Hindi pinayagan ng Boston Celtics si Marcus Smart na sumabak sa kanilang huling preseason game laban sa Miami dahil sa umano’y paglabag sa team rules.
Ayon sa ulat, hindi umabot si Smart sa team flight patungong Orlando habang hindi rin ito nakalaro kontra Magic.
Sinabi ni head coach Ime Udoka na humingi na ng paumanhin si Smart at nagsisisi na rin ito sa kanyang ginawa matapos patawan ng one-game suspension.
Muling nasungkit ng Magnolia Hotshots ang panalo sa game 6 ng best-of-seven sa semi-finals ng PBA Philippine Cup.
Nagwagi ang Magnolia matapos talunin ang Meralco Bolts sa iskor na 93-85.
Nanguna sa koponan si power-forward center, Ian Sangalang na nakapagtala ng 19 points, 14 rebounds at 6 na assists habang nakaambag naman ng tig 16 points sina Mark Barroca at Rome Dela Rosa.
Sa ngayon, hinihintay nalang ng Hotshots kung sino ang kanilang makakaharap na mananalo sa pagitan ng San Miguel Beermen at TNT Tropang Giga na nasa do-or-die game sa game 7 ng 2021 PBA Philippine Cup. — Sa panulat ni Angelica Doctolero
Tila babawi si Carlos Yulo sa pag depensa niya sa kanyang titulo sa 50th FIG Artistic Gymnastics World Championship sa Kitakyushu, Japan sa susunod na linggo.
Pursigido si Yulo na makuha pa rin ang Gold Medal sa floor exercise na una niyang napanalunan sa 2019 edition sa Stuttgart, Germany kung saan siya ang kauna-unahang Pilipinong nakakuha ng nasabing titulo.
Ang nasabing event na gagawin mula Oktubre 19 at 20 ay pagkakataon para bumawi sa kanyang no medal finish sa Summer Games.
Handang-handa na ang China para sa 2022 Winter Olympics na gaganapin sa Beijing.
Gayunman, namemeligro ito dahil sa kaliwa’t kanang protesta laban sa human rights record ng China.
Una nang ipinanawagan ng mga rights groups at mga mambabatas sa US na ipagpaliban ng International Olympic Committee ang games at ilipat na lamang sa ibang lugar.
Ito’y kung hindi ititigil ng china ang umano’y genocide laban sa mga Uyghur at iba pang muslim minority groups.
Samantala, isasagawa ang turnover sa makasaysayang bayan ng Olympia, sa Greece pero walang spectators.
Lalarga sa Pebrero 4 hanggang 20 ang Winter Olympics.—sa panulat ni Drew Nacino
Pursigido ang Meralco bolts na itabla sa 3 – 3 ang kartada at puwersahin ang game 7 kontra Magnolia hotshots sa semi-finals ng Philippine Cup.
Ayon kay Meralco Coach Norman Black, umaasa silang magagawa ulit nilang makasungkit ng isa pang panalo mamaya sa Don Honorio Ventura State University gym sa Bacolor, Pampanga.
Gayunman, inaasahan na anya nila ang pagdaan sa butas ng karayom at magiging dikdikan ang laban sa kanilang do-or-die game.
Kabilang sa kanilang tututukan ang depensa at perimeter shooting na ilan sa kanilang naging bentahe sa pagkapanalo sa game 3 at 5.—sa panulat ni Drew Nacino
Isang hakbang na lamang ang TNT Tropang Giga sa 2021 PBA Philippine Cup finals matapos patumbahin sa score na 110 – 90 ang San Miguel Beermen sa game 5 ng kanilang best of 7 semi-final series.
Binitbit ni Jayson Castro ang TNT makaraang magpasiklab ng 19 points habang kumamada ng tig-18 points sina Mikey Williams at Roger Pogoy.
Malaki rin ang naitulong ng pagbabalik-laro ng bigman na si Kelly Williams upang makabawi ang tropang giga sa SMB.
Liyamado na sa serye ang TNT sa kartadang 3 – 2 habang maghaharap muli sa game 6 ang dalawang koponan, bukas.—sa panulat ni Drew Nacino
Napili ang Pilipinas bilang host ng 1st at 2nd windows ng 2023 Fiba World Cup asian qualifiers group a sa Pebrero ng susunod na taon.
Ayon sa Fiba, tatanggalin na nila ang home-and-away format para sa groups A at B upang panatilihin ang bubble format dahil pa rin sa banta ng COVID-19 pandemic.
Makakaharap ng Gilas Pilipinas nang dalawang beses sa group a ang mortal nitong karibal na South Korea habang isang beses ang New Zealand at India.
Magugunitang iniatras ng Fiba ang qualifying games para sa Nobyembre kaya’t sa kabuuan ay walong games sa group a na ang i-ho-host ng Pilipinas.
Samantala, pinapurihan naman ni Samahang Basketbol ng Pilipinas President Al Panlilio ang hakbang ng Fiba at aminadong “excited” na sa muling pagdaraos ng mga nabanggit na laban sa bansa.—sa panulat ni Drew Nacino
Pinaplantsa na ni pinoy boxing champion Nonito Donaire, Jr. ang laban nito sa Disyembre.
Makakasagupa ni Donaire ang WBC mandatory challenger at ngayo’y interim champion na si Raymart Gaballo ng Polomolok, Cotabato.
Ayon kay Donaire, Disyembre 11 ang napili nilang petsa ng laban subalit hihintayin pa nilang mapirmahan ang kontrata.
Disyembre 2020 nang makansela ang laban ni Donaire kay WBC Champion Nordine Oubaali dahil sa COVID-19 testing issue.
Hindi rin natuloy ang laban ni Donaire kay John Riel Casimero dahil sa isyu ng testing at word war ng magkabilang kampo.
Nasungkit ng mga atletang Pinoy ang nasa 19 na medalya matapos ang 2021 polish qualifying round ng para-dance sports competition na ginanap sa Lomianki, Poland.
Nabatid na 14 na Filipino Para Dancers ang nakilahok dahilan para maiuwi ng bansa ang 7 gold medals, 4 silver medals at 8 bronze medals mula sa qualifying tournament.
Dahil dito, pasok na ang mga Filipino Para-Athletes sa World Para Dance Sports Championships na gaganapin sa Nobyembre 26 hanggang Nobyemre 28 sa Ulsan, South Korea.— sa panulat ni Angelica Doctolero
Isiniwalat ni Tokyo Summer Games Gold Medalist Hidilyn Diaz na hindi pa siya nakakapagdesisyon at alanganin pa ang paglahok sa kaniyang panglimang olympics sa Paris sa 2024.
Ayon kay Hidilyn, dedepende sa magiging perpormans niya at qualifying process sa Sea Games sa Vietnam sa Mayo at sa Asian Games sa Hangzhou, China na gaganapin sa Setyembre 2021 ang desisyong lumahok sa naturang olympic.
Samantala, ibinida ni Diaz na patuloy pa rin ang kaniyang pag-eensayo kasama ang Coach na si Julius Naranjo at umaasa umano ito na masisimulan na nila ang training camp sa Malaysia. —sa panulat ni Airiam Sancho