Umabante na ang Gilas Pilipinas sa huling round ng 2019 FIBA World Cup Qualifiers.
Ito’y makaraang malusutan ng Gilas ang Japan sa score na 89-84, sa kanilang paghaharap sa 2nd round ng Groub B sa MOA Arena, Pasay City, kagabi.
Nagpakawala ng 18 points ang naturalized-player na si Andray Blatche para sa Philippine national team habang nag-ambag ng 23 points si Makoto Heijima para sa Japanese team.
Sunod na makakaharap ng Pilipinas sa 3rd round ang Chinese Taipei sa Hunyo 28.
Handa na kapwa sina IBF Flyweight Champion Donnie Ahas Nietes at Brian Viloria sa kanilang laban bukas.
Unang sasabak sa boxing ring si Viloria na makikipaglaban kay Artem Dalakian ng Ukraine na magsisilbing undercard sa laban naman ni Nietes.
Makakasagupa ni Nietes si dating two time champion Juan Carlos Reveco sa Inglewood, California.
Ang nasabing bakbakan ay unang pagkakataong idedepensa ng 34 anyos na pinoy boxer ang kanyang titulo.
Sinabi ni Nietes na matagal niyang hinintay ang naturang laban dahil April 2017 pa naganap ang huling laban niya kay Komgrich Nantapech ng Thailand.
Inaasahang magkakaroon na ng tunay na pagbabago sa Philippine sports.
Ito’y matapos manalo si Amateur Boxing Association of the Philippines o ABAP Chief Ricky Vargas laban kay Peping Cojuangco sa eleksiyon ng Philippine Olympic Committee o POC na idinaos sa Wack Wack Country Club sa San Juan City.
Humakot ng dalawampu’t apat (24) na boto si Vargas habang labing-lima (15) naman ang nasungkit ni Cojuangco kaya’t nagwakas na ang labin-tatlong (13) taon niyang paghahari sa POC.
Nagsilbi si Cojuangco bilang POC Chief simula pa noong 2004 habang si Vargas naman ang itinanghal na ika-siyam na pinuno ng Olympic body.
Samantala, nanalo rin ang kaalyado ni Vargas na si Cycling President Representative Abraham Tolentino laban kay Table Tennis Head Ting Ledesma para sa chairmanship ng POC.
Umaasa naman ang grupo ni Vargas na pagkakataon na ito para makapagsulong ng pagbabago sa kalagayan ng mga manlalaro at sa Philippine sports, sa kabuuan.
Muling sasabak sa octagon si UFC star Conor McGregor.
Ito ay matapos magbanta si UFC President Dana White na tatanggalan ng belt si McGregor kapag hindi pa rin ito lumaban.
Makakalaban ng Irish fighter sa UFC 222 ang American Mixed Martial Artist na si Frankie Edgar.
Matatandaang hindi na muling tumapak pa sa octagon si McGregor matapos nitong labanan sa boksing si retired undefeated boxer Floyd Mayweather Jr.
Bigo ang Gilas Pilipinas na patumbahin ang Australia Boomers sa kanilang paghaharap sa second round ng 2019 FIBA World Cup Qualifiers.
Hindi tumalab ang Gilas ng Pilipinas sa mas malaking team ng Boomers na nagwagi sa score na 84-68, sa kanilang game sa Margaret Court Arena sa Melbourne, Australia.
Nagpakawala ng 15 points si Junmar Fajardo para sa Philippine National Basketball Team habang kumamada ng 16 points si Cameron Gliddon para sa Australian Team.
Hawak na ng Gilas ang 2-1 record sa Groub B habang nananatiling undfeated ang Australia sa kartadang 3-0.
Samantala, sunod na makakaharap ng Pilipinas ang Japan sa MOA Arena, Pasay city.Linggo, Pebrero 25.
Posted by: Robert Eugenio
Sasabak na ang Gilas Pilipinas at Australia Boomers sa second round ng FIBA World Cup Qualifiers.
Maghaharap ang dalawang koponan mamayang alas-4:30 ng hapon, oras sa Pilipinas, sa Margaret Court Arena, Melbourne, Australia.
Aminado ang Boomers na bagaman matatangkad ang kanilang mga player ay ang Pilipinas ang kanilang magiging pinakamatinding makakalaban sa Group B.
Nananatili ang Australia sa top spot ng Fiba Asia habang nasa 5th rank ang Pilipinas.
Anim na team mula sa FIBA Asia at Oceania bukod pa mga koponang magmumula sa FIBA Americas, Europe at Africa ang kailangang mag-qualify para sa gaganaping 2019 FIBA World Cup sa China.
Handang-handa na si Kiefer Ravena at Kevin Alas na pangunahan ang Gilas Pilipinas sa laban ng koponan mamayang hapon kontra Australia para pagpapatuloy ng 2018 FIBA World Cup.
Ito ay matapos na mabigong makasama sa line up ang point guard ng Gilas na sina Jayson Castro at Jio Jalalon dahil sa injury.
Aminado si Kiefer na dadaan sila sa butas ng karayom lalo’t nasa ika-sampung puwesto sa world ranking ang Australia.
Gayunman, umaasa si Kiefer na masosorpresa nila sa laro ang koponan ng Australia at gagawin nila ang lahat gamit ang puso para manalo sa laban mamaya.
Nakakabahala na ang moro-morong eleksyon sa Philippine Olympic Committee o POC para lamang manatiling pangulo ng POC si Jose ‘Peping’ Cojuangco.
Ayon kay Ed Picson, Secretary General ng Association of Boxing Alliances in the Philippines o ABAP, napakalakas ng ugong-ugong na muling i-di-disqualify ng election committee ang iba pang kandidato para sa POC elections.
Binigyang diin ni Picson na malinaw sa desisyon ng Pasig RTC na kailangang isama bilang mga kandidato sa POC elections sina ABAP President Ricky Vargas at cycling chief Cong. Bembol Tolentino.
Kasama rin sa desisyon ng korte na kailangang isagawa ang eleksyon sa February 23.
Mula pa noong 2004 ay hindi na napalitan si Cojuangco bilang Pangulo ng POC.
“Sana magkaroon ng laya, freedom of choice, hayaan niyong pumili ang mga National Sports Associations o NSA head kung sino ang gusto nilang mamuno sa Philippine sports, kahit po si Hidilyn Diaz, ‘yung ating silver medalist ay nagsusumamo na sana ay magkaroon na ng reporma sa POC, ganyan din ang sentimyento ng karamihan ng mga NSA head dahil sa totoo lang walang nangyayari sa Philippine sports ngayon bagkus bumabagsak dahil kulang sa leadership, kulang sa vision, kulang sa direction, kulang sa lahat eh.” Pahayag ni Picson
Hawak na ngayon ni Swiss tennis star Roger Federer ang world record bilang pinakamatandang number one tennis player.
Ito ay makaraang basagin ng 36-anyos na si Federer ang record ni Andre Agassi bilang oldest number one.
Naisakatuparan ito ni Federer matapos na idispatsa nito si Grigor Dimitrov sa finals ng Rotterdam Open.
Hindi naman makapaniwala si Federer na muli siyang nakapaghari sa mundo ng tennis matapos ang anim na taon.
Nilampaso ng koponan ni Lebron James ang team ni Stephen Curry sa all-star game ng NBA sa iskor na 148–145.
Hindi katulad ng nakasanayang mga all-star games, dikit ang laban at seryoso ang mga player sa laro.
May pagkakataon pa sana ang team Stephen pero isang matinding depensa ang inilatag ng team Lebron sa huling dalawampung (20) segundo ng laro para maitakas ang panalo.
Umiskor si James ng 29 points at 10 rebounds para tanghaling most valuable player ng all-star game.
Ito na ang ikatlong MVP trophy ng Cleveland Cavalier superstar sa all-star classic ng liga.
Inilabas na ni Gilas Pilipinas Coach Chot Reyes ang line-up ng national team na sasabak sa 2nd round ng FIBA World Cup Asian Qualifiers Group B kontra Australia at Japan.
Pasok sa line-up ang mga beteranong sina Jayson Castro, Gabe Norwood, June Mar Fajardo, Calvin Abueva at Japeth Aguilar, Kiefer Ravena, Kevin Alas, Jio Jalalon, Roger Pogoy, Matthew Wright, Allein Maliksi, Carl Bryan Cruz at naturalized player na si Andray Blatche maging ang “23-for-23” at dating De La Salle Green Archer na si Abu Tratter.
Makakasagupa ng gilas ang Australian national basketball team sa Pebrero 22 sa Melboune, Australia at Japan sa Pebrero 25, sa MOA Arena, Pasay.