SPORTS

Pangungunahan nina Lebron James at Stephen Curry ang United States Basketball Team na sasabak sa 2019 FIBA World Cup at 2020 Olympics.

Ang 35 member squad ay binubuo ng mga dating miyembro ng USA National Team at 17 Olympic gold medalist.

Kasama rin sa listahan sina Houston Rockets Star James Harden, Russel Westbrook, Chris Paul, Kevin Durant, Draymond Green at Klay Thompson.

Napili namang maging coach ng team USA si San Antonio Spurs Coach Gregg Popovich.

Magsisimula sa buwan ng Hulyo ang training ng team USA sa Las Vegas.

—-

Nasungkit ng San Miguel Beermen ang kampeonato ng PBA Phlippine Cup.

Ito ay makaraang ilampaso ng Beermen ang Magnolia Hotshots sa iskor na 108-88 sa Game 5 ng final series.

Dahil sa panalo, lumikha ng kasaysayan ang San Miguel na may pang-apat nang sunod-sunod na all Filipino trophy habang may walo na ito sa kabuuan.

Ito na ang pang-anim na titulo ng Beermen sa loob ng apat na taong pamumuno ni Coach Leo Austria.

Samantala, itinanghal naman bilang finals most valuable player si June Mar Fajardo na nakapagtala ng 45 points at 20 rebounds.

—-

Naitala ng Philadelphia 76ers ang ika-12 sunod nilang panalo.

Ito ay matapos nilang pataubin ang Detroit Pistons sa iskor na 115-108.

Nanguna sa panalo ng Sixers si JJ Redick na tumipa ng 25 puntos.

Dahil naman sa pagkatalo, naputol ang five game winning streak ng Pistons.

—-

Hindi na matutuloy ang inaasahang magiging fight of the year na rematch nina Mexican warrior Canelo Alvarez at Kazakhstani boxer Gennady Golovkin.

Ito ay matapos umatras sa laban Alvarez dahil sa dalawang beses na itong nagpopositibo sa banned substance dahilan upang suspendihin na rin ng Nevada State Athletic Commission ang laban na nakatakda sana sa Mayo.

Gayunman, nanindigan si Alvarez na malinis siyang manlalaro at malinis din siyang lumaban kaya’t imposible aniyang gumamit siya ng steroids.

Naniniwala ang kampo ni Alvarez na nagpositibo ang kanilang boksingero sa steroids dahil sa nakain nitong kontaminadong karne.

Pero para kay Golovkin, walang maniniwala sa palusot ni Alvarez na sadya aniyang isang mandaraya.

—-

Tuloy na tuloy na ang laban ni dating 8-division world champion Manny Pacquiao sa Kuala Lumpur sa Hulyo.

Ito ang kinumpirma ng boxing promoter at dating world champion na si Oscar Dela Hoya kung saan makakalaban ng Pambansang Kamao ang pambato ng Argentina na si Lucas Matthysse.

Ayon kay Dela Hoya pirmado at selyado na ang naturang laban.

Aminado naman si Pacquiao na hindi ito magiging madaling laban lalo’t isang knockout artist si Matthysse.

Kasalukuyang hawak ni Matthysse ang 39 wins kung saan tatalumpu’t anim dito ay sa pamamagitan ng knockout.

—-

Balik sa pagiging world’s number one ang Spanish tennis star na si Rafael Nadal.

Naungusan ni Nadal ang dating number one na si Roger Federer na maagang nalaglag sa ikalawang round ng Miami Open.

Dahil dito, nakalamang ng sampung (10) puntos si Nadal dahilan upang mabawi nito ang paghahari sa tennis rankings.

Bumubuo naman sa top 5 ng world rankings sina Marin Cilic na nasa ikatlong puwesto na sinundan ni Alexander Zverev at Grigor Dimitrov na nasa ika-limang puwesto.

—-

Tinuldukan ng San Antonio Spurs ang 11-game winning streak ng Houston Rockets matapos nila itong talunin sa iskor na 110 – 83.

Bumida sa San Antonio sina Lamarcus Aldridge na may 23-points at 14-rebounds at Rudy Gay na may 21-points.

Habang nasayang naman ang 25-points ni James Harden ng Rockets.

Dahil sa panalo, nanatili ang Spurs sa ika-apat na puwesto ng team standings ng Western Conference na may 45-32 win/loss record.

—-

Inimbitahan ni Manny Pacquiao si Bob Arum para manood sa kanyang laban kay Lucas Matthysse sa Malaysia sa hulyo.

Ito’y bilang patunay na wala siyang sama ng loob kay Arum kahit pa kumalas na siya rito matapos mapaso ang kanyang kontrata sa top rank promotions.

Gayunman, ayon kay Pacquiao handa pa rin siyang makatrabaho muli si Arum.

Sa ngayon, ang labang Pacquiao-Matthysse ay ipopromote ng golden boy promotions ni Oscar Dela Hoya kung saan co-promoter si Pacquiao.

Nasungkit ng Adamson University ang gintong medalya sa Asia Cheerleading Invitational Championship 2018 sa Singapore.

Ang Asia Cheerleading Invitational Championship ay isang kompetisyon na bukas para sa lahat ng international team kung saan, may iba’t ibang age division.

Magugunitang itinanghal bilang kampeon sa UAAP o Universities Athletic Association of the Philippines ang Adamson sa cheerleading competitions nito noong isang taon.

Matapos ang limang taon, tuluyang inalis na ang lifetime ban sa dating Petron Blaze import at kasalukuyang Alab Pilipinas reinforcement Renaldo Balkman.

Ayon kay League Commissioner Willie Marcial, ang pagpapabalik kay Balkman bilang manlalaro sa PBA ay kapwa pinaboran nina dating Commissioner Chito Narvasa at Arwind Santos.

Sinabi ni Marcial na pinagsisihan na ni Balkman ang kaniyang nagawa at tiniyak na magiging maayos na ang kaniyang pag-uugali sa labas man o loob ng court.

Pinagbawalan magkapaglaro sa PBA si Balkman dahil sa pananakal nito kay Santos na kaniya-kaniyang ka-teammate sa Petron Boosters noong 2013.

Bukod sa ipinataw na ban, pinagbayad din si Balkman ng P250,000 halaga ng multa.

—-