SPORTS

Tulad ni Gold Medalist Hidilyn Diaz, nagsimula na ring bumuhos ang pabuya para kay Filipina Boxer Nesthy Petecio matapos sungkitin ang silver medal sa 2020 Tokyo Olympics.

Bukod sa medalyang pilak matapos makaharap si Sena Irie ng japan sa Women’s Featherweight finals, aabot na sa P29.5 milyon ang pabuyang nag-aabang kay Petecio.

Binubuo ang mga premyo ng P5 milyon mula sa Philippine Sports Commission,  tig-P5 milyon mula sa mga business tycoon na sina Manny Pangilinan at Ramong Ang.

May P2 milyon  ding ipagkakaloob si 1-Pacman Party-List Mikee Romero, P2.5 milyon house and lot mula sa Ovialand at P10 milyong condo unit mula sa megaworld bukod pa sa limang taong unli-flights ng Air Asia.

Sa kabila ng ito, maaaring buwisan ang mga gantimpalang ibinibigay sa mga atletang nananalo sa Olympics. —sa panulat ni Drew Nacino

Tinitignan pa ng Olympic Gold Medalist na si Hidilyn Diaz kung sasabak pa ito muli sa Olympic games sa darating na 2024 na gaganapin  sa Paris, France.

Sinabi ng Pinay weightlifter, hindi pa siya sigurado kung kakayanin pa ng kaniyang katawan dahil dalawang taon bago ang naturang kompetisyon.

Samantala, inamin ni Diaz na balak nitong maglaro sa World Championship sa Disyembre at ilan pang laro na gaganapin sa mga susunod na taon.

Sa ngayon,sinabi ni Diaz na abala ito sa mga interview at ilang aktibidad matapos makuha ang gintong medalya sa Tokyo Olympics.

Siniguro ng mga taga-hanga ng gymnast na si Carlos Yulo na patuloy ang suporta nila sa nasabing atleta.

Bigo mang makapasok at makapag-uwi ng medalya si Yulo sa Tokyo Olympics, mataas pa rin ang kumpyansa ng ating kababayan sa gymnast.

Dahil dito siniguro ni Yulo na mas malakas na siya sa kanyang pagbabalik.

Umaasa rin ang ating mga kababayan na babawi ito sa Paris sa 2024.—sa panulat ni Rex Espiritu

Hiniling ni Ej Obiena na sa mga kababayan na suportahan at ipagdasal ang pinakamalaking laban niya sa kanyang career.

Samantala, magsisimula mamayang 7:20 ng gabi ang finals ng men’s pole vault na gaganapin sa Tokyo Olympic Stadium.

Ayon kay Obiena, bigatin ang kanyang mga makakalaban sa naturang kompetisyon.

Una nang umusad ang 14 na atleta sa finals kasama ang World Champion na si Armand Duplantis ng Sweden at dating Rio Olympics Bronze Medalist na si Thiago Braz ng Brazil.

Muling minalas ang Gilas Pilipinas sa kamay ng Tunisia sa ikatlong round ng 10th king Abdullah Cup sa Amman, Jordan.

Inilampaso ng Tunisia ang Pilipinas sa score na 80-68, sa kanilang paghaharap sa Prince Hamza Sport Hall.

Nanguna para sa Philippine team si Carl Tamayo na rumatsada ng 14 points habang nag-ambag ng 12 points si S.J. Belangel.

Kumamada naman si Jawher Jawadi ng 21 points para sa Tunisia.

Magugunitang natalo rin ang Gilas sa Jordan team-a sa huling round ng elimination series noong Sabado.—sa panulat ni Drew Nacino

Umaasa si Gymnastics Association of the Philippines President Cynthia Carrion na mas magiging kalmado na si Olympic Gymnast Carlos Yulo sa performance nito sa vault finals, mamaya.

Aminado si Carrion na maaaring magdulot ng pressure kay Yulo ang pakikipagkumpetensya sa pinaka-magagaling na gymnast sa mundo.

Sa kabila nito dapat ay dapat anyang tutukan na lamang ng bente uno anyos na atleta ang kanyang routine.

Makikipag-dikdikan si Yulo sa pitong malalakas na contender mula Turkey, Brazil, Armenia, South Korea at Russian Olympic Committee.

Nangunguna si Shin Jeahwan ng SoKor matapos ang 14.866 points sa qualifications habang pangalawa si Artur Davytan ng Armenia na mayroon ding 14.866.—sa panulat ni Drew Nacino

Pasok na sa semifinals ng men’s middleweight division ang pambato ng Pilipinas na si Eumir Felix Marcial.

Ito’y makaraang patumbahin ng Pinoy boxer ang kalabang si Arman Darchinyan ng Armenia sa unang round pa lamang ng kanilang laban na ginanap sa Kokugikan Arena sa Tokyo.

Sa unang bahagi ng round ay nagpakiramdaman sina Marcial at Darchinyan hanggang sa makahanap ng pagkakataon ang Pinoy pride at nasapol ng right hook ang panga ng kalaban dahilan para matumba ito.

Hindi na nakatayo pa si Darchinyan kaya’t idineklarang panalo ng referee si Marcial.

Naniniwala ang pamilya ni Filipina boxer Nesthy Petecio na masusungkit nito ang isa pang Olympic gold medal para sa Pilipinas.

Sinasabing anuman ang kalalabasan ng laban ni Petecio sa Martes ay tiyak nang makakakuha ito ng pilak o kaya’y ginto.

Makakasagupa naman ni Petecio sa finals ang pambato ng Japan na si Sena Irie.

Umusad na sa championship round ng women’s featherweight sa Tokyo Olympics ang Filipina boxer na si Nesthy Petecio.

Ito’y makaraang masungkit ni Petecio ang 4-1 split decision laban sa Italyanang si Irma Testa sa semifinal round.

Kung papalarin ay makukuha ni Petecio ang ikalawang gintong medalya para sa Pilipinas habang pilak naman ang masisikwat niya sakaling mabigo sa susunod na round.

Makakaharap naman ni Petecio ang mananalo sa pagitan ng mga pambato ng Japan at Britanya.

Pasok na sa final round ng pole vault event sa Tokyo Olympics ang pambato ng Pilipinas na si EJ Obiena.

Ito’y makaraang makuha ni Obiena ang ika-10 puwesto nang maitala ang 5.75-meter mark.

12 atleta lamang sa qualification phase ang umabante sa finals.

Samantala, pasok na rin sa quarterfinals ng men’s flyweight ang Pinoy boxer na si Carlo Paalam.