SPORTS

Inihain na sa senado ang panukalang pagkalooban ng Filipino citizenship ang American basketball player na si JUSTIN DOnta Brownlee.

Si senator Sonny Angara, Chairman ng Samahang Basketbol ng Pilipinas ang naghain ng Senate Bill 1516 kaparehong araw nang aprubahan ito ng Kamara.

Layon ng resolusyon na i-naturalize ang two-time best import awardee ng PBA na si Brownlee bilang manlalaro ng Ginebra San Miguel.

Sa February 2023 gaganapin ang ika-anim at huling window ng FIBA World Cup Asian qualifiers, kung saan makakaharap ng Pilipinas ang Lebanon at Jordan.

Planong gumawa ng partnership sa National Basketball League (NBL) ang Philippine Basketball Association (PBA).

Kasunod ito ng naganap na online meeting sa pagitan ng dalawang partido na dinaluhan ni NBL Commissioner Jeremy Joeliger; NBL General Manager Government Relations Tristan Russel; PBA Commissioner Willie Marcial; PBA Deputy Commissioner Eric Castro; at Social Media Chief Mich Flores.

Tinalakay sa meeting ang 7-point program na may layuning magkaroon ng exhibition matches sa pagitan ng mga team kung saan, magdadala ng atleta o all-star selection ang NBL para maglaro sa Pilipinas at vice versa.

Bukod pa dito, napag-usapan din ang mga liga, coaching, basketball clinics, outreach programs at game hosting sa mga kompetisyon.

Nakakuha na ng isang panalo para makapasok sa Final 4 ng Uaap Season 85 ang National University (NU).

Ito ay matapos padapain ng NU ang University of the East sa score na 70-61 panalo, sa laban ngayong araw sa Araneta Coliseum.

Si Pj Palacielo ng nu ang humila sa koponan para makuha ang panalo.

Tatanggalin na ng australia ang 3-year ban kay Tennis Star na si Novak Djokovic.
Ito ang kinumpirma ng Australian Immigration Minister Andrew Giles kung saan malaki na ang posibilidad na makapaglaro ito sa Australian open 2023.
Sa ngayon, binawi na ng australia ang kanilang mga requirement para sa mga bisita na magpakita ng proof of vaccination laban sa COVID.
Magugunitang pina-deport si Djokovic ng gobyerno ng Australia dahil sa hindi nito pagpayag na magpaturok ng COVID-19 vaccine.
Dahil dito ay hindi nakapaglaro ang serbian tennis star sa Australian open noong Enero.

Inilunsad ng FIFA ang social media protection service para bantayan ang mga football players na magkakalat ng hate speech at online discrimination sa kasagsagan ng 2022 World Cup sa Qatar.

Ayon kay FIFA President Gianni Infantino, ito ay sa pamamagitan ng pag-scan sa mga public-facing abusive, discriminatory at threatening comments sa social media accounts ng mga manlalaro.

Nabatid na layunin ng hakbang na ingatan ang mental health ng mga manlalaro at makag-pokus ito sa laban.

Malaki ang tiyansa na makalaro sa ilalim ng Gilas Pilipinas si Ginebra San Miguel Power Forward Justin Brownlee para sa 6^th Window FIBA World Cup Qualifiers na gaganapin sa bansa sa February 2023.

Ito’y matapos aprubahan sa unang pagbasa ng kongreso ang panukalang batas para maging Filipino citizen ang PBA import na si Brownlee na isa sa mga kailangan sa torneyo.

Nabatid na ang pag-apruba kay Brownlee ay malaking tulong sa Gilas para masungkit ang panalo laban sa Lebanon at Jordan.

Sa ngayon, patuloy pang kinukumpleto ang mga kailangang dokumento ni Brownlee para tulungan ang Gilas sa kompetisyon.

Opisyal nang tinanggal ng Jose Rizal University (JRU) si John Amores sa Heavy Bomber team mula sa indefinite suspension nito.

Ayon sa unibersidad, hindi na rin magiging bahagi si Amores ng iba pang sports program ng JRU.

Isasailalim din anila ang manlalaro sa counseling upang malampasan ang mga pangyayari.

Matatandaang humingi ng paumanhin ang JRU kaugnay sa insidente na naganap noong November 8 sa laban nito sa De La Salle-College of Saint Benilde kung saan sinapak ni Amores ang ilang manlalaro nito.

Nakatakdang ganapin sa Philippine Arena sa Bocaue, Bulacan ang 6th Window ng 2023 FIBA World Cup Asian Qualifiers sa Pebrero ng susunod na taon.

Ito ang inanunsyo ni Samahang Basketbol ng Pilipinas (SBP) Executive Director Sonny Barrios sa Philippine Sportswriter Association Forum.

Aniya, isa itong malaking pagkakataon para sa mga local organizing committee na makapaghanda bago ang nasabing event.

Samantala, makakalaban ng Gilas Pilipinas ang Lebanon sa Pebrero 24 habang sa Pebrero 27 naman ang Jordan.

Nasungkit ni Pinoy Wakeboarding Athlete Raph Trinidad ang silver medal sa International Waterski and Wakeboarding Federation (IWWF) championship sa Thailand.

Ito ay matapos na makakuha ng 85.67 na iskor para sa Men’S Wakeboard finals open.

Si Trinidad ang pinaka-unang pilipino na nakakuha ng spot sa world rankings ng wakeboarding.

Noong 2019, nakuha rin ng atleta ang silver medal sa 10th IWWF World Wakeboard Championships at 2019 Southeast Asian Games.

Pasok na sa final 4 ng NCAA Season 98 ang De La Salle-College of St. Benilde (CSB).

Ito ay matapos padapain ng Benilde ang San Sebastian College-Recoletos sa score na 83-78 sa Fil-Oil Eco-Oil Centre sa San Juan.

Kauna-unahang pagkakataon ito simula noong 2002 na makalalaro sa final 4 ang CSB, matapos mabigo noong Season 97.

Maliban sa Benilde, ang isa pang paaralang pasok sa final 4 ay ang San Beda University.