SPORTS

Pumirma na ng kontrata ang basketball player na si Vince Carter sa Atlanta Hawks para sa 2019-2020 NBA Season.

Wala pang ibang inilabas na detalye tungkol sa kontrata ngunit ito na ang huling season ni Carter sa NBA.

Gagawa ng kasaysayan si Carter sa kanyang huling taon.

Siya na ang tatanghaling kauna unahang player na lumahok sa higit 20 season ng NBA.

Si Carter rin ang natatanging manlalaro sa liga na nakapaglaro sa loob ng apat na dekada.

Maliban sa kanya ay kumpirmado na ring maglalaro sa Hawks ang NBA guard player na si Tahjere Mc call.

Tinalo ng Meralco Bolts ang Magnolia Hotshots sa score na 98-92 sa PBA Governor’s Cup 2019 na ginanap sa Araneta Coliseum kagabi.

Halos 16 na puntos ang lamang ng Hotshots ngunit pagdating ng second half ng fourth quarter ay naungusan na sila ng Bolts.

Namayagpag si Bolts player Chris Newsome na nakapagtala ng 22 points, 10 rebounds at tatlong assist.

Sinelyuhan naman ang panalo ng Bolts ni Baser Amer matapos pumasok ang kanyang free throw tatlong segundo bago matapos ang laro.

Samantala, maghaharap naman ang Rain or Shine at Columbian Dyip mamayang alas kwatro imedya ng hapon at Ginebra at Alaska mamayang 6:45 ng gabi.

Nasungkit ni Olympic silver medalist Hidilyn Diaz ang bronze medal sa 2019 World Weightlifting Championship sa Pattaya, Thailand.

Nakapagtala si Diaz ng 121 kilograms sa clean and jerk category dahilan upang makuha ang nabanggit na medalya.

Unang nakapagtala ng 93 kilograms sa snatch category si Diaz pero nabuhat niya ang mas mabigat pa rito sa sumunod na kategorya.

Itinanghal namang kampeon ang Chinese weightlifter na si Liao Qiuyun habang nakuha ng kababayang si Zhang Wangiong ang silver medal.

Sa pamamagitan ng kanyang post sa twitter, nagpasalamat si Diaz sa kanyang mga magulang at sa mga nagdasal para sa kanyang tagumpay.

Samantala, nasungkit naman ni Margielyn Didal ang ika 8 na puwesto sa quarterfinals dahilan upang mag-qualify ito sa semifinals ng street league skateboarding global qualifiers sa Sao Paulo, Brazil.

Magbabalik na sa basketball court ang beteranong manlalaro na si Joe Johnson matapos pumirma na ng kontrata sa Detroit Pistons.

Base sa tala, si Johnson ay 17 taon nang naglalaro sa NBA kung saan ay mayroon na siyang higit 1,000 laro.

Naging miyembro na rin siya ng ibang koponan katulad ng Boston Celtics, Phoeniz Suns, Atlanta Hawks, Brooklyn Nets, Miami Heat at Utah Jazz.

Matatandaang itinanghal ng Most Valuable Player si Johnson sa big three 3 on 3 ngayong taon.

Inilabas na ng FIBA ang listahan ng 24 na koponan na lalahok sa apat na Olympic qualifying tournament.

Ang mga mananalo sa naturang tournament ay makakasama ng walong automatic qualified teams para sa Tokyo 2020 Olympics.

Ang walong ito ay ang mga koponan mula sa Argentina, Australia, Spain, France, Iran, Japan, Nigeria at Estados Unidos.

Gaganapin ang qualifying tournament sa ika -23 hanggang ika-28 ng Hunyo sa susunod na taon.

Samantala, tuluyan nang naglaho ang tiyansa ng Gilas Pilipinas matapos hindi makasama sa naturang listahan.

Sa ngayon ay nasa rank 31 ang koponan matapos ang isinagawang FIBA World Cup 2019.

Hinamon ni Top Rank Promotions Chief Bob Arum si Senador Manny Pacquiao na magretiro na sa pagbo-boxing.

Ayon kay Arum hindi matatawaran ang pagiging mabuting boksingero at tao ni Pacquiao kaya’t hindi na makakabuti sa kaniyang kalusugan kung may susunod pang laban ito.

Tinukoy ni Arum ang laban ni pambansang kamao kay Keith Thurman na bagamat nanalo ito ang mga tinamong tama ng Senador ay posibleng makaapekto sa kaniyang buhay.

Gayunman isinulong ni Arum na makaharap muli ni Pacman si Floyd Mayweather bago mag retiro at kung hindi ito mangyayari, mag retiro na nga rin si Pacman.

Wagi ang University of the Philippines (UP) Fighting Maroons kontra sa National University (NU) Bulldogs sa Men’s Basketball Tournament ng UAAP Season 82.

Sa iskor na 80-79, pinaboran ang Fighting Maroons kung saan pinangunahan ni Kobe Paras na nagpakawala ng 25 points at 6 rebounds.

Dahil dito naitala ang 3-1 win-loss record ng UP habang 0-4 win-loss record naman ang NU.

Pumirma ng kontrata sa phoenix ang mga free agent na sina RR Garcia at Davon Potts.

Inanunsyo ng Phoenix ang pagkuha sa 2 players sa kanilang twitter account.

Si Garcia na naging most valuable player sa UAAP para sa Far Eastern University ay huling naglaro sa TNT.

1 taon nang hindi nakapaglaro ang 20 anyos na guard na ika-6 na over all pick ng global port sa PBA draft nuong 2013.

Habang si Potts ay hindi nag renew ng kontrata nito sa Alaska 2 taon matapos itong mapiling pang 6 sa 2nd round ng rookie draft.

Umaasa ang Phoenix na mapapalakas nina Garcia at Potts ang backcourt ng koponan matapos silang magtapos sa ika-10 pwesto sa nakaraang commissioners cup.

Opisyal nang magsisimula ang paghahanda ng 3 host countries para sa 2023 FIBA World Cup.

Ibinigay na ni Chinese Basketball Association Chairman Yao Ming ang bandila kay Samahang Basketbol ng Pilipinas Emeritus Manny Pangilinan.

Nanghingi naman ng dasal at tulong sa publiko si Pangilinan para sa matagumpay na pagsasagawa ng FIBA World Cup at para maipakita ang galing ng mga Pilipino.

Ang Pilipinas, Indonesia at Japan ang 3 bansa na hahawak sa naturang basketball tournament.

Nasungkit muli ng Spain ang kampeonato sa FIBA Basketball World Cup matapos ang 13 taon.

Kasunod na rin ito nang pagpapataob ng Spain sa Argentina matapos maging agresibo at hindi na bumitaw sa kanilang lamang tungo sa final score na 95-75.

Matibay din ang naging depensa ng koponan laban sa 2004 olympic champions na kalaban.

Ang point guard na si Ricky Rubio ay nakapagtala ng 20 points at 3 assists at itinanghal na Most Valuable Player.