SPORTS

Aprubado na ng IATF ang pagdaraos ng 2021 PBA Philippine Cup sa Pampanga.

Kinumpirma ni PBA deputy commissioner Eric Castro na ngayong araw ay magtutungo ng Pampanga ang mga koponan para sa kani-kanilang practice.

Ayon kay Castro, magsisilbing venue para sa practice ang Don Honorio Ventura State University sa Bacolor; Colegio De San Sebastian at Bren Guiao Convention Center sa San Fernando City at Angeles University Foundation.

Posible naman aniyang magbalik ang torneyo sa Setyembre 1.

Kasalukuyang nasa ilalim ng modified general community quarantine ang Pampanga.

Magugunitang sinuspinde ang PBA games matapos isailalim muli ang NCR sa enhanced community quarantine sa gitna ng paglobo ng COVID-19 cases.—sa panulat ni Drew Nacino

Gumawa ng kasaysayan ang Cuban Boxer na si Yordenis Ugás matapos gibain si Sen. Manny Pacquiao sa pamamagitan ng unanimous decision sa kanilang welterweight match sa Las Vegas.

Sa unang bahagi pa lamang ng laban ay nagpakitang-gilas na si Ugas kung saan ginamit ng dating Olympian ang kanyang tangkad at bilis para pahirapan ang Pambansang Kamao.

Matapos ang nakagugulat na pagkatalo, sinabi ni Pacquiao na hayaan muna siyang magpahinga at mag-relax bago siya maglabas ng desisyon kung lalaban pa siya o hindi sa hinaharap.

Maliban dito, wala ring inilabas na pahayag ang Pambansang Kamao ukol sa plano niya sa 2022 Elections.

Isa na sa mga part owners ng isang team sa Major League Baseball (MLB) ang Greek NBA star na si Giannis Antetokounmpo.

Sa isang pahayag, sinabi mismo ni Antetokounmpo na isang malaking karangalan na maging bahagi ng ownership group ng Milwaukee Brewers.

Matatandaang isa si Antetokounmpo sa mga nanguna sa Milwaukee Bucks sa pagsungkit nito ng korona sa NBA ngayong taon na huling nagawa ng team limampung taon na ang nakalipas.

Umatras na si Pinoy ice skater Michael Martinez sa huling qualification tournament para sa 2022 Beijing water olympics.

Ayon sa Philippine Skating Union, ito’y matapos na magkaroon ng pabalik-balik na injury si Martinez kaya’t hindi ito sumali sa Nebelhorn Trophy sa Germany.

Ibig sabihin, hindi na rin matutuloy ang pagsali sana nito sa Winter Olympics.

Dahil dito, sina Sofia Frank, Edrian Celestino at Julian Macareng na lang ang kakatawan sa bansa para sa Winter Olympic qualifying competition.

Nakatakadang magharap sa darating na Kapaskuhan ang koponan ng Los Angeles Lakers at Brooklyn Nets.

Maliban sa nasabing koponan, magtutunggali ang Atlanta Hawks at New York Knicks sa Madison Square Garden kasama na ang tapatan ng Dallas Mavericks at Utah Jazz sa Salt Lake City.

Magsisimula naman ang unang laro ng NBA sa ika-19 ng Oktubre kung saan bibisita ang defending champion na Milwaukee Bucks sa Brooklyn Nets habang ang koponang Lakers ay bibista naman sa Golden State Warriors.

Abangan ang ilalabas pang kabuuang 82 games ng NBA sa mga susunod na araw.—sa panulat ni Rex Espiritu

May inihandang malaking sorpresa si fighthing senator Manny ‘Pacman’ Pacquiao.

Iyan ay para sa nalalapit na sagupaan nila ni Yodenis Ugas ng bansang Cuba sa darating na linggo.

Ayon sa team Pacquiao, kakaibang Pacman ang masasaksihan at makikita sa kanilang laban ni Ugas kumpara sa naging laban nila kay Brawner at Thurman noon.

Asahan na magkakaroon ng pagbabago sa footwork ni Pacquiao na talagang ikamamangha aniya ng publiko na manonood ng iniintay na sagupaan sa boxing ring.

Dahil iyan sa pagsisikap at pagtutok ng head coach ni Pacman na si Buboy Fernandez at consultant na si coach Freddie Roach sa speed at footwork nga nitong si Ugas.—sa panulat ni Rex Espiritu

Lilipad pa Kuala Lumpur, Malaysia sa susunod na buwan para sa panibagong training niya si Olympic Gold Medalist Hidilyn Diaz.

Ang nasabing training ay bilang paghahanda ni Diaz sa pagsabak sa World Championships sa Peru sa Nobyembre.

Sinabi ni Dating Congressman Monico Puentevella, Pangulo ng  Samahang Weightlifting ng Pilipinas paghahandaan na rin ni Diaz ang pagsabak sa Asian games sa Hanoi, Vietnam sa susunod na taon.

Matapos ang mga naturang Torneo, inihayag ni Puentevella na saka pa lamang magpapasya si Diaz kung itutuloy ang pagsabak sa 2024 Paris Olympics.

Pinag-uusapan na ng Department of Education at Samahan ng Weightlifting ng Pilipinas na maisama ang sports na weightlifting sa Palarong Pambansa.

Ayon kay education undersecretary Revsee Escobedo, mayroon nang proposal ang SWP noong preparasyon ng 2020 Palarong Pambansa na maisama ang nasabing sports, pero naantala ito dahil sa pandemya.

Sa isang forum naman, muling inihirit ng SWP sa DepEd na maisama ito sa nasabing palaro.

Ayon sa SWP, maraming bata ang may potensyal sa pampalakasan at marami ring ang katulad ni olympics gold medalist Hidilyn Diaz.—sa panulat ni Rex Espiritu

Muling magbabalik sa ring ni UFC legend Conor McGregor.

Iyan ang kanyang naging desisyon kasabay ng patuloy niyang pagpapagaling.

Paliwanag pa ni McGregor na lalaban siya sa timbang na 170 pounds oras na siya ay bumalik.

Ilan sa mga posibleng makalaban niya ay sina Kamaru Usman at Dustin Poirier.

Magugunitang pinatumba siya ni Dustin Poirier noong UFC 264.—sa panulat ni Rex Espiritu

Nasa Las Vegas, Nevada na si Senador Manny Pacquiao.

Isang linggo ito halos bago ang pakikipag bakbakan ni Pacman kay WBA Welterweight Champion Yordenis Ugas.

Ang pambansang kamao ay naispatan sa MGM Grand Hotel and Casino kasama ang asawang si Jinkee at bunsong anak na si Israel.

Sa nasabing hotel din isasagawa ang personal na paghaharap nina pacman at ugas sa kauna unahang pagkakataon bukas.

Ang Pacquiao-Ugas bout ay nakatakdang sa Agosto 22, araw ng linggo.