SPORTS

Lalarga na ang exhibition match ng Team Lebron at Team Stephen sa 2018 NBA All Star Game sa Staples Center Arena sa Los Angeles, California ngayong alas 9:00 ng umaga.

Nasa hollywood na ang lahat ng pinaka-mahusay na NBA para sa isang star-studded all-star weekend.

Pangungunahan ni Lebron James ng Cleveland Cavaliers ang Eastern Conference All Stars habang mangunguna sa Western Conference All Stars si Stephen Curry ng Defending NBA Champion Golden State Warriors.

Pasok din sa starting line up ng east ang kanyang dating teammate na si Kyrie Irving ng Boston Celtics; Demar Derozan ng Toronto Raptors; Joel Embiid ng Philadelphia 76ers at Giannis Antetokounmpo ng Milwaukee Bucks.

Kasama naman ni Curry sa starting lineup ng west ang kanyang teammate na si Kevin Durant ng warriors; James Harden ng Houston Rockets; Demarcus Cousins at Anthony Davis ng New Orleans Pelicans.

Umaasa pa rin ang Argentinian Welterweight Champion na si Lucas Matthysse na kanyang makakasagupa si dating 8 division World Champion at Senador Manny Pacquiao.

Ito’y kahit pa inihayag ni Top Rank CEO at promoter Bob Arum na malabong magkaroon ng bakbakan sa pagitan ng dalawang boksingero.

Una nang ipinahiwatig ni Pacman na nais niyang makalaban sa Abril ang tinaguriang “La Maquina” ng Argentina dahil sa hawak nitong WBA Welterweight belt pero mas pinili ni Arum si Mike Alvarado.

Kasalukuyang hawak ng Golden Boy promotions ni Oscar Dela Hoya na karibal ng Top Rank ang promotional rights ni Matthysse.

Umangat ang serbian player na si Bogdan Bogdanovic ng Sacramento Kings nang tambakan ng Team World ang Team USA sa NBA Rising Stars Challenge.

Si Bogdanovic ang itinanghal na MVP o most valuable player sa nasabing torneo na nagsara sa score na 155-124.

Nakapagbuslo si Bogdanovic ng 26 points at may anim na assist habang kaagapay naman nito si Buddy Heild at Jamal Murray.

Sa lunes naman, aabangan ang sagupaan ng mga koponan nila Lebron James at Stephen Curre sa all star game ng NBA.

Laglag na sa Pyeongchang Winter Olympics ang Filipino figure skater na si Michael Martinez.

Ito ay matapos na mabigo ang pambato ng Pilipinas na umabot sa Top 24 ng preliminary phase ng men’s figure skating.

Kinapos si Martinez na nagtapos sa ika-dalawampu’t walong pwesto at nakakuha ng kabuuang 55.56 points.

Gayunman, nagpasalamat si Martinez sa lahat ng mga sumuporta sa kanya sa paglahok sa 2018 Winter Olympics.

Ayon dito, proud siyang ikatawan ang Pilipinas sa ikalwang pagkakataon sa Winter Olympics.

—-

Pinataob ng Blackwater Elite ang Kia Picanto sa paghaharap nila kagabi sa Araneta Coliseum.

Hindi pinaporma ng Blackwater ang Kia at tinapos ang laban sa iskor na 95-76.

Nanguna sa panalo ng Blackwater si Mike Digregorio na kumana ng 21 puntos na sinegundahan nila James Sean at Mac Belo na may pinagsamang 17 puntos.

Samantala, nabalewala naman ang ginawang 22 puntos ng beteranong si Ronald Tubid para sa Kia.

—-

Ilang hakbang na lang si Swiss tennis star Roger Federer para makabalik sa pangunguna sa world ranking.

Ito ay matapos niyang idispatsa ang kalabang German tennis player na si Philipp Kohlschreiber sa semi finals ng ABN Amro tournament na ginaganap sa Rotterdam.

Isang panalo na lamang ang kailangan ni Federer para masiguro nito ang top ranking na magbibigay daan sa kanya upang sumungkit ng bagong record bilang pinakamatandang number one male tennis player.

Mahihigitan ng 36-anyos na si Federer ang record ni Andre Agassi na huling nahawakan ang paghahari sa tennis sa edad na 33.

—-

Patuloy ang pagpapalakas ng puwersa ng Houston Rockets.

Ito ay matapos pumirma ng kontrata sa koponan ang 7-time All Star na si Joe Johnson.

Ayon kay Rockets General Manager Daryl Morey, inaasahang kasama na sa line up ng koponan si Johnson sa susunod na laban ng Houston.

Si Johnson ay may average na 8.6 points at 23.1 minutes per game magmula nang maglaro ito ng dalawang taon para sa Utah Jazz.

—-

Lumagpak na sa bottom 4 ng 2017-2018 PBA Philippine Cup ang TNT Katropa matapos ang kanilang ikalawang sunod na pagkatalo.

Sa pagkakataong ito ay pinadapa ng Global Port Batang Pier ang TNT sa score na 99-84, sa kanilang paghaharap sa Araneta Coliseum, kagabi.

Umarangkada si Stanley Pringle sa score na 16 points habang nag-ambag ng 17 points si Nico Elorde para sa Batang Pier.

Bagaman nagpakawala ng 24 points si Jayson Castro, hindi naman ito naging sapat upang makahabol ang Katropa.

Sa kasalakuyan ay nasa 9th spot na ang TNT sa kartadang 4-6 habang nasa 7th spot ang Global Port sa standing na 4-4.

—-

Minaliit lamang ni dating world champion at Irish boxer Carl Frampton ang knockout power ni dating 4-Division World Champion Nonito ‘The Filipino Flash’ Donaire Jr.

Naniniwala siyang kaya niyang tapatan ang lakas ni Donaire sa kanilang bakbakan sa darating na Abril.

Sinabi ni Frampton na bentahe din niya ang pagiging mas malaki kumpara sa The Filipino Flash.

Gayunman, batid ni Frampton na dapat pa rin siyang mag-ingat sa nananatiling delikadong kalaban si Donaire na may dalawampu’t apat (24) na knockout victories mula sa tatlumpu’t walong (38) career wins nito.

—-

Desidido si Swiss tennis star Roger Federer na mabawi ang paghahari sa mundo ng tennis.

Ayon sa 36-anyos na Australian Open champion, target niyang sungkitin ang kampeonato sa ABN Amro World Tennis na gaganapin sa Rotterdom.

Sakaling magtagumpay, mapapasakamy muli ni Federer ang number one ranking na huli niyang nakuha noong 2012.

Maliban dito, malalagpasan niya rin ang record ni Andre Agassi na oldest number one tennis player.

—-