SPORTS

Nagpositibo sa coronavirus disease 2019 (COVID-19) ang bulgarian tennis player na si Grigor Dimitrov, isang linggo matapos niyang lumaban sa isang exhibition tournament.

Inamin ni Dimitrov ang kasalukuyang kalagayan sa pamamagitan ng isang instagram post.

Ayon kay Dimitrov, nakabalik na siya sa Monaco at nais niya ipagbigay alam sa lahat ng kanyang mga nakasalamuha sa mga nakaraang araw na sumailalim din sa test.

Humingi din ng paumanhin si Dimitrov sa mga posibleng naidulot niyang kapahamakan sa ibang tao.

Magugunitang naglaro si Dimitrov sa Adria Tour event sa Belgrade, Serbia kung saan kanyang nakasama ang world number one na si Novak Djokovic.

Balak sagupain ni Filipino fighter Lito Adiwang si dating strawweight champion at elite grappler Yoshitaka Naito ng Japan.

Paliwanag ni Adiwang, gusto niyang makaharap ang mga pinakamagagaling sa ONE Championship matapos ang sunod-sunod niyang panalo sa mga nakaraang torneo.

Wala pang pahayag ang kampo ni Naito ukol sa hamon ni Adiwang.

Wala munang itatanghal na athlete of the year, ngayong ika-82 season ng UAAP.

Ayon kay Atty. Rebo Saguisag, executive director ng UAAP, ang desisyon aniya ng pamunuan ng UAAP ay dahil may ilang mga atleta ang hindi nakapaglaro dahil sa mga kanseladong laro, bilang pag-iingat kontra coronavirus disease 2019 (COVID-19) pandemic.

Sa tala ng UAAP, ilan sa mga naapektuhang laro sa collegiate level ay ang mga sumusunod: volleyball, football, baseball, softball, 3×3 basketball, at iba pa.

Samantala, nakatakda namang itanghal ang University of Santo Tomas (UST), bilang champion ngayong season.

Isasalang na sa coronavirus disease 2019 (COVID-19) tests ang lahat ng mga NBA players, at mga NBA staffs kada isang araw.

Ito ay kaugnay ng muling pagbabalik ng NBA season sa darating na Hulyo 30  kung saan uumpisahang isailalim sa COVID-19 tests ang mga nba players at staff simula sa Hunyo 23.

Sa abiso ng NBA, binigyang diin nito na dapat sumailalim ang mga manlalaro at iba pang mga essential staffs ng nba sa isang rapid test kada isang araw upang matiyak na ligtas ang mga ito sa banta ng COVID-19.

Matatandaang, nasa 22 koponan ang maglalaban laban para sa NBA playoffs sa Hulyo 30 matapos na pansamantalang suspendihin ang laro ng NBA noong Marso dahil sa COVID-19 pandemic.

Planong payagan ng NBA ang pagkakaroon ng hanggang 17 players per team sa oras na magbalik na ang season sa susunod na buwan.

Ayon sa NBA, inaasahang sasabak muli sa hard court ang 22 koponan sa Walt Disney World Resort sa Orlando, Florida.

Matatandaang sinuspinde ng liga ang mga laro nito mula noong ika-11 ng Marsodahil pa rin sa coronavirus pandemic.

Halatang sabik nang makabalik sa PBA si Phoenix Pulse star forward Calvin Abueva.

Ito’y makaraang aminin ni Abueva na sumalang siya sa drug test at psychological therapy na ilan sa mga kondisyon ni PBA commissioner Willie Marcial bago siya makalaro muli sa liga.

Matatandaang pinatawan ng indefinite suspension ng PBA si Abueva makaraang  komprontahin ang girlfriend ni Ray Parks Jr. at makipag-away pa kay TNT import Terrence Jones.

Sinasabing may apat pang therapy session si Abueva pero naantala ito dahil sa coronavirus disease 2019 (COVID-19) pandemic.

Tuloy na ang bakbakan sa ibabaw ng ring nina British world heavyweight champions Anthony Joshua at Tyson Fury.

Ito’y makaraang isiwalat ni promoter Eddie Hearn na nagkasundo na ang magkabilang panig sa financial terms para sa isang two-fight deal.

Hawak ni Joshua ang WBA, IBF, WBO at IBO belts habang si Fury naman ang kasalukuyang WBC champion.

Sinasabing may kanya-kanya pang misyon ang dalawang boksingero bago haharapin ang isa’t-isa.

Hindi aalis sa Philippine Basketball Association (PBA) ang Alaska Aces.

Ito ang pahayag ni League Commissioner Willie Marcial matapos mapaulat na nahihirapan na ang Alaska Milk Corp. na patakbuhin ang kanilang basketball team.

Katunayan, ayon kay Marcial, nakausap na niya mismo si Alaska Governor Dickie Bachmann tungkol dito at tinawanan lang umano ito ng opisyal.

Unang sumali ang Aces sa PBA noong 1986 at 14 na kampeonato na ang nasungkit ng koponan mula noon kung saan pinakahuli ay ang Commissioner’s Cup title noong 2013.

Nadagdagan pa ang bilang ng mga koponan sa Philippine Basketball Association (PBA) na sumalang sa coronavirus disease 2019 (COVID-19) testing.

Ito’y makaraang mabatid na sumailalim din sa rapid test ang mga manlalaro, coaches, at team officials ng NLEX Road Warriors.

Ayon kay PBA Press Corps president Gerry Ramos, kapwa nag-negatibo sa test ang mga ito.

Sinasabing ginawa ang nabanggit na hakbang bunsod ng ipinatutupad na “no test, no practice” scheme ng liga sa lahat ng koponan.

Matatandaang sumalang na rin sa COVID-19 test ang iba pang PBA teams tulad ng San Miguel Beer, Ginebra, at Magnolia.

Tiniyak ng Maharlika Pilipinas Basketball League (MPBL) na tatapusin nito ang Lakan Cup na naudlot dahil sa coronavirus disease 2019 (COVID-19) pandemic.

Katunayan, ayon kay MPBL commissioner Kenneth Duremdes, plano nilang magdaos ng week-long tournament sa isang venue kung saan ilalabas ito sa “Crossover Podcast.”

Gayunman, kokonsulta muna ang MPBL sa mga medical experts para makakuha ng clearance sa Department of Health, bilang pagtalima na rin sa guidelines ng Inter-Agency Task Force (IATF).