Pasok na sa finals ng Wimbledon si dating World Number One Serena Williams.
Ito ay matapos niyang pataubin ang kalabang si Georges ng Germany sa iskor na 6-2, 6-4.
Dahil dito, isang hakbang na lang si Williams para masungkit ang ikawalo niyang Wimbledon title.
Makakaharap naman ni Williams sa finals ang isa pang German na si 11th seeded na si Angelique Kerber.
Lusot na sa finals ng FIFA World Cup ang Croatia.
Ito ay matapos patalsikin ng Croatia ang powerhouse team na England sa iskor na 2 – 1.
Unang nakapagtala ng goal ang ranked 12 na England sa unang limang minuto subalit pagpasok ng second half ay naitabla ng Croatia ang iskor sa 1-1 sa loob ng 68th minute.
Natapos ang regular time nang tabla kaya’t nagkaroon ng 30 minutong extra time.
Sinamantala naman ito ng Croatia para makapag-goal sa 11 minutong natitira sa extra time.
Ito ang kauna-unahang pagkakataon nna nakapasok sa finals ang Croatia.
Makakalaban nila sa finals ang ranked 7 na France sa darating na Linggo.
Namayagpag ang San Miguel Beermen sa best of three quarterfinals kontra TNT Katropa.
Bagama’t dikit ang laban sa iskor na 106-102 tinapos ng Beermen ang kanilang paghaharap.
Aminado ang koponan na pahirapan masungkit ang panalo sa TNT dahil sa mahusay na depensa ng kanilang kalaban.
Dahil sa panalo makakasagupa ng San Miguel ang Alaska Aces sa semi-finals ng PBA Commissioner’s Cup.
Tiniyak ni Lucas Matthysse na kanyang ipalalasap muli kay dating eight division world champion Manny Pacquiao ang sinapit ng Pambansang Kamao kay Juan Manuel Marquez.
Tulad aniya ni Marquez, kanyang pababagsakin si Pacquiao gamit ang kanyang bilis at lakas.
Ayon sa kampo ng Argentinian boxer, hindi matatawaran ang lakas ng kaliwat kanang suntok ni matthysse.
Dahil dito, kumpiyansa silang sapat ang kanilang naging paghahanda para patulugin ang pambansang kamao.
Dumating na sa Kuala Lumpur Malaysia si fighting senator Manny Pacquiao para sa nalalapit nitong laban sa darating na Linggo kontra kay Lucas Matthysse ng Argentina.
Bitbit ni Pacquiao ang dalawandaan (200) kataong kinabibilangan ng kanyang team, pamilya at mga kaibigan.
Kabilang dito ang tatay ni Pacquiao na si Rosalio na sinasabing immune na sa panonood ng mga laban ng kanyang anak.
Samantala, inaasahan ding manonood sa laban ni Pacquiao si Pangulong Rodrigo Duterte bilang bahagi ng biyahe nito sa Malaysia para pulungin ang bagong upong Prime Minister na si Mahathir Mohamad.
Ang bakbakang Pacquiao-Matthysse ay gaganapin sa Axiata Arena sa Kuala Lumpur sa darating na Linggo.
Mananatiling magkasama sa iisang koponan sina NBA most valuable player James Harden at nine time NBA all-star Chris Paul.
Kasunod ito ng opisyal nang pagpirma ni Paul sa isang panibagong kontrata sa Houston Rockets.
Sinasabing nagkakahalaga ng 160 million dollars ang apat na taong kontratang nilagdaan ni Paul sa Rockets.
Magugunitang, sa unang season na paglalaro ni Paul sa Rockets, nakagawa ito ng average score na 18.6 points, 7.9 assists, 5.4 rebound at 1.66 na block.
Tutulak na patungo ng Malaysia ang team Manny Pacquiao para sa kanyang laban kay Argentine boxer Lucas Matthysse sa July 15.
Kasama ni Pacquiao ang may dalawandaang (200) miyembro ng kanyang entourage na kinabibilangan ng mga miyembro ng Team Pacquiao, mga miyembro ng pamilya, mga kaibigan, local media at iba pang supporters.
Bago ang pagtungo niya sa Malaysia, isang misa ang siniagawa sa Word for Everyone Church sa General Santos City kung saan ipinagdasal ng kongregasyon ang tagumpay ng fighting senator.
Buo na ang huling apat na koponang maglalaban para sa semi-finals ng FIFA World Cup ngayong taon.
Kumumpleto sa last 4 ang Croatia matapos nitong pataobin ang host country na Russia sa iskor na 4 -3.
Naging emosyonal naman ang mga nagsipagnood sa Fisht Stadium matapos hindi makapasok ang Russia.
Una rito, nakapasok naman ang England sa semi-finals sa kauna-unahang pagkakataon simula noong 1990 matapos nilang talunin ang Sweden.
Nalaglag naman sa final four ang most ravorite team na Brazil matapos hindi makaporma sa Belgium.
Habang nasungkit din ng France ang isa pang pwesto sa semi finals nang manalo naman kontra sa Uruguay.
Samantala, nakatakda naman ang laban ng France at Belgium sa July 11 habang ang England at Croatia ay matutuos sa July 12.
Sa wakas ! Nakasungkit din ng unang panalo ang Batang Gilas sa pagpapatuloy ng kanilang kampanya sa 2018 Fiba Under-17 Basketball World Cup.
Ito’y matapos na pataubin ang Egypt sa score na 70-69 sa Technological University Stadium in Santa Fe, Argentina.
Magandang laro ang ipinamalas ni Kai Sotto na nag-ambag ng 28 points, 17 rebounds, at tatlong blocks sa panalong ito ng Batang Gilas.
Matatandaang, limang magkakasunod na pagkatalo ang nalasap ng Philippine team na posibleng bumagsak sa 13th place ng Fiba U-17 World Cup.
Handa na si Senador Manny Pacquiao sa kanyang laban kay Lucas Matthysse ng Argentina.
Kahapon, tinapos na ng dating eight-division world champion ang kanyang training sa General Santos City sa pamamagitan ng limang rounds ng sparring.
Ayon kay Coach Buboy Fernandez, masaya at kuntento si Pacman sa pag-eensayo nito lalo’t pawang Pilipino ang member ng kanilang Team Pacquiao.
Bukod sa Pambansang Kamao at Fernandez, kabilang din sa training camp ang kapatid ni Buboy na si Haplas, Nonoy Neri, Jonathan Peñalosa, Ting Arriosa at Nonito Donaire Sr.
Samantala, nasa Kuala Lumpur, Malaysia na si Matthysse para sa kanilang sagupaan na gaganapin sa Hulyo 15.