SPORTS

Naniniwala si Philippine Olympic Committee Chairman Bambol Tolentino na makakakuha ng gintong medalya ang Pilipinas sa gaganaping Tokyo Olympics sa July 24.

Ayon kay Tolentino, kung mangyayari ito,  ito ang kauna-unahang gintong medalya na matatanggap ng Pilipinas sa naturang Torneo.

Kabilang sa inaasahang makakasungkit ng  medalya sa international sporting event ay ang pole vault ace na si EJ Obiena, Golfer Yuka Saso, Gymnast Carlos Yulo, weightlifting veteran Hidilyn Diaz, at skateboarder Margielyn Didal.

Sinabi ni Tolentino na ang 19 na manlalaro na isasabak sa olympics ay dumaan sa matinding paghahanda at pag-eensayo.

Sa nasabing bilang ng mag atleta, apat na lamang ang naghihintay para sa kanilang flight patungo sa Tokyo sa mga susunod na araw.

Isinakay sa stretcher si Irish MMA Fighter Conor McGregor matapos matalo sa kanyang laban kay Dustin Poirier sa UFC 264 na ginanap sa T-Mobile Arena, Las Vegas, USA.

Sa unang round pa lamang ay nagka-injury na sa paa si McGregor kaya’t ipinag-utos ng doktor na itigil na ang laban.

Wala pang pahayag ang kampo ni McGregor kung ano ang plano niya sa kanyang career makaraan ang nakahihiyang pagkatalo sa kamay ni Poirier sa naturang laban.

Patuloy na namamayagpag ang Filipino Pole Vaulter na si EJ Obiena sa international sports.

Ito’y matapos makuha ni Obiena ang ika-6 na puwesto sa World Athletics Men’s Pole Vault.

Umangat si Obiena ng 4 na puwesto mula sa ika-10 puwesto sa world rankings.

Samantala, nasa ika-7 puwesto naman ang pambato ng Brazil sa 2016 Olympic champion na si Thiago Braz habang nananatili sa unang pwesto si Armand Duplantis ng Sweden.

Makakasama naman ni Obiena si Judoka Kiyomi Watanabe bilang flag bearers ng Pilipinas sa gaganaping opening ceremony ng Tokyo Olympics sa July 23.

Giba na si Roger Federer sa quarter finals ng Wimbledon.

Ito ay matapos hindi umubra si Federer sa pambato ng Poland na si Hubert Hurkacz na 15 taong mas bata sa 20 time grand slam title winner.

Ang nasabing pagkatalo ng 8 time Wimbledon champion ay ika-14 na nito sa 119 match sa nasabing Torneo at unang first straight sets loss mula nang opening round exit laban kay Mario Ancic noong 2002.

Ayon kay Federer, hindi pa niya masabi kung tapos na ang kanyang karera sa bagamat umaming kailangan aniya niyang mag regroup at magbalik kondisyon para higit na maging competitive.

Kasunod na rin ito ng pagsali ni Federer sa Olympic games sa Tokyo, Japan sa susunod na buwan.

Isa nang ganap na Filipino Citizen ang Spanish Football Player na si Bienvenido Marañon.

Ito ay matapos lagdaan ni Pangulong Rodrigo Duterte nitong Hulyo 2 ang Republic Act 11570 na naglalayong pagkalooban ng Filipino Citizenship ang United City Football Club Striker.

Dahil dito, inaasahang mapapalakas ang kampanya ng Philippine Azkals sa International Competitions.

Dumating sa bansa si Marañon noong May 2015 at naglaro para sa Ceres Negros Football Club, isa sa mga koponan sa Philippines Football League.

Itinanghal siya bilang top scorer at pinarangalan bilang best import player noong 2017, 2018, at 2019. —sa panulat ni Hyacinth Ludivico

Abot kamay na ng Phoenix Suns ang kauna-unahang kampeonato sa kasaysayan ng kanilang prangkisa sa NBA.

Ito’y matapos makaabante sa game 1 ng NBA finals sa best of seven series laban sa Milwaukee Bucks sa iskor na 118-105.

Dahil dito tatlong panalo na lamang ang kailangan ng Phoenix at makakamit na nito ang panalo sa NBA finals.

Bigo naman ang Bucks na mailampaso ang Suns kahit pa nakabalik na sa laro ang 2 time MVP na si Giannis Antetokounmpo makalipas ang dalawang laro na wala ito dahil sa tinamong injury.

Pasok na sa quarterfinals ng Wimbledon sina Novak Djokovic at Roger Federer.

Ito ay matapos talunin ni Djokovic si Cristina Garin ng Chile samantalang pinadapa naman ng Swiss tennis star na si Federer ang pambato ng Italy na si Lorenzo Sonego.

Si Federer ang itinuturing na pinakamatandang tennis player na nakapasok sa quarterfinals ng nasabing torneo.

Ang Hungarian tennis player na si Maron Fucsovics ang susunod na makakaharap ni Djokovic habang makakasagupa naman ni Federer ang sinumang magwawagi kina Daniil Medvedev at Hubert Hurkacz.

Puspusan nang sisimulan ni Senador Manny Pacquiao ang mahigit isang buwang ensayo nito para sa kanyang laban kay Errol Spence, Jr. sa Las Vegas, USA.

Kasunod na rin ito nang pagdating ng team Pacquiao sa Los Angeles International Airport kung saan dumaan sa alternate exit ang pambansang kamao sa gitna ng mga fans at entourage members na naghihintay dito.

Ayon ka Coach Buboy Fernandez maaga silang lumipad pa-L.A. dahil ramdam nilang mas safe ang kanilang training dito kaysa sa Pilipinas matapos luwagan ang COVID-19 restrictions sa Los Angeles.

Mahigpit naman aniya ang koordinasyon ng team Pacquiao sa US authorities para sa health and safety protocols.

Pasok na sa NBA Finals ang Milwaukee Bucks.

Ito’y makaraang masungkit ng Bucks ang 118-107 victory laban sa Atlanta Hawks sa Eastern Conference finals.

Sina Khris Middleton at Jrue Holiday ang nanguna sa Milwaukee sa pamamagitan ng kanilang pinagsamang 59 na puntos.

Ito ang unang pagkakataon na nakapasok sa NBA Finals ang Bucks mula noong 1974.

Makakaharap ng Milwaukee sa finals ang Phoenix Suns.

Kapwa malabong makalaro sa Game 6 ng Eastern Conference finals ang mga superstars ng Milwaukee Bucks at Atlanta Hawks bukas.

Nabatid na hindi pa rin gumaganda ang kondisyon ni two-time MVP forward Giannis Antetokounmpo ng Bucks matapos magkaroon ng injury sa tuhod.

Sa kabilang banda, mukhang mahihirapan din ang Hawks dahil malabo ring maisalang sa Game 6 ang All-Star guard na si Trae Young dulot naman ng pinsala sa kanang paa.

Gayunman, kapwa excited pa rin ang mga fans ng dalawang team kung ano ang mga ilalatag na game plan ng magkabilang panig hanggang sa dulo ng serye.