SPORTS

Wagi ang Ateneo Blue Eagles sa laban kontra University of the Philippines (UP) fighting maroons sa University Athletic Association of the Philippines (UAAP) men’s basketball game.

Nakapagtala ng kabuuang puntos na 86 ang blue eagles samantalang 64 naman ang nakuha ng fighting maroons.

Pinangunahan ni Blue Eagles center player Ange Kouame ang pagkapanalo ng kanyang koponan na nakapagtala ng 20 puntos at 12 rebounds.

Dahil sa pagkapanalo ay paasok na sa finals ng men’s basketball ang Ateneo blue eagles.

Hindi pa rin tapos ang konstruksyon ng ilang mga pasilidad sa bansa na pagdadausan ng iba’t-ibang sport event na bahagi ng 30^th Southeast Asian Games (SEA).

Isang buwan bago opisyal na magsimula ang prestihiyosong sports tournament, mayroon pa ring mga sport facilities ang hindi pa 100% tapos.

Base sa report, ang Ninoy Aquino Stadium kung saan gaganapin ang taekwando at weightlifting events ay nasa 80% tapos.

Patuloy pa rin ang ginagawang renovation sa Rizal Memorial Football Stadium at tennis facilities sa Maynila.

Ayon sa Philippine Sports Commission (PSC), ikinukunsidera nilang ilipat sa Manila Polo Club ang squash tournament dahil maaaring hindi matapos sa itinakdang oras ang inilaang pasilidad dito sa Rizal Memorial Sports Complex.

Gaganapin ang opening ceremony ng 30^th SEA games sa Nobyembre 30 sa Philippine Arena sa Bulacan.

Hinahanapan na ng kapalit ni Gilas Pilipinas Head Coach Tim Cone ang manlalarong si Jayson Castro matapos makumpirmang nagtamo ito ng injury sa nakaraang laban ng TNT at NLEX sa PBA.

Ayon kay Cone, malabo nang makapaglaro si Castro para sa Gilas Pilipinas sa darating na SEA Games dahil kakailanganin nitong magpahinga ng apat hanggang anim na linggo.

Aniya, hindi na nila matitiyak kung sasapat pa ang nalalabing panahon para makapag-practice pa si Castro lalo’t magsisimula na ang basketball competition sa SEA Games sa December 4.

Aminado naman si Cone na magiging malaking kawalan sa Gilas Pilipinas ang veteran guard na si Castro.

Nakamit ng Oklahoma City Thunders ang kanilang unang panalo matapos talunin ang Golden State Warrior sa laban na bahagi ng NBA 2019-2020 season.

Nakapagtala ng score na 120 points ang Thunders samantalang 92 points naman ang nakuha ng Warriors.

Pinangunahan ni Dennis Schroder ang pagkapanalo ng Thunders na nakapagtala ng 22 puntos.

Ito na ang ikalawang talo ng Warriors mula nang magbukas ang season.

Susunod na makakalaban ng warriors ang New Orleans samantalang Houston Rockets naman ang makakalaban ng Thunders.

Wagi ang Meralco Bolts sa laban nito kontra San Miguel Beermen kagabi bilang bahagi ng 2019 PBA Governor’s Cup.

Nakapagtala ng score na 125 ang bolts samantalang 99 naman ang nakuha ng beermen.

Pinangunahan ng import na si Allen Durham ang panalo ng Meralco.

Nakapagtala ito ng 29 na puntos, 15 rebounds at labing isang assist.

Samantala, magaganap naman sa Miyerkules, Oktubre 30 ang susunod na labanan sa naturang basketball tournament.

Maglalaban ang Rain or Shine at Road Warrios sa ganap na 4:30 ng hapon samantalang maghaharap naman ang San Miguel at Blackwater sa ganap na 7:00 ng gabi.

Humataw nang husto ang Barangay Ginebra sa fourth quarter dahilan upang mapataob nila ang Rain or Shine sa score na 98-89 sa kanilang laro sa 2019 PBA Governors’ Cup sa Araneta Coliseum.

Kumamada si Justin Brownlee ng 39 points, 17 rebounds at 8 assists habang nagtala sina Scottie Thompson at L.A Tenorio ng tig-11 points bawat isa.

Nakalamang pa ang Elasto Painters sa unang bahagi ng ika-apat na quarter pero nagpaulan ng puntos ang Gin Kings sa pangunguna ni Brownlee.

Sa isa pang laro, pinadapa ng Alaska Aces ang Blackwater Elite sa score na 101-91.

Si Jeron Teng ang nanguna sa Aces taglay ang kanyang 19 points at 8 rebounds.

Malaki ang posibilidad na muling sumabak sa loob ng boxing ring si fighting Senator Manny Pacquiao sa susunod na taon ayon kay Coach Freddie Roach.

Aniya, maaaring makaharap ng pamabansang kamao si dating American boxing champion Danny Garcia.

Bukod dito ay inilutang din ni Roach ang mga pangalan ng ilang mga boksingero na sina Mikey Garcia at Errol Spence.

Kung matutuloy ang naturang laban ay gaganapin ito sa Pebrero sa susunod na taon.

Tutulak pa ibang bansa ang mga miyembro ng Philippine National Polo team para sumailalim sa matinding training bago sumabak sa 30th South East Asian Games sa susunod na buwan.

Ipinabatid ni House Deputy Speaker Mikee Romero, founding director ng Philippine National Federation of Polo Players na tutungo ang national squad sa Argentina, Australia, at Amerika para magsanay sa ilalim ng mga kilalang Argentine at American coaches.

Makakasama ni Romero na magsanay sa Buenos Aires ang limang (5) national players, gayundin sina coach Anthony Garcia at team manager Lope Juban.

Sinabi ni Romero na target nilang humakot ng dalawang (2) gintong medalya kaya’t mahigpit na magsasanay para sa team Philippines.

Umakyat sa rank 13 ang Pinay tennis player na si Alex Eala batay na rin sa Juniors’ World Tennis rankings ng  International Tennis Federation (ITF).

Si Eala ay umakyat sa rank 13 mula sa rank 26 nang makakuha ng silver medal sa World Super Juniors Tennis Championship -Osaka Mayor’s Cup sa Japan nitong nakalipas na October 14 hanggang 20.

Pumuwesto si Eala sa 26th spot matapos ang kaniyang silver medal finish sa ITF Junior Grade A Tournament sa Cape Town, South Africa noong isang buwan.

Si Eala na isang Rafael Nadal Academy Scholar ay gumawa ng ingay matapos ang kaniyang pagsali sa US Open Junior’s Tournament kung saan pumasok ito sa second round ng torneo.

Target ni Eala ang SEA games gold medal sa pag host ng bansa sa SEA games simula sa November 30.

Malaki ang posibilidad na hindi makapaglaro sa darating na NBA season ang basketball player na si Klay Thompson.

Ayon kay Golden State Warriors head coach Steve Kerr, ito ay dahil pa rin sa natamong injury sa left anterior cruciate ligament ni Thompson.

Maaari aniya itong makaapekto sa performance ng koponan.

Dagdag pa nito, ang ganitong klase ng injury ay kinakailangan ng isang taong paggaling at hindi lang sa loob ng 1 buwan.

Sa ngayon ay bukas pa rin aniya ang pinto ng koponan oras na maging matagumpay ang theraphy ni Thompson.