SPORTS

Tiwala ang beteranong Top Rank promoter na si Bob Arum na susunod sa yapak ng Filipino boxer na si Gabriel “flash” Elorde ang kanyang apo.

Ayon kay Arum, nanalaytay sa ugat ni Juan Miguel Elorde ang dugong kampeon katulad ng kaniyang lolo.

Kumpiyansa si Arum na maipapanalo nito ang nakatakdang laban nila ni WBO junior featherweight world champion Emanuel Navarrete mula sa Mexico.

Isa umanong karangalan para kay Arum ang muling magabayan sa boxing ring ang isang Elorde.

Matatandaang kinilala si flash Elorde bilang pinoy world champion na sinundan naman ni fighting Senator Manny Pacquiao.

Ipagbabawal na ng NBA ang pagsusuot ng “ninja-style” na headbands ng mga manlalaro sa susunod na season.

Ang nasabing headband na sinimulang suotin noong nakaraang season ay isang tela na nilalagay sa ulo ng mga players at nakatali sa likod kung saan nakalaylay lamang ang dalawang dulo nito.

Batay sa ipinalabas na pahayag ni NBA Spokesman Mike Bass sa ESPN, hindi bahagi ng uniporme ng NBA ang ninja style headband at hindi rin dumaan sa proseso para maaprubahan ang pagsusuot nito.

Aniya, ilang mga koponan ang nagpahayag ng pagkabahala kaugnay sa kaligtasan sa pagsusuot ng nasabing headwear.

Gayundin sa sukat, haba at paraan ng pagsusuot nito na kinakailangan pang isailalim sa pag-aaral kung tuluyang ikukunsidera bilang bahagi ng uniporme batay na rin sa sinusunod na regulasyon.

Napasakamay ni Serena Williams ang ika-24 na grand slam title nito sa kaniyang 24 na taong career.

Matapos talunin si Elina Svitolina, nakatiyak na si Williams ng spot sa U.S. Open final.

Magugunitang naging emosyonal si Williams nang matalo kay Naomi Osaka noong isang taon at inalat sa dalawang Wimbledon finals simula nang magbalik siya sa paglalaro.

Nabigo ang Gilas Pilipinas na manalo kontra sa Angola sa iskor na 81-84, sa pagtatapos ng kanilang kampanya sa group phase ng FIBA World Cup 2019 sa bansang China.

Matapos ang pagkatalo ng Gilas laban sa Italy at Serbia, sinubukan parin nilang bumawi laban naman sa Angola ngunit hindi parin umubra sa huli.

Nangibabaw naman ang Gilas na may rank na no. 31 sa buong mundo.

Tumipon ng 23 points at 12 rebounds si Andray Blatche habang sinundan naman ito ni Cj Perez na nagtala ng 17 points.

Samantala, babyahe ang Gilas papuntang Beijing upang harapin naman ang Iran at ang matatalo sa hiwalay na laro ng Puerto Rico at Tunisia.

Sa panulat ni Lyn Legarteja.

Target ng Gilas Pilipinas na magpasaya na lamang ng kanilang mga fans sa laro nila laban sa Angola sa FIBA World Cup.

Ayon sa rookie na si CJ Perez, ang goal nila sa ngayon ay maibsan ang lungkot ng mga kababayan na walang pagod sa panunuod ng kanilang mga laban.

Samantala, naniniwala naman si Coach Yeng Guiao na, nauunawaan ng mga Filipino fans ang malaking hamon na kanilang kinakaharap sa pagsabak nila sa FIBA World Cup.

Una rito, magkasunod na talo ang dinanas ng Gilas Pilipinas mula sa Italy na pinanuod pa ng Pangulong Rodrigo Duterte sa China at mula sa Serbia.

Ikinakasa na ng National Capital Region Police Office (NCRPO) ang kanilang ilalatag na seguridad para sa SEA Games 2019 sa Nobyembre.

Ito’y makaraang ipabatid ng Philippine Southeast Asian Games organizing committee na 12 sports venue sa Metro Manila ang pagdarausan ng mga palaro.

Ayon kay NCRPO Chief, Police M/Gen. Guillermo Eleazar, maliban sa Metro Manila may mga sports event din ang isasagawa sa Bulacan, Tagaytay at sa New Clark City Sports Complex sa Capas, Tarlac.

Inaasahang nasa 1,000 atleta ang makikilahok mula sa mga bansang kasapi ng ASEAN tulad ng Vietnam, Thailand, Myanmar, Laos, Indonesia, Cambodia, Timor Leste at Singapore.

With report from Jaymark Dagala

Target ng Gilas Pilipinas na maging dikitan ang kanilang laban sa Serbia sa pagpapatuloy ng FIBA World Cup.

Ayon kay Coach Yeng Guiao, sisikapin nilang mamayani laban sa Serbia at hindi maulit ang resulta ng laban nila sa Italy kung saan nagtapos ang laro sa 109-62 pabor sa Italya.

Sakaling matalo sa Serbia ang Gilas, hindi na ito makakalahok sa second round at kailangan na nilang sumailalim sa classification phase.

Hindi na nakabangon pa ang Czech Republic sa team USA sa kanilang paghaharap sa FIBA World Cup.

Sa iskor na 88-67 wagi ang team USA na pinangunahan ng 16 na puntos ni Donovan Mitchel habang mayroong 14 na puntos si Harrison Barnes.

Nag-ambag naman ng 13 puntos si Kemba Walker habang mayroong 10 puntos si Jayson Tatum.

Unang bahagi pa lamang ng laro ay hawak na ng USA ang kalamangan at hindi na hinayaan pa na makalamang pa ang Czechs.

Inilampaso ng Italy ang Philippine Men’s National Basketball Team sa score na 108-62 sa una nilang laban sa 2019 Fiba World Cup sa Foshan International Sports and Cultural Arena sa China kagabi.

Gumawa ng 19-0 run sa unang quarter ang mga Italyano at mula noon ay hindi na lumingon pa ang mga ito.

Walang naisagot ang mga Pinoy sa mga pinaulan na tres ng mga kalaban sa laro na pinanood pa ni Pangulong Rodrigo Duterte.

Para makapasok sa susunod na round, kailangang talunin ng Gilas Pilipinas ang dalawang malalakas na koponan ng Serbia at Angola.

Inamin ni Gilas Pilipinas Head Coach Yeng Guiao na hirap silang maabot ang target na maging best asian team sa nalalapit na FIBA World Cup.

Sinabi ni Guiao na sakaling hindi makapasok ang China sa susunod na round makikipag tagisan sila para sa best placing sa naturang torneo bagamat hindi nila ito aniya kontrolado lalo pa’t hawak ng host nation na China ang bentahe sa best finish.

Una nang ibinunyag ni Guiao na isa rin sa kanilang layunin sa World Cup ay maging pinakamagaling na koponan sa rehiyon na otomatikong mapapasama sa main draw ng 2020 Olympics sa Tokyo, Japan.

Ang Pilipinas ay huling sumabak sa Olympics noong  1972 sa Munich kung saan kabilang sa team noon sina Bog Adornado, dating Senador Freddie Webb at Manny Paner.

Sakaling mabigo ang Gilas na masungkit ang top asian ranking dadaan sa masalimuot na qualifying process ang mga Pinoy sa susunod na taon.