SPORTS

Buo na ang final four sa NBA matapos na manalo ang Boston Celtics sa Game 5 ng Eastern Conference semi-finals kontra Philadelphia 76ers sa iskor na 114 – 112.

Pinangunahan ni Jayson Tatum ang panalo ng Celtics kontra 76ers kung saan nakakolekta ito ng 25 points.

Nag-ambag din sa laban si Jaylen Brown na may 24 points at Terry Rozier na nakagawa naman ng 17 points.

Dahil dito, muling makakaharap ng Celtics sa ikalawang sunod na taon si Lebron James at Cleveland Cavaliers.

Nakatakda naman ang Game 1 ng Eastern Conference Finals sa Lunes, Mayo 14 oras sa Pilipinas.

—-

Pinataob ng Meralco Bolts ang San Miguel Beermen sa PBA Commissioner’s Cup sa iskor na 93- 85.

Bumida sa panalo ng Bolts si Baser Amer na nakapagtala ng 28 points habang mayroong 23 points si Chris Newsome.

Ayon kay Bolts Coach Norman Black, unang quarter pa lang ay hirap nang makapuntos ang Beermen kaya naisagawa nila ang 12-4 run at tuluyang nanalo.

—-

Nagsimula na ang pagsasanay ni Senador Manny Pacquiao para sa kanyang laban kay WBA Welterweight World Champion Lucas Matthysse sa Hulyo sa Kuala Lumpur Malaysia.

Sa kauna-unahang pagkakataon, pawang mga Pilipino ang bumubuo sa training team ni Pacquiao.

Tututukan ng trainers ang depensa ni Pacquiao dahil kilalang knockout artist si Matthysse.

Ang training team ni Pacquiao ay binubuo nina Buboy Fernandez, Nonoy Neri, at Jon Penialosa.

Pinakabagong makakasama sa training team ni Pacquiao si Nonito Donaire Sr., ama ni The Filipino ‘Flash’ Nonito Donaire Jr.

—-

Magkakaharap na ang Houston Rockets at Golden State Warriors sa finals ng Western Conference ng NBA Playoffs.

Kasunod ito ng pagkakapanalo ng Warriors laban sa New Orleans Pelicans sa Game 5 ng semifinals- ng Western Conference sa score na 113–104.

Magkasanib na pinataob nina Stephen Curry, na nakagawa ng 28 points at Kevin Durant na meron namang 24 points ang Pelicans.

Hindi rin nagpahuli si Klay Thompson na nakapag-ambag namang ng 23 points sa Warriors.

Naitala naman ng Warriors ang kanilang ika-15 sunod na home playoff win na katulad ng record ng Chicago Bulls noong April 1990 hanggang 1991.

—-

Tinalo ni Novak Djokovic si Kei Nishikori sa unang round ng Madrid Open.

Nakuha ni Djokovic ang 7-5, 6-4 na panalo kontra sa ranked 20 na si Nishikori.

Ayon sa Serbian tennis star, naging maganda ang pagsisimula niya sa laro kaya nahigitan ang pambato ng Japan.

Si Djokovic ay galing sa right elbow injury kung saan kinansela niya ang mga nakalipas na mga torneo ngayong taon.

—-

Napataob ng Cleveland Cavaliers ang Toronto Raptors sa game 3 ng best of seven series ng eastern conference semi-finals sa score na 105-103.

Nakuha ng Cavs ang 1st at 2nd quarter ng game habang nakabangon ang Raptors sa 3rd at 4th quarter para maidikit ang puntos.

Kumamada si Lebron James na nakapag-ambag ng 38 puntos sa Cavs na sinundan ni Kevin Love na may 21 puntos.

Sa Raptors naman, umambag ng 27 puntos si Kyle Lowry habang 18 puntos naman mula kay Og Anunoby.

Sa ngayon, 3-0 na ang standing ng Cavs, isang panalo na lang kontra Raptors pasok na sila sa NBA Eastern Conference finals.

Samantala, sa western conference semi finals naman, wagi ang Boston Celtics kontra Philadelphia 76ers sa game 3 ng best of seven series sa score na 101-98 overtime.

Tinambakan ng Cleveland Cavaliers ang Toronto Raptors sa second round ng NBA playoff series.

Tinapos ng Cavs ang laban sa iskor na 128-110.

Pinangunahan ni Lebron James ang tagumpay ng Cavs matapos itong kumana ng apatnapu’t tatlong (43) puntos at labing apat (14) na assists.

Sinegundahan naman ito ni JR Smith na nag-ambag naman ng labing limang (15) puntos.

Dahil dito, hawak na ng Cavs ang 2-0 lead advantage kontra Raptors.

—-

Desidido si Serbian tennis star Novak Djokovic na muling makasungkit ng kampeonato sa mga tennis tournaments.

Aminado si Djokovic na hindi naging maganda ang kanyang mga naging performance sa nakaraan dulot ng kanyang maaagang pagbabalik mula sa elbow surgery.

Ito aniya ang dahilan kaya’t maaga siyang nalaglag sa Barcelona, Monte Carlo, Miami at Indian Wells championships.

Dahil dito, naniniwala si djOkovic na para muli siyang magtagumpay ay kailangan niyang ibalik ang dating buong tiwala niya sa sarili.

—-

Gitgitan ang naging salpukan ng Cleveland Cavaliers at Toronto Raptors sa opener ng Eastern Conference Semifinals.

Sa tindi ng bakbakan umabot sa overtime ang laro ng Cavs at Raptors, ngunit sa huli nanaig pa rin ang lakas ng Cleveland na nagwagi sa pamamagitan ng isang kalamangan sa iskor na 113-112.

Muling nanguna para sa Cavs si Lebron James na nagtapos na may triple double matapos kumana ng dalawampu’t anim (26) na puntos, labing tatlong (13) assists at 11 rebounds.

Sinegundahan naman ito nina JR Smith na may dalawampung (20) puntos at Kyle Korver na nagbigay ng labing apat (14) na puntos.

—-

Nagsimula na ang training camp ni Fighting Senator Manny Pacquiao sa General Santos City.

Ito ay bilang paghahanda para sa laban nito kontra sa Argentinian boxer na si Lucas Mattysse sa darating na Hulyo sa Malaysia.

Ang pagsasanay na ito ay pangungunahan ng matalik na kaibigan at trainer ni Pacquiao na si Buboy Fernandez.

Ayon sa Pambansang Kamao, bagamat dalawa’t kalahating buwan pa lamang bago ang kanyang laban, inspirado at sabik na aniya siya sa naturang bakbakan lalo’t hindi basta basta ang kanyang makakalaban.

—-