SPORTS

Naghihintay na ang mga koponan ng National Basketball Association (NBA) sa ilalabas na guidelines o panuntunan nito para makapagsimula nang  mag-ensayo ang mga manlalaro nito.

Batay sa mga report, inaasahan sa mga susunod na araw ay ilalabas na ni NBA Commissioner Adam Silver, ang mga ipatutupad na bagong panuntunan sa unti-unting pagbabalik ng mga laro sa ginta ng COVID-19 crisis.

Kabilang na rito ang “two-week recall” of players, kung saan dapat sumailalim sa quarantine ang lahat ng manlalaro oras na dumating na ang mga ito sa pagdarausan ng laro.

Kasunod nito, magsasagawa rin ang mga manlalaro ng nasa dalawang linggong individual workouts na gaganapin sa kanilang mga practice facility at tatlong linggo pa sa training camp nito.

Samantala, umaasa naman ang mga koponan ng nba na matatapos na ang krisis dala ng coronavirus disease 2019 (COVID-19) pandemic para makapaglaro na ang mga ito sa mga susunod na buwan.

Bubuksan na ang Watskins Glen International Auto Race Track at ilang karerahan ng kabayo sa New York City usa simula June 1.

Ito ang inanunsyo ni New York Governor Andrew Cuomo, bagama’t walang papasuking mga fans.

Ayon kay Coumo, suportado niya ang pagbabalik na ng mga sports events sa siyudad.

Magpapalabas din sila ng guidelines para sa mga sasabak sa anumang klase ng karera para matiyak na walang papasuking manonood at mga fans.

Magugunitang pansamantalang ipinasara ang lahat ng auto at horse race tracks sa New York City bunsod ng pagsirit sa bilang ng kumpirmadong kaso ng coronavirus disease 2019 (COVID-19) doon., dahilan naman ng pagkakaantala ng mga malalaking event.

Nananawagan si Olympic Chief Thomas Bach na maging alerto at matiyaga sa isinasagawang paghahanda para sa naantalang Tokyo Summer Olympics.

Ayon kay Bach, mayroon pa silang mahigit isang taon para magpasiya hinggil sa pangangasiwa sa mga sports na kinakailangan ng human to human contact sakaling wala pa ring mabuong bakuna laban sa COVID-19.

Tiniyak ni Bach, na magiging alinsunod sa abiso ng World Health Organization (WHO) ang kanilang magiging pasiya rito.

Kaya naman iginiit ni Bach na kinakailangang maging mapagbantay at maingat ang lahat lalo na’t wala pang nakatitiyak ng mangyayari sa Hulyo ng susunod na taon.

Nakalalakad nang mag-isa si six time PBA MVP June Mar Fajardo, apat na buwan matapos na magkaroon ng injury sa kanyang kanang paa.

Ayon kay Fajardo, maayos na ang kanyang kalagayan at unti-unti nang nakalalakad ng walang saklay o tulong.

Dagdag ni Fajardo, nagsisimula na rin siyang mag-work out bagama’t sa kanya pa lamang upper body.

Umaasa rin ang San Miguel Center na tuloy-tuloy na rin ang kanyang magiging paggaling.

Sa kabila naman nito, nag-aalinlangan pa rin si San Miguel Coach Leo Austria sa muling pagsabak ni June Mar Fajardo sa basketball court, oras na magbalik na ang season ng PBA ngayong taon.

Sinabi ni Austria, masaya siya sa progreso ng paggaling ni June Mar pero kinakailangan pa rin nitong mag-ingat.

Aniya, posibleng sa susunod na taon na muling makapaglalaro ni June Mar lalo na’y 10 hanggang 12 months na pahinga ang ipinayo rito ng mga doktor bago makabalik sa dati nitong kondisyon.

Maglalabas na ng desisyon ang National Basketball Association (NBA) dalawa hanggang apat na linggo mula ngayon kung itutuloy ang naudlot na 2019-2020 NBA season.

Ayon kay NBA commissioner Adam Silver, pinag-aaralan pa nila ang coronavirus outbreak at testing developments kung saan pagkatapos nito ay saka pa lamang sila gagawa ng pasya sa posibleng pagbabalik ng kompetisyon.

Bago ang naglabas ng statement ang NBA ay nagsagawa muna ng conference call si Silver at ang mga club owners ukol sa naturang usapin.

Inamin ni dating Gilas Pilipinas head coach Yeng Guiao na si Fil-Am NBA player Jordan Clarkson ay isang “coach’s dream.”

Ayon kay Guiao, itinuturing niyang isang karangalan ang makasama sa koponan si Clarkson.

Matatandaang hindi nakasali sa national team si Clarkson sa nakalipas na FIBA World Cup pero nakasalang naman siya sa 2018 Asian Games.

Si Clarkson ay sumabak muna sa Cleveland Cavaliers bago napunta sa Los Angeles Lakers at ngayo’y bahagi na ng Utah Jazz.

Aminado si Kai Sotto na excited na siyang sumabak sa G League.

Ngunit, ayon sa Filipino teenager, alam niyang may mga hamon na nag-aabang sa kanya sa tatahakin niyang landas patungo sa pangarap na mapasok ang NBA.

Sa kanyang social media accounts, kinumpirma ng batang manlalaro na isinantabi niya ang mga alok ng ilang koponan sa NCAA para maabot ang kanyang NBA dream.

Bagama’t 18-anyos pa lamang, si Sotto ay mayroon nang 7-foot-2 na height at tumitimbang ng 229 pounds.

Nakatanggap umano ng formal offers si Kai Sotto mula sa mga NCAA Division 1 universities at colleges.

Gayunman, tinanggihan ito ni Sotto dahil mas gusto niyang sumabak sa NBA G League.

Sa isang conference call, kinumpirma ng manager ni Sotto na si Patty Scott na nakapagpasya na ang Pinoy basketball player na pumasok sa G League upang maabot niya ang kanyang pangarap na makarating sa NBA.

Malabong makapasok ang mga batang manlalaro sa Gilas Pilipinas line-up na sasabak sa World Cup.

Paliwanag ni dating national team coach Yeng Guiao, kailangan pa rin kasi ng koponan ng mga players mula sa Philippine Basketball Association (PBA).

Sinasabing naghahanap na ngayon ang Samahang Basketbol ng Pilipinas (SBP) ng grupo ng mga batang manlalaro para maisama sa koponan na isasalang para sa 2023 FIBA World Cup.

Matatandaang inilahok ni Guiao sa kanyang World Cup team sina PBA rookies CJ Perez at Robert Bolick noong nakaraang taon.