SPORTS

Palalakasin pa ng Gilas Pilipinas ang training nito bilang paghahanda sa 2019 FIBA World Cup Qualifiers laban sa Chinese Taipei at Australia.

Kasunod na rin ito ng pag-amin ni Gilas Coach Chot Reyes na nakukulangan pa rin siya sa puwersa ng Pilipinas kahit pa kasama nila sina Andray Blatche at calvin Abueva.

Sinabi ni Reyes na marami pang adjustments ang kanilang gagawin kahit pa maganda ang ipinakitang laro ni Blatche.

Mayroon pa aniya silang apat na full practice bago magtungo sa Taipei sa June 29 para harapin ang Chinese Taipei at ang Australia sa July 2 na gagapin sa Philippine Arena sa Bulacan.

—-

Plano ni NBA most valuable player Kevin Durant na magretiro sa paglalaro sa edad na tatlumpu’t lima.

Paliwanag ng Golden State Warriors star, ang nasabing numero kasi ang kanyang jersey number.

Aminado naman si Durant na kahit masyado pang maaga ay pinaghahandaan na rin niya ang kanyang pagreretiro.

Sa ngayon, inaabangan ng NBA fans kung mananatili pa rin sa Golden State Warriors ang back-to-back finals MVP.

Samantala, sinabi naman ni ‘Warriors’ General Manager Bob Myers, na ibibigay nila kay Durant ang anumang suweldong naisin nito para hindi lumipat ng koponan.

—-

Nadagdagan pa ang mga koponang interesadong makuha si Cleveland Cavaliers star Lebron James.

Ito ay dahil magiging free-agent na simula sa Hulyo ang NBA Superstar na si Lebron.

Ayon kay Spurs Coach Greg Popovich , makikipagpulong sila kay Lebron sa mga susunod na araw.

Naniniwala si Popovich na sakaling makumbinsi at makuha nila si Lebron ay magiging isang malaking hamon ito sa kanilang koponan.

Kung sakali, makakatuwang ni Lebron sa Spurs sina Kawhi Leonard at Dejounte Murray.

Matatandaang maliban sa mga koponan na nag-iinteres kay Lebron ay ang Houston Rockets, Los Angeles Lakers at Philadelphia 76ers.

—-

Nakatakdang hirangin si Ronda Rousey bilang kauna-unahang babaeng makakapasok sa UFC Hall of Fame.

Ito’y sa gaganaping induction sa July 5 batay na rin sa report ng Los Angeles Times.

Ayon kay Rousey, itinuturing niya itong isang karangalan lalo’t bilang babae, hindi lang siya pinayagang makasali sa UFC kundi binigyan pa ng pagkakataong maging hall of famer.

Si Rousey ang kauna-unahang babaeng lumahok sa UFC noong 2012.

Nasikwat ng Pilipinas ang una nitong panalo sa first round ng FIBA 3×3 World Cup na ginaganap sa Philippine Arena, Bocaue, Bulacan.

Kasalukuyang nakapako ang Philippine Team sa 4th spot ng Pool C makaraang maungusan ang Brazil sa score na 15-7.

Kumamada ng tig-apat na puntos sina Stanley Pringle, Roger Pogoy at Troy Rosario habang nag-ambag ng tres si Christian Standhardinger para sa Pilipinas.

Gayunman, natalo ang mga basketbolistang Pinoy sa second round kontra Mongolia sa score na 17-21.

Aabot sa limang libong ($5,000) dolyar o 260,000 pesos ang pinakamahal na tiket sa bakbakang Manny Pacquiao at Lucas Matthysse.

Ayon sa ulat, simula sa susunod na Miyerkoles ay maaari nang mabili ang mga tiket para sa naturang salpukan na gaganapin sa Axiata Arena sa Kuala Lumpur Malaysia.

Ang ibang halaga ng tiket ay nasa ay nasa 250 hanggang 2,000 dollars depende sa powesto.

Ang laban nina Pacquiao at Matthysse ay matutunghayan sa Hulyo 15.

—-

Pasok na sa finals ng French Open si Spanish tennis star Rafael Nadal.

Ito ay matapos na idispatsa ni Nadal ang kalabang si Juan Martin Del Potro ng Argentina sa semifinals.

Nangibabaw ang kasalukuyang world number one na kinailangan ng dalawang oras para talunin si Del Potro sa iskor na 6-4, 6-1 at 6-2.

Si Nadal ay siyang pangalawang tennis player sunod kay Roger Federer na umabot sa labing isang (11) finals ng parehas na grand slam.

Makakaharap naman sa finals ni Nadal si Dominic Thiem ng Austria sa darating na linggo.

—-

Muling lalagda ng kontrata para sa Golden State Warriors si Kevin Durant.

Ito ay dahil sa magtatapos na ang dalawang taong kontrata ni Durant na nagkakahalaga ng 51 million dollars.

Kabilang sa mga option ni Durant ay ang paglagda sa apat na taong kontrata na nagkakahalaga naman ng 158 million dollars.

Si Durant ay kabilang sa all-star ng Warriors na mayroong average na 26 point 4 points, 6 point 8 rebounds at 5 point 4 assists sa animnapu’t walong (68) laro.

Matatandaang sa Game 3 ng NBA Finals kontra Cleveland Cavaliers, naging susi ng panalo ng Warriors si Durant matapos itong kumamada ng mahigit apatnapung (40) puntos.

—-