SPORTS

Nagpahayag ng suporta ang Philippine Basketball Association sa Gilas Pilipinas kasunod ng ipinataw na suspensyon sa mga manlalaro nito at dalawang coach.

Ayon kay PBA Commissioner Willie Marcial, handa silang magpahiram ng mga manlalaro sa national team.

Dagdag pa ni Marcial, mayroong mga players ang Gilas mula sa 12-miyembro ng liga na maaaring maglaro sa mga susunod na laban tulad ng World Cup Asian Qualifiers at maging sa Asian Games sa Agosto.

Gayunman, nilinaw ni Marcial na desisyon pa rin ito ng mga players kung nais nilang maging kahalili ng mga nasuspindeng manlalaro ng Gilas Pilipinas.

Coach Chot Reyes

Samantala, ginagalang naman ni Gilas Pilipinas Head Coach Chot Reyes ang parusang ipinataw sa kaniya at ng kaniyang mga manlalaro ng FIBA.

Batay sa social media post ni Reyes, sinabi nito na kaniyang nirerespeto ang desisyon ng FIBA kasabay ng paghingi ng tawad sa kanilang kinasangkutang gulo.

Gayunman, nanindigan ang Coach na kailanman ay hindi siya sa mag-uudyok sa kaniyang mga manlalaro na magsimula ng away.

—-

Move on…

Ito ang paki-usap ni San Antonio Spurs Greg Popovich sa lahat matapos silang magdesisyong i-trade sa Toronto Raptors si Kawhi Leonard.

Ayon kay Popovich, ito na ang tamang panahon para pakawalan si Leonard na dati pa aniyang gustong lumipat ng koponan.

Sinabi ni Popovich na sinikap naman nila noon na mapanatili pa sa kanilang koponan ang dating NBA Finals MVP at two-time defensive player of the year na si Leonard.

Gayunman, ayaw nang balikan ni Popovich ang nakaraan at mas maigi aniyang pagtuunan ng pansin ang pagpasok sa kanilang koponan ni four time All-Star Demar Derozan na labis aniya niyang kinasasabikan.

—-

Sinuspinde na ng Philippine Basketball Association o PBA ang Game 3 sa Commissioner’s Cup semi-finals sa pagitan ng Alaska at San Miguel sa Smart-Araneta Coliseum na naka-schedule sana mamayang gabi.

Ayon sa PBA, masama ang lagay ng panahon at may nakataas pang orange warning sa Metro Manila kaya’t nagpasaya silang i-urong ang laban sa Biyernes, alas-7:00 ng gabi na gaganapin naman sa Ynares Center sa Antipolo City.

Kasalukuyang hawak ng Beermen ang 2-0 lead laban sa Alaska at target nilang walisin sa semi-finals ang Aces.

—-

Handa nang harapin ni British boxer Amir Khan si fighting Senator Manny Pacquiao.

Ito ang inihayag mismo ni Khan kung saan posible aniyang mangyari ang laban bago magtapos ang taon o sa 2019.

Naniniwala ang British boxer na kapwa sila ni Pacquiao may magandang kondisyon ng pangangatawan para maisakatuparan ang isang magandang laban.

Nakatakdang sumabak sa laban si Khan kontra kay Samuel Vargas sa Setyembre.

—-

Nakabalik sa top 30 ng WTA si Serena Williams matapos itong umakyat ng 153 spot nang magtapos siyang runner up sa torneo.

Ito pa lamang ang ika-apat na pagkakataong naglarong muli si Willliams matapos itong manganak.

Nakaabot pa ng finals si Williams bago ito yumukod kay Angelique Kerber ng Germany at makuha ang 28th rank sa WTA.

Pumang apat sa ranking si Kerber, samantalang nanatili sa numero uno si Simona Halep.

—-

Itinanghal na pinakamagaling na player sa 2018 Fifa World Cup si Luka Modric ng Croatia.

Ginawaran si Modric, ang team captain ng Croatia national team ng golden ball award dahil na rin sa nagawa nito para dalhin sa finals ang kaniyang koponan

Nagkamit naman si Harry Kane ng England ng golden boot award dahil sa kaniyang anim na goal, na siyang pinamakarami sa buong world cup.

Habang inuwi naman ni Kylian Mbappe ng France ang Fifa young player award.

Ang Belgian goalkeeper na si Thibaut Courtois ang ginawaran ng best glove award habang nakuha ng Spain ang Fifa fair play trophy.

Maliban sa bakbakang Pacquiao – Mathysse bukas, inaabangan na rin ang paghaharap ng France at Croatia sa 2018 Fifa World Cup finals na gagawin bukas, 11:00 ng gabi, oras sa Pilipinas.

Inaasahang magiging matindi ang labanan sa pagitan ng dalawang bansa na maituturing ding rematch mula sa kanilang huling paghaharap noong 1998 sa semi-finals ng nasabing torneo.

Dahil dito, sinasabing pagkakataon na ito ng Croatia na agawin sa France ang kampiyonato sa prestihiyosong football game lalo’t kapwa malakas ang dalawang koponan.