SPORTS

Naglabas na ng schedule ang NBA ng kanilang mga laro sa muling operasyon nito sa Disney Resort sa Florida.

Ayon sa NBA, magsasagawa muna ng 33 tune up games bago ang pormal na pagsisimula ng mga laro sa July 30.

Unang magsasagawa ng tune up games ang Orlando Magic at Los Angeles Clippers bago ang bakbakan ng Washington Wizards at Denver Nuggets at paghaharap ng New Orleans Pelicans at Brooklyn Nets gayundin ang pagtutuos ng Sacramento Kings at Miami Heat.

Magiging pambungad naman sa pormal na pagsisimula ng mga laro sa July 30 ang sagupaang Jazz at Pelicans.

Welcome sa Philippine Basketball Association (PBA) ang pagpayag ng gobyerno na muling makapag-praktis ang kanilang mga manlalaro.

Ayon kay PBA Commissioner Willie Marcial, natutuwa sila rito dahil tiyak na makakapagsagawa rin sila ng live games kalaunan.

Matatandaang nagsumite ng plano ang PBA sa Inter-Agency Task Force (IATF) sakaling aprubahan ang pagbabalik-training ng mga koponan.

Nakalabas na ng ospital si Panamanian boxing legend Roberto “Hands of Stone” Duran.

Matatandaang dinapuan ng coronavirus disease 2019 (COVID-19) ang six-time boxing world champion pero masaya niyang ibinalita sa mga fans ang kanyang paggaling.

Nagpasalamat naman si Duran sa kanyang pamilya, fans, at sa mga doktor na gumamot sa kanya.

Nag-donate ng mahigit 40,000 euros o $45,000 si tennis star Novak Djokovic sa isang bayan sa Serbia na apektado ng coronavirus pandemic.

Ayon sa 33-anyos na manlalaro, ang pera ay ipinamahagi niya para sa mga mamamayan ng Novi Pazar.

Matatandaang nagdeklara ng state of emergency sa nabanggit na bayan noong nakaraang buwan dahil sa pagkalat ng COVID-19.

Kung si TNT guard Roger Pogoy tatanungin, gusto niyang maging bahagi ng pambansang koponan si San Miguel import Chris McCullough.

Ayon kay Pogoy, bagay ang husay at abilidad ni McCullough para pangunahan ang Gilas Pilipinas sa kampanya sa mga pandaigdigang kompetisyon.

Si McCullough ay naging bahagi ng Beermen at katunayan ay natalo pa nito ang KaTropa sa finals na kinabibilangan ni Pogoy noong 2019 PBA Commissioner’s Cup.

Sinabi ni Pogoy na isa si McCullough sa mga import na pinakamahirap bantayan.

Wala nang makakapigil pa sa pagsasanib puwersa nina Le Bron James at JR Smith.

Kasunod ito ng anunsyo ng Los Angeles Lakers na kukunin nila si Smith bilang dagdag puwersa sa koponan.

Si Smith ang ipapalit ng pamunuan ng Lakers kay Avery Bradley na nagpasyang huwag munang maglaro dahil sa problema sa kalusugan.

Si Smith ay naging malaking tulong sa nakuhang 2016 NBA championship title ng Cleveland Cavaliers kasama si James.

Umatras na si former world number one tennis player Andy Murray sa kanyang laban kontra kay Cameron Norrie sa Battle of the Brits exhibition tournament.

Ito ang kinumpirma ng Lawn Tennis Association kung nakatakda sanang lumaban si Murray para sa third place.

Bago nagwithdraw, nakalaban at natalo pa ni Murray sa tournament sina Liam Broady at James Ward habang natalo naman siya kay dan evans.

Ang pagsabak sa Battle of the Brits exhibition tournament na ang come-play ni Murray matapos magpahinga ng pitong buwan dahil sa injury.

Papalitan naman ni James Ward si Murray sa laban kontra kay Norrie.

Ibinunyag ng isang media organization na namataan nilang gumagala si Sacramento Kings forward Jabari Parker at naglaro pa ng tennis nang walang suot na mask sa Chicago, tatlong araw matapos mapaulat na nagpostibo ito sa COVID-19.

Sa mga larawan na inilabas ng TMZ, makikita rin si Parker habang kumakain sa isang restaurant sa lugar.

Bagama’t hindi pa tiyak kung magaling na o kung kailan tinamaan ng virus si Parker, naglabas ng statement ang Kings at sinabing iniiimbestigahan na nila ang naturang usapin.

Nalungkot ang maraming fans ng National Basketball Association (NBA) matapos magretiro ang dunk legend na si Vince Carter.

Magugunitang naglaro sa walong magkakaibang team ang eight-time All-Star player pero mas namayagpag ito sa Toronto Raptors kung saan siya nanatili ng pitong taon.

Naging global sensation si Carter makaraang maghari sa 2000 Slam Dunk Contest bago sinamahan ang koponan ng Amerika sa Olympics noong taon ding iyon.

Huli siyang naglaro sa NBA noong Marso 11 sa panig ng Atlanta Hawks.

Tinamaan ng coronavirus disease 2019 (COVID-19) si six-time boxing world champion Roberto “Hands of Stone” Duran.

Sa isang Instagram post, binanggit ng kanyang anak na si Robin na kasalukuyang nakaratay sa ospital sa Panama ang kanyang ama.

Pero masayang sinabi ni Duran na maliban sa sipon ay wala nang ibang sintomas na nararamdaman ang kanyang ama at bumubuti na ang kondisyon ng boxing legend.