SPORTS

Nananatiling mga non-contact sports at iba pang mga uri ng exercise ang pahihintulutan kahit nasa ilalim na ng modified general community quarantine (MGCQ)  ang lugar.

Ayon sa pamunuan ng Philippine Sports Commission (PSC), hindi pa rin pinapayagan ang paglalaro ng basketball at volleyball sa mga lugar na nasa MGCQ.

Ang mga sports activities naman na ito ay papayagan sa mga gcq areas:

walking

jogging

running

biking

golf

swimming

tennis

badminton

equestrian

skateboarding

Paliwanag pa ng mga awtoridad, ang mga nabanggit na aktibidad ay papayagan lamang sa labas o outdoor.

Habang parehong sa indoor at outdoor naman pinapayagang gawin ang mga naturang sports activities sa mga lugar na nasa MGCQ.

Nakalikom ang Lasallian community ng kabuuang P4-M para sa mga pinaka-apektado ng COVID-19 pandemic.

Sinasabing 17 campuses sa ilalim ng De La Salle Philippines, Inc. ang nagsanib-puwersa sa isinagawa nitong pitong oras na programa na pinamagatang “Kada-Uno Lasalyano” kung saan ipinalabas ito nang “live” sa Facebook.

Pinangunahan naman ni dating De La Salle University president Br. Armin Luistro ang event kung saan nakalikom nga ito ng sapat na pondo na ihahandog nito sa mga frontliners.

Kabilang naman sa mga dumalo sina DLSU alumnae Michele Gumabao, Aby Marano, Ara Galang, Kim Fajardo, Mika Reyes at Dawn Macandili at current members Tine Tiamzon, Aduke Ogunsanya, Jolina Dela Cruz, Michelle Cobb, Thea Gagate, Leila Cruz, Ali Borabo, Fifi Sharma, Justine Jazareno, Juls Coronel, at Matet Espina.

Lilipat sa University of Santo Tomas (UST) ANG dalawang manlalaro ng Technological Institute of the Philippines (TIP) Men’s Basketball Team dahil sa pagkakabuwag ng kanilang koponan.

Sinasabing maglalaro na sina Bryan Santos at Ivan Santos sa panig ng growling tigers sa oras na masunod na nila ang residency requirement.

Si Bryan ay nag-average ng 16.3 points at 6.9 rebounds sa engineers noong sumalang ito sa 2019 PBA D-league Foundation Cup habang nakaposte naman si Ivan ng 8.9 points at 4.7 rebounds.

Matatandaang binuwag ng TIP ang kanilang men’s basketball team, maging ang iba pa nitong varsity squads, dahil sa epekto ng COVID-19 pandemic.

Patuloy ang virtual training ng mga atleta ng bansa sa gitna na rin ng coronavirus disease 2019 (COVID-19) pandemic.

Ayon kay Ramon Fernandez, Commissioner ng Philippine Sports Commission (PSC) tuloy-tuloy ang home based training ng mga atleta ng bansa para mapanatili ang kanilang best physical shape sa tulong na rin ng National Sports Associations (NSA).

Mino-monitor naman aniya nila ang training ng mga atletang Pinoy dahil mahigpit nilang sinusuportahan ang mga ito.

Dapat konsultahin ang mga manlalaro kaugnay ng mga planong pagbabalik-aksiyon ng Philippine Basketball Association (PBA).

Ito ang inihayag ni Ginebra assistant coach Richard Del Rosario, ilang araw matapos niyang imungkahi ang pagkakaroon ng “PBA Quarantine Cup.”

Sa kanyang proposal, binanggit ni del Rosario na puwedeng pag-aralan ang isang compressed conference sa loob ng dalawang buwan kung saan ang bawat team ay mamamalagi lamang sa quarantine facilities malapit sa game at practice venues.

Gayunman, sinabi ni Del Rosario na mahalagang malaman ang panig ng mga manlalaro ukol sa naturang usapin.

Pagkakalooban ng bisikleta ng Philippine Olympic Committee (POC) ang mga pambansang atleta upang masunod ang physical distancing protocols habang nagsasanay ang mga ito.

Ayon kay POC President Abraham “Bambol” Tolentino, ang pagbibigay ng free bikes ay isa lamang sa mga paraan ng ahensya para matulungan ang mga national athletes sa gitna ng coronavirus disease 2019 (COVID-19) pandemic.

Gayunman, nilinaw ni Tolentino sa mga susunod na araw pa lamang malalaman o ia-anunsiyo ng POC ang application process at limitado lamang ang mga bisikleta.

Ginagamot ngayon sa isang ospital sa Estados Unidos si NBA legend Patrick Ewing dahil sa coronavirus disease 2019 (COVID-19).

Sa isang post sa Twitter, isiniwalat naman ni Ewing, 57, na nagpositibo siya sa virus.

Pinayuhan naman ni Ewing ang kanyang mga tagahanga na ingatan ang kanilang mga sarili, gayundin ang kani-kanilang mga mahal sa buhay.

Inanunsiyo ng FIBA na wala nang magaganap na 3×3 competitions ngayong taon bunsod pa rin ng Coronavirus Disease (COVID-19) pandemic.

Bunga nito, kanselado na ang ilang events tulad ng FIBA 3×3 Under-23 Nations League, FIBA 3×3 Under-17 Zone Cups, at apat na World Tour events sa Prague, Lausanne, Los Angeles, at Nanjing.

Samantala, inusod naman ang dalawang Olympic qualifying tournaments (OQTs) sa 2021 kasunod ng postponement ng Tokyo Olympics.

Ang qualifying tournaments o OQTs ay itinakda mula Marso 18 hanggang 22 ngayong taon sa Bengaluru, India, kung saan kasama sana ang Pinoy top-ranked players na sina Joshua Munzon, Alvin Pasaol,  CJ Perez at Moala Tautuaa.