilde at San Beda University kontra University of Perpetual Help System Dalta.
Desidido na si Ginebra resident import Justine Brownlee na mapabilang sa Gilas Pilipinas na sasabak sa 5th window ng FIBA World Cup Asian Qualifiers sa Nobyembre.
Sinisimulan na ng national team ang lingguhan nilang practice kasama ang kanilang coach na si Chot Reyes
Ibinahagi naman ni Reyes sa social media ang pag-eensayo ng team na kunbg saan nakitang nag-iistretching si Brownlee kasama ang iba pang teammates.
Samantala, nakatakda ng harapin ng Gilas ang Jordan sa November 10 bago ang laban nila sa Saudi Arabia sa November 13 sa 5th window ng 2023 FIBA World Cup Asian Qualifiers. — sa panulat ni Jenn Patrolla
Matapos ang kakila-kilabot na simula, ang “three-peat-seeking” Letran ay balik na sa regular programming nito para sa NCAA Season 98.
Nagbigay ng all-around effort si Fran Yu ng Letran Knights nang paluhurin nito ang college of St. Benilde blazers sa kanilang 81-75 na pagkapanalo kahapon sa Filoil Ecooil Center.
Nabawi ng Knights ang puwesto sa magic four nang may 2-1 record habang hinarap naman ng blazers ang kanilang unang pagkatalo matapos ang tatlong beses na sunod-sunod na panalo.
Sa kabila ng pagkatalo, napanatili naman ng CSB ang pagiging solo lead nito. – sa panunulat ni Hannah Oledan
Hinirang na kampeon si World Champion Gymnast Caloy Yulo sa kanyang pet floor exercise sa 55th All Japan Seniors Championship bilang bahagi ng kanyang paghahanda para sa World Championship sa susunod na buwan sa Liverpool, England.
Ayon kay Munehiro Kugiyama, Japanese Coach ni Yulo, magandang balita ang pagkakapanalo ng Filipino Pocket Seized Dynamo na may kasamang silver event at vault bronze.
Luluwas na sila ng Paris, France sa susunod na buwan bilang bahagi ng Build-Up ni Yulo na nakatakda sa October 29 hanggang November 6.
Umaasa si Yulo na mag-imprub o mapantayan ang kanyang vault gold at floor exercise silver sa huling edisyon sa Kitakyusu ,Japan noong isang taon. - sa panunulat ni Jenn Patrolla
Nasungkit ni Gymnast Carlos Yulo ang gintong medalya sa floor exercise ng 55th All-Japan Seniors Championship.
Maliban sa ginto ay nakuha rin ni Yulo ang Silver medal sa team event at Bronze medal naman sa vault event.
Ang naturang kumpetisyon ay bahagi ng kanyang paghahanda para sa World Gymnastics Championship sa susunod na buwan.
Samantala, nakatakdang sumalang si Yulo sa World Artistic Gymnastics Championship mula October 29 hanggang November 6 sa Liverpool, United Kingdom.
Sasabak si Ricci Rivero sa professional basketball league ng Taiwan bilang pinakabagong kabanata ng kaniyang buhay sa mundo ng basketball.
Tatagal ng 10 buwan ang paglalaro ni Rivero sa ilalim ng Taoyuan pilots ng P.League+.
Sa ngayon, nasa Taiwan na ang naturang atleta at hinihintay nalang na makumpleto ang kaniyang mandatory 7 –day quarantine bago sumalang sa training.
Ibebenta na ni Phoenix Suns Owner Robert Sarver ang kaniyang koponan.
Ito ay matapos patawan si Sarver ng 10 million dollars na multa at isang taong ban dahil sa racist at misogynist comments at reklamong pang-aabuso sa trabaho.
Bagaman inamin ni Sarver na ginawa niya ang lahat ng kaniyang makakaya para mapabuti ang koponan, mabuting hakbang naman ito para sa mga fans, players at empleyado ng Phoenix Suns.
Sa ngayon, sinimulan nang iproseso ang paghahanap ng buyer ng Suns at maging ang Women’s National Basketball Association (WNBA) team na Mercury.
Nagwagi sa iskor na 133-87 ang Bay Area Dragons kontra Blackwater sa regular season ng 2022 PBA Commissioner’s Cup na ginanap sa Mall of Asia Arena (MOA) sa Pasay City.
Nilampaso ng Dragons ang Blackwater matapos makapagtala ng 41 puntos si Myles Blake Powell kung saan, lumamang sa iskor sa una hanggang sa huling quarter ang koponan.
Dahil dito, mas matinding ensayo ang kakailanganin ng Dragons dahil susunod nilang makakalaban ang Northport Batang Pier sa darating na Sabado.