SPORTS

Wala pa rin umanong kupas ang lakas ng kanang kamao ni fighting Senator Manny Pacquiao.

Ayon sa trainer nito na si Coach Buboy Fernandez, kanang kamao ni Pacquiao ang susi para tagumpay na tapusin ang laban kay Lucas Matthysse sa Hulyo.

Ito’y kahit kilala umano bilang southpaw o kaliweteng boksingero si Pacman.

Gayunman sinabi ni Fernandez na kasalukuyang pinag-aaralan pa kung papaanong mas magiging epektibo ang paggamit ni Pacquiao sa kanyang kanang kamao upang patumbahin si Matthysse.

—-

Pursigido ang koponang Houston Rockets na itabla ang kanilang 2-1 na kartada sa Golden State Warriors sa game 4 ng NBA Western Conference Finals bukas.

Ito’y makaraang aminin mismo ni Rockets coach D’antoni na naging malamya ang kanilang naging performance noong game 3 na siyang dahilan para maungusan sila ng Warriors.

Inaasahan naman ni Warriors Coach Steve Kerr na magiging gitgitan ang game 4 dahil sa aniya’y pagiging gutom ng Rockets sa pagkapanalo.

Samantala, maghaharap naman ngayong araw ang mga koponang Boston Celtics at Cleveland Cavaliers kung saan, kailangang itabla ng celtics ang kanilang panalo kontra sa Cavs.

Inamin ni Sen. Manny Pacquiao na nakasalalay sa resulta ng laban nila ni Lucas Matthysse ang  kanyang desisyon kung magreretiro na siya sa boksing.

Giit ng pambansang kamao, gagawin niya ang lahat ng makakaya para makita niya mismo kung kaya niya pa bang makipagsabayan gaya noong mga una niyang laban.

Pero paglilinaw ni Pacquiao, hindi niya pa sinasabing ito na ang huling laban niya sa loob ng ring.

Higit kay Matthysse, ang inaalala ngayon ni Pacquiao ay kung paano palalaksin ang kanyang stamina para umabot hanggang 12 rounds.

Maghaharap sina Pacquiao at Matthysse sa July 15 sa Malaysia.

Inanunsiyo na ni dating La Salle Star Player Ricci Rivero ang kanyang paglipat sa University of the Philippines Maroons

Sa kanyang Twitter account, nagpost si rivero ng picture niya suot ang jersey ng UP Maroons at may caption na “Diliman, here I come.”

Ayon kay Rivero, nagdesisyon siyang lumipat sa UP matapos niyang kunsultahin ang kanyang pamilya, mga kaibigan, pati na ang kanyang teammates sa Gilas Pilipinas cadets.

Umalis si Rivero sa Archers matapos ipatupad ng unibersidad ang patakaran na nagbabawal sa kanilang mga manlalaro na tumanggap ng mga endorsement.

When you’re down, there’s no where to go but UP! ⬆️ DILIMAN here i come! #UPFight pic.twitter.com/iAkFzKiNIq

— Ricci Rivero (@_ricciiirivero) May 18, 2018

Titiyakin ng Cleveland Cavaliers na hindi mapapahiya ang kanilang fans at makukuha ang unang panalo sa Game 3 bukas na gaganapin sa Quickens Loans Arena.

Ayon kay Cleveland Coach Tyronne Lue, gagawin nila ang lahat ng kanilang makakaya para makasungkit ng unang panalo.

Dahil dito, inaasahang mas magiging pisikal ang laban kontra Celtics lalo’t gutom rin sa kampeonato ang nasabing koponan.

Magugunitang dalawang beses nang pinadapa ng Celtics ang Cavs sa Eastern Conference Finals ng NBA.

—-

Abanse na sa ikatlong round ng Italian Open si Spanish tennis star Rafael Nadal.

Ito ay matapos na idispatsa ni Nadal ang Bosnian tennis player na si Damir Dzumhur.

Ayon kay Nadal, tiwala siyang malakas at maganda ang kanyang laro ngayon para sa Italian Open kumpara sa nagdaang Madrid Open.

Matatandaang natanggal sa World One ranking si Nadal at naungusan ni Roger Federer matapos ang nalasap na pagkatalo ng Spanish tennis star sa Madrid Open noong nakaraang linggo.

—-

Maghaharap na bukas ang Boston Celtics at Cleveland Cavaliers sa pagsisimula ng Eastern Conference Finals ng NBA.

Haharapin ng Celtics ang Cavs nang wala ang kanilang point guard na si Kyrie Irving na sumailalim sa surgery sa tuhod.

Dahil dito, sasandal muna ang Celtics kay Al Horford at sa mga batang manlalaro nito na sina Terry Rozier, Marcus Smart, Jaylen Brown at Jayson Tatum.

Simula 2010, hindi pa nakakatapak ang Celtics sa NBA finals.

Sa panig naman ng Cavs, nakaabang na si Lebron James para maging ika-6 na NBA player sa kasaysayan na makakatungtong sa NBA finals sa walong magkakasuno na beses.

Gaganapin ang Best-of-Seven Eastern Confernce finals sa Boston, USA.

Samantala, sa Martes naman maghaharap sa Western Conference Finals ang Golden State Warriors at Houston Rockets sa Toyota Center sa Houston, Texas.

Nadagit ng Magnolia Hotshots ang kanilang unang panalo sa 2018 PBA Commissioner’s Cup.

Nalusutan ng Hotshots ang Globalport Batang Pier sa score na 92-87 sa kanilang paghaharap sa Angeles University Foundation Sports Arena and Cultural Center sa Pampanga.

Nagpakawala ng 22 points at 8 rebounds si Ian Sangalang habang kumamada ng double-double na 19 points at 13 rebounds si Vernon Macklin para sa Magnolia.

May tig-isang panalo at talo na ang Hotshots sa unang round ng Commissioner’s Cup.

Nakalasap ng kanyang kauna-unahang clay-court defeat si Rafael Nadal sa loob ng halos isang taon.

Ito’y makaraang ilampaso siya ni Dominic Thiem ng Austria kaya tuluyan siyang nasibak sa Madrid Masters quarterfinals.

Dahil dito, natapos ang 50-set winning streak ni Nadal nang padapain ng fifth-seeded na si Thiem.

Nangangahulugan din na makukuha muli ni Roger Federer ang world no. 1 ranking.